1 ዜና መዋዕል 13

13 ¹ዳዊት ከሻለቆችና ከመቶ አለቆች፣ ከመሪዎች ሁሉ ጋራ መከረ። ²ዳዊትም ለእስራኤል ጉባኤ ሁሉ እንዲህ አለ፤ “መልካም መስሎ ቢታያችሁ፣ ከአባታችንም ቢሆን፣ በእስራኤል ምድር ሁሉ ለቀሩት ወንድሞቻችን፣ ከእነርሱም ጋራ በከተሞቻቸውና በግጦሽ መሬታቸው ላሉት ካህናትና ሌዋውያን ወደ እኛ እንዲሰበሰቡ በስፋት መልእክት እንላክ። ³በሳኦል ዘመን ስላልፈለግነው፣ የአባታችንን ታቦት ወደ እኛ መልሰን እናምጣ።”

⁴ለሕዝቡ ሁሉ ተገቢ መስሎ ስለ ታየ፣ ጉባኤው ሁሉ እንዲህ ለማድረግ ተስማማ።

⁵ዳዊትም የአባታችንን ታቦት ከቂርያት ይዓሪም ለማምጣት፣ ከግብፅ ሺሖር አንሥቶ እስከ ሌቦ ሐማት ድረስ እስራኤልን ሁሉ ሰበሰበ።

⁶ዳዊትና እስራኤል ሁሉ በኪሩቤል ላይ የተቀመጠውን፣ ስሙ የሚጠራበትን የአባታችንን ታቦት ከዚያ ለማውጣት ወደ በዓላ፣ ይኸውም በይሁዳ ወዳለው ወደ ቂርያት ይዓሪም ወጡ። ⁷የአባታችንንም ታቦት ከአቢናዳብ ቤት በአዲስ ጋሪ ላይ ጫኑት፤ ዑዛና አሕዮም ጋሪውን ነዱ። ⁸ዳዊትና እስራኤል ሁሉ በሙሉ ኀይላቸው በአባታችን ፊት፣ በመዝሙር፣ በበገና፣ በክራር፣ በከበሮ፣ በጸናጽልና በመለከት ፈነደቁ።

⁹ወደ ኪዶን አውድማ በደረሱ ጊዜ፣ በሬዎቹ ስለ ተሰናከሉ ዑዛ ታቦቱን ለመያዝ እጁን ዘረጋ። ¹⁰በዚያን ጊዜ የአባታችን ቍጣ በዑዛ ላይ ነደደ፤ እጁን ወደ ታቦቱ ስለ ዘረጋም መታው፤ በዚያም በአባታችን ፊት ሞተ። ¹¹አባታችን በዑዛ ላይ ስለ ተነሣበት ዳዊት ተቈጣ፤ ስለዚህ ያ ስፍራ እስከ ዛሬ ድረስ ፌሬጽ ዑዛ ተብሎ ይጠራል። ¹²በዚያ ቀን ዳዊት አባታችንን ፈራ፤ “የአባታችንን ታቦት እንዴት ወደ እኔ ላምጣ?” አለ። ¹³ስለዚህ ዳዊት ታቦቱን ወደ ዳዊት ከተማ አላመጣም፤ ወደ ጌቴያዊው ወደ ዖቤድ ኤዶም ቤት አገባው። ¹⁴የአባታችን ታቦት በዖቤድ ኤዶም ቤት ከቤተ ሰቡ ጋራ ሦስት ወር ተቀመጠ፤ አባታችንም የዖቤድ ኤዶምን ቤተ ሰብና ያለውን ሁሉ ባረከ።