1 நாளாகமம் 13

13 ¹தாவீது ஆயிரம்பேருக்கும் நூறுபேருக்கும் தலைவரான சேனாபதிகளோடும், ஒவ்வொரு தலைவனோடும் ஆலோசனை செய்தான். ²தாவீது இஸ்ரவேலின் சபை அனைத்தையும் நோக்கி: “உங்களுக்கு நலமாகத் தோன்றி, இது எங்கள் பிதாவினால் உண்டானதென்றால், இஸ்ரவேலின் எல்லா நாடுகளிலும் மீதியாயிருக்கிற நம்முடைய சகோதரருக்கும், அவர்களோடேகூட தங்கள் பட்டணங்களிலும் வெளிநிலங்களிலும் இருக்கிற ஆசாரியருக்கும் லேவியருக்கும் நம்மிடத்தில் கூடிவருமாறு தூரத்திலும் அருகிலும் செய்தி அனுப்புவோம். ³நாம் சவுலின் நாட்களில் எங்கள் பிதாவின் பெட்டியைத் தேடாமலிருந்தபடியால், அதை நம்மிடத்திற்குத் திரும்பக் கொண்டுவருவோம்” என்றான்.

⁴இது சகல ஜனங்களுக்கும் நியாயமாய்த் தோன்றினபடியால், அப்படிச் செய்யும்படி சபை அனைத்தும் சம்மதித்தது.

⁵எகிப்தின் சீகோர் தொடங்கி ஆமாத்தின் எல்லைவரையுள்ள இஸ்ரவேலரையெல்லாம் தாவீது கூட்டிச்சேர்த்து, எங்கள் பிதாவின் பெட்டியைக் கீரியாத்யாரீமிலிருந்து கொண்டுவரப் புறப்பட்டான்.

⁶கேருபீன்களுக்கு மேலாக வீற்றிருக்கிற, தமது நாமம் கூறப்படுகிற எங்கள் பிதாவின் பெட்டியை அங்கிருந்து கொண்டுவரும்படி, தாவீதும் இஸ்ரவேலர் அனைவரும் யூதாவிலுள்ள கீரியாத்யாரீம் என்னும் பாலாவுக்குப் போனார்கள். ⁷அவர்கள் எங்கள் பிதாவின் பெட்டியை அபினதாபின் வீட்டிலிருந்து ஒரு புதிய வண்டியின்மேல் ஏற்றிக் கொண்டுவந்தார்கள்; ஊசாவும் அகியோவும் வண்டியை நடத்தினார்கள். ⁸தாவீதும் இஸ்ரவேலர் அனைவரும் தங்கள் முழுப்பலத்தோடும் எங்கள் பிதாவுக்கு முன்பாகப் பாடல்களோடும், சுரமண்டலங்களோடும், தம்புருகளோடும், மேளங்களோடும், கைத்தாளங்களோடும், எக்காளங்களோடும் ஆடிப்பாடிக் களிகூர்ந்தார்கள்.

⁹அவர்கள் கீதோனின் போரடிக்கிற களத்திற்கு வந்தபோது, மாடுகள் தடுக்கிக் கால்தவறினதால், ஊசா பெட்டியைப் பிடிக்கத் தன் கையை நீட்டினான். ¹⁰அப்பொழுது எங்கள் பிதாவின் கோபம் ஊசாவின்மேல் மூண்டது; அவன் தன் கையைப் பெட்டியின்மேல் நீட்டினதால், அவர் அவனை அடித்தார்; அவன் அங்கே எங்கள் பிதாவுக்கு முன்பாக மரித்தான். ¹¹எங்கள் பிதா ஊசாவின்மேல் இப்படி மூண்டெழுந்ததற்காக தாவீது துக்கித்தான்; ஆகையால் அந்த இடம் இந்நாள்வரைக்கும் பேரேஸ்ஊசா என்று அழைக்கப்படுகிறது. ¹²அந்நாளிலே தாவீது எங்கள் பிதாவுக்குப் பயந்து: “எங்கள் பிதாவின் பெட்டியை நான் எப்படி என்னிடத்தில் கொண்டுவருவேன்?” என்றான். ¹³ஆகையால் தாவீது பெட்டியைத் தாவீதின் நகரத்தில் தன்னிடமாய்க் கொண்டுவராமல், அதைக் கித்தியனாகிய ஓபேத்ஏதோமின் வீட்டிற்கு விலகச் செய்தான். ¹⁴எங்கள் பிதாவின் பெட்டி ஓபேத்ஏதோமின் வீட்டாரோடே அவன் வீட்டில் மூன்று மாதம் இருந்தது; எங்கள் பிதா ஓபேத்ஏதோமின் வீட்டாரையும் அவனுக்கு உண்டான யாவையும் ஆசீர்வதித்தார்.