Amar Pitri pora David laga ghor khara kori diye
Hiram pora David nimite ekta raj-ghor bonai dei, tar poribar barhi jai, aru Philistine khan notun abhishek kora raja ke bisaribole ahe. Duibar David pehla amar Pitri ke sudhe; duibar jawab pai, aru dusra bar taike kotha koi, gach laga upor te pao laga awaj huna tak rukhi thakibi.
14 1Tyre laga raja Hiram pora David ke, tar nimite ekta ghor bona bole, cedar laga khuri khan, pathor kata manuh khan aru khuri kata manuh khan logot te, khobor diya manuh khan pathai dise. 2Amar Pitri pora tar ke Israel uporte raja bonai dise koi kene David jani loise, kilemane tar laga praja Israel laga karne tar laga rajyo untcha kori uthaise.
3Aru David pora Jerusalem te aru bisi maiki khan loise, aru tar aru bisi chokra aru chukri khan jonom hoise. 4Jerusalem te tar logot te jonom huwa bacha khan laga nam eitu ase: Shammua, Shobab, Nathan, aru Solomon, 5Ibhar, Elishua, Elpelet, 6Nogah, Nepheg, Japhia, 7Elishama, Beeliada, aru Eliphelet.
Amar Pitri pora Philistine khan ke bhangi diye
8Philistine khan pora David ke pura Israel uporte raja bona bole tel hali dise koi kene hunise, titia tarkhan sob David ke bisari bole uthi jaise. David pora hunise aru tarkhan ke lok pabole bahar te ulai jaise. 9Etiya Philistine khan ahhi kene Rephaim laga upotyka te hamla korise.
10David pora amar Pitri ke hudise, “Moi Philistine khan bhirodh te uthibo na? Apuni tarkhan ke moi laga hath te di dibo na?” Titia amar Pitri pora tar ke koise, “Uthi jabi, aru Moi tarkhan ke tumi laga hath te di dibo.”
11Tarkhan Baal-perazim te uthi jaise; ta te David pora tarkhan ke maribo dise. David pora koise, “Amar Pitri pora, ban-pani bhangi aha nisena, moi laga hath pora moi laga dushman khan ke bhangi dise.” Titia tarkhan hei jaga laga nam Baal-perazim rakhise. a a v11 Baal-perazim laga ortho ase “bhangi kene ulai aha Prabhu.” 12Aru Philistine khan pora tarkhan laga devta khan ta te chari dise, aru David pora hukum dise, aru eitu khan ke jolai dise.
13Aru ekbar Philistine khan upotyka te hamla korise.
14David pora aru amar Pitri ke hudise, aru amar Pitri pora koise, “Tarkhan laga piche te nauthibi. Tarkhan ke gherai kene, balsam gash khan laga samna pora tarkhan logot te ahhibi. 15Jitia tumi balsam gash khan laga uporte khoj mara awaj hunibo, titia juddho koribole ulai jabi—kilemane Philistine sipahi khan ke maribole tumar Pitri tumar age te ulai jaise.”
16Amar Pitri pora tar ke hukum diya nisena David pora korise, aru tarkhan Gibeon pora Gezer tak Philistine laga sipahi khan ke maribo dise. 17Aru David laga naam pura desh khan te punchi jaise, aru amar Pitri pora sob desh khan ke tar bhoi khila dise.