1 Mambo ya Nyakati 13

13 ¹Daudi alishauriana na majemadari wa maelfu na wa mamia, na kila kiongozi. ²Daudi akaliambia kusanyiko lote la Israeli, "Kama ikiwapendeza, na kama ni kutoka kwa Baba yetu, na tupeleke ujumbe mbali kotekote kwa ndugu zetu waliobaki katika nchi zote za Israeli, na pamoja nao makuhani na Walawi walio katika miji yao na nchi zao za malisho, ili wakusanyike kwetu. ³Na tulirudishe kwetu sanduku la Baba yetu, kwa maana hatukulitafuta katika siku za Sauli."

⁴Nalo kusanyiko lote likakubali kufanya hivyo, kwa maana jambo hilo lilionekana jema machoni pa watu wote.

⁵Basi Daudi akawakusanya Israeli wote, tangu Shihori wa Misri hadi Lebo-hamathi, ili kulileta sanduku la Baba yetu kutoka Kiriath-yearimu.

⁶Daudi na Israeli wote wakapanda kwenda Baala, yaani Kiriath-yearimu iliyoko Yuda, ili kulipandisha kutoka huko sanduku la Baba yetu, aketiye juu ya makerubi, mahali ambapo Jina lake hutangazwa. ⁷Wakalichukua sanduku la Baba yetu juu ya gari jipya kutoka nyumba ya Abinadabu; Uza na Ahio ndio walioliendesha. ⁸Daudi na Israeli wote wakashangilia mbele za Baba yetu kwa nguvu zao zote—kwa nyimbo, na vinubi, na zeze, na matari, na matoazi, na tarumbeta.

⁹Walipofika katika sakafu ya kupuria nafaka ya Kidoni, Uza akanyosha mkono wake kulishika sanduku, kwa sababu maksai walijikwaa. ¹⁰Ndipo hasira ya Baba yetu ikawaka juu ya Uza, akampiga kwa sababu alinyosha mkono wake kwenye sanduku; naye akafa hapo mbele za Baba yetu. ¹¹Daudi akakasirika kwa sababu Baba yetu alimfurikia Uza kwa ghadhabu, hivyo mahali pale huitwa Peres-uza hata leo. ¹²Daudi akamwogopa Baba yetu siku ile, akisema, "Nitawezaje kulileta sanduku la Baba yetu kwangu?" ¹³Basi Daudi hakulileta sanduku kwake katika mji wa Daudi; bali akaligeuza liende nyumbani kwa Obed-edomu Mgiti. ¹⁴Sanduku la Baba yetu likakaa na jamaa ya Obed-edomu nyumbani mwake miezi mitatu, naye Baba yetu akaibariki jamaa ya Obed-edomu na vyote alivyokuwa navyo.