Israel asen Tebu dang bushitsü nangzük
Dawidi ajak den jembitep aser asen Tebu süngden, joko kodanga mebushitetba, tasen tasen ka nung bener atu. Kodang nashi arungtep aser Uzzai süngden amettsü, pai yangji asü. Dawid kanga rasa, idangji tsübu, aser süngden Obed-edom ki nung ayu—yangji kinungtem mejang.
13 1Dawidi meyirijang arkotong aser noklang arkotong den, tanishir ajak den jembitep. 2Dawidi Israel telok ajak dang ashi, “Nenok dang junger ta ajiteter, aser iba asen Tebu nungi lira, Israel lima ajak nung aliba asenok adianu remangtem dang, aser parnok den, parnok yimtitem aser chiyimdak nung aliba putir aser Levitem dang, asenok dangi senteptsü asoshi, talang aser anaprong tashi osang yokang. 3Asen Tebu süngden asenok dangi meyipa bener arujang, kechiaser Saul taküm nung asenoki aji mebushi.”
4Aser telok ajaki yamaji inyaktsü nangzük, kechiaser nübur ajak dang junger ta ajiteter.
5Dawidi Kiriath-jearim nungi asen Tebu süngden bener arutsü asoshi, Ijip Shihor nungi Lebo-hamath tashi Israel ajak atenshi.
6Dawid aser Israel ajaki, yang nungjagi cherubim madak mena, pa tenüng ajaba asen Tebu süngden bener atutsü asoshi, Yihuda nung aliba Baala, Kiriath-jearim jagi atu. 7Parnoki asen Tebu süngden Abinadaber ki nungi talungtsü tasen ka nung bener adok; aser Uzza aser Ahio talungtsü ani. 8Dawid aser Israel ajaki pei tashi ajak agi, ken, tzürang kongki, tawaba kongki, tambourine kongki, laya kongki aser jangzü agi, Tebu madang atem.
9Kodang parnok Kidon motsüngmen tonga aru, Uzzai süngden amettsü asoshi teka adok, kechiyong nashitemji metsütak. 10Idangji asen Tebu ain Uzza anema adok, aser süngden dang teka songtokba asoshi pai pa tepset; aser pa yangji Tebu madang asü. 11Dawid mepelai liasü, kechiaser Tebui Uzza anema ain adok, anungji iba linük dangji tanü tashi Perez-uzza ta ajar. 12Dawidi iba anogo nung Tebu tsübua ashi, “Ni koda asen Tebu süngden kü dangi bener arutsü?” 13Anungji Dawidi süngden Dawid yimti-i bener meinü; saka pai süngden aji Git nunger Obed-edom ki jagi aenshia ayu. 14Asen Tebu süngden Obed-edom kibong den pei kidang ita asem ali, aser Tebui Obed-edom kibong aser pa akaba ajak moatsü.