Kochamei Israel kocheeng' Kwandanyo
Ki ng'alaal Daudi ak piik tugul ak koip moingetap Kwandanyo ne ki kaiutyi eng' chepkichutit ne leel. Ye kingo terter tuuga ak konam Uzzah moinget, kobek eng' olooto. Ki nereech Daudi, yeityo koiywe, ak kondoi moinget eng' kootap Obed-edom—ole kiberuur piigap koot.
13 1Ki ng'alaal Daudi ak kiptainigap eliphuusyek ak kiptainigap pogolwogik, ak pounik tugul. 2Ki leenji Daudi tuiyet komugul ne po Israel, koleenji, “Ngo igeere ole myee eng' okweek, ak ngo ko kobun Kwandanyo, keyookto ng'olyoot eng' ole loo tugul kwo tupchosyekwok che kong'etune eng' emotinwek tugul che po Israel, kobooto tisiik ak Lawiik che mi nganasookwak ak emotinwekwak che kiyagisye, si kotuiyogei keny. 3Keip moingetap Kwandanyo kogeny keny, amu ma kicheeng' eng' peetuusyegap Saulo.”
4Ki cham tuiyet komugul koyai uu nooto, amu ki myeiit eng' piik tugul.
5Ki yum Daudi piigap Israel tugul kobooch Sihor ne po Misiri agoi Lebo-hamath, si koip moingetap Kwandanyo kong'eetee Kiriath-Jearim.
6Ki togosta Daudi ak piigap Israel tugul koba Baala, nooto ko Kiriath-Jearim ne mi Judah, si koip kong'eetee olooto moingetap Kwandanyo, ne tebee paragunnywa cherongo, ole kiguure kainennyi. 7Ki inde moingetap Kwandanyo chepkichutit ne leel kong'eetee kootap Abinadab; ki kweri Uzzah ak Ahio chepkichutinooto. 8Kiboiboitu Daudi ak piigap Israel tugul eng' taitap Kwandanyo eng' kimnateennywa tugul—tyenwogik, ketubosyek, kibugandinik, sugutisyek, sanisyek che cheeitos, ak igondisyek.
9Ye ki it icheek rwanyutap Kidon, ko yogoite Uzzah eunnyi si konam moinget, amu ki terter eiik. 10Konereech anyun Kwandanyo agobo Uzzah, kobar amu ki iyogoito eunnyi kotokyi moinget; kome eng' yooto eng' taitap Kwandanyo. 11Ki nereech Daudi, amu ki put Kwandanyo agobo Uzzah, nooto anyun ne kiguure yooto Peres-usa agoi ra. 12Ki iywei Daudi Kwandanyo eng' peetuunooto, kole, “Amuti ano moingetap Kwandanyo ole amenye?” 13Ma ki ip anyun Daudi moinget konyo nganaseetap Daudi; ki ip taban kwo kootap Obed-edom Getindet. 14Ki tebee moingetap Kwandanyo kobooto koonnyi Obed-edom eng' kaanyi arawek somok, ak ki iberuur Kwandanyo koonnyi Obed-edom ak tuguuk tugul che ki tinyei.