Tebui Dawid Kidong Yangludaktsü
Hirami Dawid dang ki ka yanglu, pa kinung tulutetsü, aser Filistia nungeri tair mezüja shimtetba chuba aputsü atu. Ana koda Dawidi mezüng asen Tebu dang asüngdang; ana koda pa dang langzü, aser tanabuba nung süngdong kolak nung nüburtem apusoba ola angashi tashi amungtsü ta ashi.
14 1Tair madak chuba Hirami pa nem ki ka yanglutsü asoshi, cedar süng, lung mistritem aser mistritem den Dawid dangi osangbenertem yok. 2Tebui pa Israel madak chuba kümdaktsü, aser par nübur Israel tenüng atema pa yimli temaleni uludaktsü ta Dawidi metet.
3Aser Dawidi Yirusalem nung kibutsü tali agi, aser pa nem jabaso aser jala tali sotsü. 4Yirusalem nung pa nem sotsüba chirtem tenüng itemi lir: Shammua, Shobab, Nathan, aser Solomon, 5Ibhar, Elishua, Elifelet, 6Noga, Nefeg, Yafia, 7Elishama, Beeliada, aser Elifelet.
Tebui Filistia Nunger Nungshidaktsü
8Kodang Israel ajak madak chuba asütsü Dawid dak mezüja shimtetogo ta Filistia nungeri angashi, parnok ajak Dawid aputsü atu. Dawidi aji angashia parnok anema aodoktsü. 9Tang Filistia nunger arua Refaim lenten amak.
10Dawidi Tebu dang asüngdang, “Ni Filistia nungertem dang anema atutsü asü? Nai parnok kü ket nungji bendanga agütsütsü asü?” Idangji Tebui pa dang langzü, “Tuang, aser nai parnok ne ket nungji bendanga agütsütsü.”
11Parnoki Baal-Perazimi atu; Dawidi yangji parnok akok. Dawidi ashi, “Tzümetsüng nungpokba mesüka kü teka agi kü tsükchirtemji Tebui nungshitsüogo.” Anungji parnoki iba linük dang Baal-Perazim ta aja. a a v11 Baal-Perazim tetezü “nungshidakba Kibuba.” 12Aser Filistia nungeri parnok tsüngremtem yangji toktsü, aser Dawidi ozüng agütsü, aser itemji arong.
13Ano Filistia nungeri tanaben lenten amak.
14Dawidi tanaben Tebu dang asüngdang, aser Tebui langzü, “Parnok sülen tetu. Parnokji meketbanga aser balsam süngdongtem jakdang nungi parnok anema arimesoang. 15Kodang nai balsam süngdongtem kolak nung lokti süi ola angashidir, idangji tongbangi apusoang—kechiaser Filistia nunger temeranger telok tepsettsü atema, ne Tebu ne jakdang aoba temaitsüogo.”
16Tebui pa dang melaba ama Dawidi inyak, aser parnoki Filistia nunger temeranger telokji Gibeon nungi Gezer tashi akok. 17Aser Dawid nüngsang linük ajak nung sangdonga ao, aser Tebui kin ajaki pa tsübutsü kümdaktsü.