Igimit Kwandanyo Kootap Daudi
Ki teekyi Hiram laitoryatap Tyro Daudi koot, ak kotes osotik, ak kobwa Philistiik kocheeng' laitoryat ne ki kagotabaan. Aeng' ye teebe Daudi Kwandanyo taai; aeng' ye kiwolji, ak kimwachi eng' let kotebi kogas cheetap panda eng' keetichooto po logoek parak.
Ng'alaali Kwandanyo eng' mustarisyek 10, 14–15
14 1Ki iyookto Hiram laitoryatap Tyro piik koba ole mi Daudi, koip taragonik, ak che waei koik ak musogik, si koteekyi ineendet koot. 2Ki nai Daudi kole kagoyai Kwandanyo ineendet laitoryat eng' Israel, amu kaging'eeta laitornatennyi agobo piikyik che po Israel.
3Ki imut Daudi osotik alak eng' Jerusalem, ak kosich weeriik ak tiibiik che chaang'. 4Chu ko kainaigap lagok che ki kisich eng' Jerusalem: Shamua, Shobab, Nathan, ak Solomon, 5Ibar, Elishua, Eliphelet, 6Nogah, Nepeg, Japia, 7Elishama, Beeliada, ak Eliphelet.
Itui Kwandanyo Philistiik
8Kingo kas Philistiik kole kagotabaan Daudi laitoryat eng' Israel komugul, ki toi icheek tugul kocheeng' Daudi. Ki kas Daudi, ak komanda kotoorchin icheek. 9Ki pwa Philistiik ak kobookyi atebweetap Repaim.
10Ki teebe Daudi Kwandanyo, koleenji, “Atogosta kobar Philistiik? Iib icheek eng' eunnyu?” Ki leenji Kwandanyo ineendet, “Togosta, amu aib icheek eng' eung'ung'.”
11Ki pa Baal-perasim; ki par Daudi icheek eng' yooto. Ki le Daudi, “Kagotui Kwandanyo puunikyuk eng' eunnyu, ko uu maraneet ne tui.” Kiguure anyun olooto Baal-perasim. a a v11 Baal-perasim ko kole, “Kiptaiyat ne tuiei.” 12Ki pagaakta Philistiik kamuktaikwak eng' yooto, ak ki yai Daudi ng'atuutyet, ak kibeel icheek eng' maat.
13Ki bookyi Philistiik atebweet kogeny ne po aeng'.
14Ki teebe Daudi Kwandanyo kogeny, ak ki le Kwandanyo, “Metogoste kosup icheek. Ala patennywa ak inyoo icheek eng' ye itoorchingei keetiigap logoek. 15Ye igas cheetap panda eng' keetiigap logoek parak, imanda anyun koba lugeet—amu kagondoenen Kwandang'ung' kobar lugeetap Philistiik.”
16Ki yai Daudi ko uu ye ki ng'at Kwandanyo ineendet, ak ki par icheek lugeetap Philistiik kobooch Gibeon agoi Gezer. 17Ki yom emotinwek tugul kalasunetap Daudi, ak ki yai Kwandanyo pororyosyek tugul komuok ineendet.