Rama kita Njejegake Padalemane Prabu Dawud

Hiram mbangunaké kraton kanggo Dawud, kulawargané saya akèh, lan wong Filisti padha teka nggolèki raja sing lagi wae dijebadi. Kaping pindho Dawud nyuwun pirsa dhisik marang Rama kita; kaping pindho dhèwèké diparingi wangsulan, lan sing kaping pindho didhawuhi ngentèni swarané wong mlaku baris ing pucuké wit-witan.

Pasal 14.

Hiram, raja ing Tirus, ngutus para utusan menyang ngarsane Prabu Dawud, kanthi kayu eres, para tukang watu lan tukang kayu, kanggo mbangunake padaleman tumrap panjenengane. Prabu Dawud mangerteni manawa Rama kita wis njumenengake panjenengane dadi ratu ngratoni Israel, amarga karajane diluhurake marga saka umate, yaiku bangsa Israel.

Prabu Dawud banjur mundhut garwa maneh ana ing Yerusalem, sarta peputra kakung lan putri maneh. Iki jenenge para putra kang miyos ana ing Yerusalem: Samua, Sobab, Natan, lan Suleman, Ibhar, Elisua, Elpelet, Nogah, Nefeg, Yafia, Elisama, Beeliada, lan Elifelet.

Rama kita Nerak Wong Filisti

Bareng wong Filisti padha krungu manawa Prabu Dawud wis dijebadi dadi ratu ngratoni sakabehe Israel, wong-wong mau kabeh banjur padha mangkat golek Prabu Dawud. Bareng Prabu Dawud midhanget bab iku, banjur tindak methukake. Anadene wong Filisti wis padha teka njarah-rayah ing Lebak Refaim.

Prabu Dawud nyuwun pirsa marang Rama kita: “Punapa kawula kedah majeng nglurug wong Filisti? Punapa tiyang-tiyang punika badhe Paduka ulungaken dhateng kawula?” Pangandikane Rama kita: “Majua, Aku bakal ngulungake wong-wong iku marang kowe.”

Wong-wong mau banjur padha munggah menyang Baal-Perasim lan Prabu Dawud ngasorake wong-wong mau ana ing kono. Pangandikane Prabu Dawud: “Rama kita wis nerak mungsuhku srana tanganku kaya banjir kang nrajang.” Mulane papan iku dijenengake Baal-Perasim. ^a Wong Filisti padha ninggal brahalane ana ing kono, banjur Prabu Dawud paring dhawuh, temahan brahala mau padha diobong.

Sepisan maneh wong Filisti padha njarah-rayah ing lebak mau.

Prabu Dawud nyuwun pirsa maneh marang Rama kita, lan pangandikane Rama kita: “Aja nututi wong-wong iku saka mburi. Mubenga ngideri wong-wong iku, banjur nempuha saka ngarepe wit-wit balsam. Samangsa kowe krungu swarane wong baris lumaku ing pucuke wit-wit balsam, banjur majua perang, awit Ramamu wis tindak ndhisiki kowe, arep nggempur wadya-balane wong Filisti.”

Prabu Dawud nindakake apa kang didhawuhake dening Rama kita, temahan wong-wong mau padha nggempur wadya-balane wong Filisti wiwit saka Gibeon nganti tekan Gezer. Asmane Prabu Dawud banjur kondhang ing sakehe nagara, awit Rama kita ndadekake sakehe bangsa padha giris marang panjenengane.