Izrel Kpebara Ịchọ Nna Anyị

Devid gbara onye ọ bụla izu ma buru igbe Nna anyị a na-elegharịrị anya nʼelu ụgbọ ọhụrụ. Mgbe ehi ndị ahụ sụrụ ngọngọ, Ụza wee jide ya ka ọ kwụrụ chịm, ọ nwụrụ nʼebe ahụ ozugbo. Ihe Devid mere bụ iwe, emesịa egwu, a hapụkwara igbe ahụ nʼụlọ Obed-ịdọm — ebe a gọziri ezinụlọ ahụ.

Isi 13.

Devid gbara izu ya na ndịisi agha nke puku na nke narị, ya na onyendu ọ bụla. Devid gwara ọgbakọ Izrel niile sị, “Ọ bụrụ na ọ dị unu mma, ọ bụrụkwa na o si nʼaka Nna anyị, ka anyị zipu ozi nʼebe niile dị anya nye ụmụnna anyị fọdụrụ nʼala Izrel niile, ya na ndị nchụaja na ndị Livaị nọ nʼobodo ha na nʼala ịta nri anụ ụlọ ha, ka ha bịakwute anyị. Ka anyị bughachikwute onwe anyị igbe ọgbụgba ndụ Nna anyị, ebe ọ bụ na anyị achọghị ya nʼụbọchị Sọl.”

Ọgbakọ ahụ niile kwekọrịtara ime otú a, nʼihi na ọ dị ndị niile mma.

Devid kpọkọtara Izrel niile site na Shaịhọ nke Ijipt ruo Lebo-hamat, iji bute igbe ọgbụgba ndụ Nna anyị site na Kiriat-jearim.

Devid na Izrel niile gbagoro na Baala, bụ Kiriat-jearim nke dị na Juda, iji si nʼebe ahụ bulie igbe ọgbụgba ndụ Nna anyị, bụ nke ọ na-anọkwasị nʼelu cherubim, ebe a na-akpọku Aha ya. Ha buru igbe ọgbụgba ndụ Nna anyị nʼelu ụgbọ ọhụrụ site nʼụlọ Abinadab; Ụza na Ahio na-anya ya. Devid na Izrel niile ji ike ha niile na-aṅụrị ọṅụ nʼihu Nna anyị—na abụ, na une, na ụbọ akwara, na ịgbà, na ogene, na opi.

Mgbe ha bịarutere nʼebe ịzọcha ọka nke Kaịdọn, Ụza setịpụrụ aka ya ijide igbe ahụ, nʼihi na ehi ndị ahụ sụrụ ngọngọ. Mgbe ahụ, iwe Nna anyị dị ọkụ megide Ụza, o tigburu ya nʼihi na o setịpụrụ aka ya nʼigbe ahụ; ọ nwụrụ nʼebe ahụ nʼihu Nna anyị. Devid were iwe nʼihi na Nna anyị wakporo Ụza, ya mere a na-akpọ ebe ahụ Perez-ụza ruo taa. Devid tụrụ egwu Nna anyị nʼụbọchị ahụ, na-asị, “Olee otú m ga-esi bute igbe ọgbụgba ndụ Nna anyị bịakwute m?” Ya mere Devid ebughịkwa igbe ahụ bịa nʼobodo Devid; o mere ka ọ tụgharịa gaa nʼụlọ Obed-ịdọm, onye Git. Igbe ọgbụgba ndụ Nna anyị nọnyeere ndị ezinụlọ Obed-ịdọm nʼụlọ ya ọnwa atọ, Nna anyị gọzikwara ezinụlọ Obed-ịdọm na ihe niile o nwere.