AmaSirayeli Agqiba Ekubeni Amfune uBawo wethu

UDavide ucebisana nabo bonke, aze afuduse ityeya kaBawo wethu ebingakhathalelwanga ngenqwelo entsha. Xa iinkomo zikhubeke uUza aze olule isandla ayibambe, ufa khona apho. Impendulo kaDavide ngumsindo, emva koko uloyiko, ize ityeya ibekwe endlwini kaObhede-edom—apho indlu isikelelwa khona.

Isahluko 13.

UDavide wacebisana nabathetheli-mawaka nabathetheli-makhulu, nazo zonke izikhulu. UDavide wathi kwibandla lonke lakwaSirayeli: “Ukuba kulungile emehlweni enu, nokuba kuphuma kuBawo wethu, masithumele ilizwi liye kude nakufuphi kubazalwana bethu abaseleyo kuwo onke amazwe akwaSirayeli, nababingeleli nabaLevi abahleli nabo emizini yabo nasemadlelweni abo, ukuba bazihlanganisele kuthi. Masiyibuyisele kuthi ityeya kaBawo wethu, kuba asiyifunanga ngemihla kaSawule.”

Lavuma lonke ibandla ukwenjenjalo, kuba yayilungile loo nto emehlweni abantu bonke.

UDavide wawahlanganisa onke amaSirayeli, ethabathela eShihore yaseYiputa, esa eHamati, ukuze ayizise ityeya kaBawo wethu, iphume eKiriyati-yeharim.

UDavide namaSirayeli onke benyuka baya eBhahala, iKiriyati-yeharim ekwaYuda, ukuze banyuse khona ityeya kaBawo wethu, ohleli phezu kweekerubhi, apho livakaliswa khona igama lakhe. Bayikhwelisa enqwelweni entsha ityeya kaBawo wethu, bayithabatha endlwini ka-Abhinadabhi; u-Uza noAhiyo beyiqhuba. UDavide namaSirayeli onke baqamba phambi koBawo wethu ngamandla abo onke, ngeengoma, nangeehadi, nangemirhubhe, neengqongqo, nangamacangci, nangamaxilongo.

Bakufika esandeni sikaKidon, wesa isandla sakhe u-Uza ukuba ayibambe ityeya, ngokuba iinkomo zazigungqisa. Waza wavutha umsindo kaBawo wethu kuye u-Uza, wamxabela ngenxa yokolula kwakhe isandla sakhe etyeyeni; wafela khona phambi koBawo wethu. UDavide wanomsindo ngenxa yokuba uBawo wethu wamtyhoboza u-Uza; ngenxa yoko kuthiwa loo ndawo yiPerets-uza unanamhla. UDavide wamoyika uBawo wethu ngaloo mini, wathi: “Ndingayizisa njani na kum ityeya kaBawo wethu?” Ngako oko uDavide akayizisanga ityeya emzini kaDavide; wasuka wayisa endlwini kaObhedi-edom waseGati. Yahlala ityeya kaBawo wethu nendlu kaObhedi-edom endlwini yakhe iinyanga zantathu; uBawo wethu wayisikelela indlu kaObhedi-edom nezinto zonke abenazo.