Isiraeli Gũtua Gũcaria Ithe witũ
Daudi agĩtaarĩria andũ oothe, agĩkuua ithandũkũ rĩa Ithe witũ rĩrĩa rĩatiganĩrĩĩtio na ngaari njerũ. Rĩrĩa ndegwa ciahĩngĩka na Uza akĩrĩnyiita, agĩkua o hau. Daudi akĩrakara, agĩcooka agĩĩtigĩra, naguo ithandũkũ rĩkĩigwo nyũmba ya Obedi-edomu — kũrĩa andũ a nyũmba ĩyo maarathimirwo.
13 1Naake Daudi agĩciira hamwe na anene a mbũtũ cia andũ ngiri na cia andũ magana, o hamwe na mũtongoria o wothe. 2Naake Daudi akĩĩra kĩũngano gĩothe kĩa Isiraeli atĩrĩ, “Angĩkorwo nĩmwona arĩ wega, na angĩkorwo ũhoro ũyũ nĩ wa Ithe witũ, nĩtũtũmanĩre kũndũ kũraihu na gũkuhĩ harĩ ariũ a ithe witũ arĩa matigaarĩte mabũrũriinĩ mothe ma Isiraeli, o hamwe nao athĩnjĩri Ngai na Alawii arĩa marĩ matũũraniinĩ mao na ũrĩithioinĩ wao, moke moongane harĩ ithuĩ. 3Na tũcookie ithandũkũ rĩa Ithe witũ harĩ ithuĩ rĩngĩ, tondũ tũtiarĩcaririe matukũinĩ ma Saũlũ.”
4Nakĩo kĩũngano gĩothe gĩgĩĩtĩkĩra gwĩka ũguo, tondũ ũndũ ũcio nĩwoonekire ũrĩ wa kĩhooto kũrĩ andũ othe.
5Naake Daudi akĩũngania Isiraeli yothe kuuma Shihori wa Misiri nginya Lebo-hamathu, nĩguo arehe ithandũkũ rĩa Ithe witũ kuuma Kiriathu-jearimu.
6Nao Daudi na Isiraeli yothe makĩambata magĩthiĩ Baala, na nĩrĩo Kiriathu-jearimu kũrĩa kũrĩ Juda, nĩguo marute kuo ithandũkũ rĩa Ithe witũ, ũrĩa ũikaraga igũrũ rĩa makerubi, harĩa rĩĩtwa rĩake rĩanĩrĩirwo. 7Nao magĩkuua ithandũkũ rĩa Ithe witũ na ngaari ĩrĩ njerũ kuuma nyũmba ya Abinadabu; nao Uza na Ahio nĩo maatwaraga ngaari ĩyo. 8Nao Daudi na Isiraeli yothe magĩkenera mbere ya Ithe witũ na hinya wao wothe—na nyĩmbo, na inanda cia mũgeeto, na inanda cia kĩnũbi, na tũhembe, na makengeere, na coro.
9Rĩrĩa maakinyire kĩhuhĩroinĩ kĩa ngano kĩa Kidoni, Uza agĩtambũrũkia guoko nĩguo anyite ithandũkũ rĩu, tondũ ndegwa nĩciahĩngĩkire. 10Namo marakara ma Ithe witũ magĩakanĩra Uza, akĩmũgũtha akĩmũũraga nĩ ũndũ wa gũtambũrũkia guoko gwake harĩ ithandũkũ rĩu; nake agĩkuĩra o hau mbere ya Ithe witũ. 11Naake Daudi akĩrakara nĩ ũndũ Ithe witũ aamũtharĩkĩire Uza; kwoguo handũ hau hageetagwo Perezi-uza nginya ũmũthĩ. 12Naake Daudi agĩĩtigĩra Ithe witũ mũthenya ũcio, akĩũria atĩrĩ, “Ingĩrehe atĩa ithandũkũ rĩa Ithe witũ harĩ niĩ?” 13Kwoguo Daudi ndaatwarire ithandũkũ rĩu itũũraniinĩ inene rĩa Daudi; akĩrĩgarũra akĩrĩtwara nyũmba ya Obedi-edomu ũrĩa Mũgiti. 14Narĩo ithandũkũ rĩa Ithe witũ rĩgĩikara na andũ a nyũmba ya Obedi-edomu, kwao mũciĩ, mĩeri ĩtatũ; nake Ithe witũ akĩrathima andũ a nyũmba ya Obedi-edomu na indo ciake ciothe.