1 Kronika 13

13 ¹Dafidi bá àwọn balógun ẹgbẹ̀rún àti ti ọ̀rọ̀ọ̀rún, àti gbogbo olórí gbìmọ̀ pọ̀. ²Dafidi sọ fún gbogbo ìjọ Israẹli pé, “Bí ó bá dàbí rere lójú yín, tí ó bá sì ti ọ̀dọ̀ Baba wa wá, ẹ jẹ́ kí a ránṣẹ́ jìnnàréré sí àwọn arákùnrin wa tí ó ṣẹ́kù ní gbogbo ilẹ̀ Israẹli, àti pẹ̀lú wọn àwọn àlùfáà àti àwọn ọmọ Lefi ní àwọn ìlú wọn àti pápá oko wọn, kí wọn péjọ sọ́dọ̀ wa. ³Ẹ jẹ́ kí a mú àpótí ẹ̀rí Baba wa padà wá sọ́dọ̀ wa, nítorí a kò wá a ní ọjọ́ Saulu.”

⁴Gbogbo ìjọ sì gbà láti ṣe bẹ́ẹ̀, nítorí ó dàbí ohun tí ó tọ́ lójú gbogbo ènìyàn.

⁵Dafidi sì kó gbogbo Israẹli jọ láti Ṣihori ti Ejibiti títí dé Lebo-hamati, láti mú àpótí ẹ̀rí Baba wa wá láti Kiriati-jearimu.

⁶Dafidi àti gbogbo Israẹli gòkè lọ sí Baala, èyí ni Kiriati-jearimu ní Juda, láti gbé àpótí ẹ̀rí Baba wa gòkè wá láti ibẹ̀, àpótí Baba wa tí ó jókòó lórí àwọn kérúbù, níbi tí a ti ń pe Orúkọ rẹ̀. ⁷Wọ́n sì gbé àpótí ẹ̀rí Baba wa lórí kẹ̀kẹ́ tuntun láti ilé Abinadabu; Ussa àti Ahio sì darí kẹ̀kẹ́ náà. ⁸Dafidi àti gbogbo Israẹli ń yọ̀ níwájú Baba wa pẹ̀lú gbogbo agbára wọn—pẹ̀lú orin, àti dùùrù, àti haapu, àti ìlù ọwọ́, àti kimbali, àti ìpè.

⁹Nígbà tí wọ́n dé ìpakà Kidoni, Ussa na ọwọ́ rẹ̀ láti dì mú àpótí ẹ̀rí náà, nítorí àwọn akọ màlúù kọsẹ̀. ¹⁰Nígbà náà ni ìbínú Baba wa ru sí Ussa, ó sì lù ú bolẹ̀ nítorí tí ó na ọwọ́ rẹ̀ sí àpótí ẹ̀rí náà; ó sì kú síbẹ̀ níwájú Baba wa. ¹¹Inú Dafidi sì bàjẹ́ nítorí tí Baba wa bú jáde sí Ussa, nítorí náà ni a ṣe ń pe ibẹ̀ náà ní Peresi-ussa títí di òní. ¹²Dafidi bẹ̀rù Baba wa ní ọjọ́ náà, ó wí pé, “Báwo ni èmi ṣe lè mú àpótí ẹ̀rí Baba wa wá sọ́dọ̀ mi?” ¹³Nítorí náà Dafidi kò mú àpótí ẹ̀rí náà wá sí ìlú Dafidi; ó yà á sí ilé Obedi-edomu ará Gitti. ¹⁴Àpótí ẹ̀rí Baba wa sì dúró pẹ̀lú ìdílé Obedi-edomu ní ilé rẹ̀ fún oṣù mẹ́ta, Baba wa sì bùkún ìdílé Obedi-edomu àti gbogbo ohun tí ó ní.