ଆମ୍ଭମାନଙ୍କ ପିତା ଦାଉଦଙ୍କ ବଂଶ ସ୍ଥାପନ କରନ୍ତି

ହୀରମ ଦାଉଦଙ୍କ ପାଇଁ ଏକ ରାଜପ୍ରାସାଦ ନିର୍ମାଣ କରନ୍ତି, ତାଙ୍କ ପରିବାର ବଢ଼େ, ଏବଂ ପଲେଷ୍ଟୀୟମାନେ ନୂଆ ଅଭିଷିକ୍ତ ରାଜାଙ୍କୁ ଖୋଜି ଆସନ୍ତି। ଦୁଇଥର ଦାଉଦ ପ୍ରଥମେ ଆମ ପିତାଙ୍କୁ ପଚାରନ୍ତି; ଦୁଇଥର ଉତ୍ତର ପାଆନ୍ତି, ଏବଂ ଦ୍ୱିତୀୟ ଥର ତାଙ୍କୁ ଗଛର ଅଗରେ ଚାଲିବାର ଶବ୍ଦ ପାଇଁ ଅପେକ୍ଷା କରିବାକୁ କୁହାଯାଏ।

ଅଧ୍ୟାୟ 14।

ସୋରର ରାଜା ହୀରମ୍‍ ଦାଉଦଙ୍କ ନିକଟକୁ ଦୂତମାନଙ୍କୁ, ଆଉ ତାହାଙ୍କ ନିମନ୍ତେ ଗୋଟିଏ ଗୃହ ନିର୍ମାଣ କରିବା ପାଇଁ ଏରସ କାଷ୍ଠ, ରାଜମିସ୍ତ୍ରୀ ଓ ବଢ଼େଇମାନଙ୍କୁ ପ୍ରେରଣ କଲେ। ଆମ୍ଭମାନଙ୍କ ପିତା ତାହାଙ୍କୁ ଇସ୍ରାଏଲ ଉପରେ ରାଜା କରିଅଛନ୍ତି ବୋଲି ଦାଉଦ ଜାଣିଲେ, କାରଣ ତାହାଙ୍କ ଲୋକ ଇସ୍ରାଏଲଙ୍କ ସକାଶେ ତାହାଙ୍କ ରାଜ୍ୟ ଉଚ୍ଚରେ ଉନ୍ନତ ହୋଇଥିଲା।

ଆଉ ଦାଉଦ ଯିରୂଶାଲମରେ ଅଧିକ ଭାର୍ଯ୍ୟା ଗ୍ରହଣ କଲେ, ପୁଣି ଅଧିକ ପୁତ୍ର ଓ କନ୍ୟାମାନଙ୍କୁ ଜନ୍ମ ଦେଲେ। ଯିରୂଶାଲମରେ ତାହାଙ୍କଠାରୁ ଜନ୍ମଗ୍ରହଣ କରିବା ସନ୍ତାନମାନଙ୍କ ନାମ ଏହି: ଶମୂୟ, ଶୋବବ୍‍, ନାଥନ ଓ ଶଲୋମନ, ଯିଭର, ଇଲୀଶୂୟ, ଇଲ୍‍ପେଲଟ, ନୋଗହ, ନେଫଗ, ଯାଫୀୟ, ଇଲୀଶାମା, ବୀୟଲୀୟାଦା ଓ ଇଲୀଫେଲଟ।

ଆମ୍ଭମାନଙ୍କ ପିତା ପଲେଷ୍ଟୀୟମାନଙ୍କୁ ଭଗ୍ନ କରନ୍ତି

ଦାଉଦ ସମଗ୍ର ଇସ୍ରାଏଲ ଉପରେ ରାଜା ରୂପେ ଅଭିଷିକ୍ତ ହୋଇଅଛନ୍ତି ବୋଲି ପଲେଷ୍ଟୀୟମାନେ ଶୁଣନ୍ତେ, ସେସମସ୍ତେ ଦାଉଦଙ୍କୁ ଅନ୍ଵେଷଣ କରିବାକୁ ଉଠିଗଲେ। ଦାଉଦ ତାହା ଶୁଣି ସେମାନଙ୍କ ସମ୍ମୁଖୀନ ହେବା ପାଇଁ ବାହାରିଲେ। ଏଣେ ପଲେଷ୍ଟୀୟମାନେ ଆସି ରଫାୟୀମ୍‍ ତଳଭୂମିରେ ଲୁଟତରାଜ କରିଥିଲେ।

ତହିଁରେ ଦାଉଦ ଆମ୍ଭମାନଙ୍କ ପିତାଙ୍କୁ ପଚାରିଲେ, “ମୁଁ କି ପଲେଷ୍ଟୀୟମାନଙ୍କ ବିରୁଦ୍ଧରେ ଯିବି? ତୁମ୍ଭେ କି ସେମାନଙ୍କୁ ମୋʼ ହସ୍ତରେ ସମର୍ପଣ କରିବ?” ତହିଁରେ ଆମ୍ଭମାନଙ୍କ ପିତା ତାହାଙ୍କୁ କହିଲେ, “ଯାଅ, ପୁଣି ଆମ୍ଭେ ସେମାନଙ୍କୁ ତୁମ୍ଭ ହସ୍ତରେ ସମର୍ପଣ କରିବା।”

ତହୁଁ ସେମାନେ ବାଲ‍ପରାସୀମକୁ ଉଠିଗଲେ; ଦାଉଦ ସେସ୍ଥାନରେ ସେମାନଙ୍କୁ ଆଘାତ କଲେ। ଦାଉଦ କହିଲେ, “ଜଳରାଶିର ଭଗ୍ନ ତୁଲ୍ୟ ଆମ୍ଭମାନଙ୍କ ପିତା ମୋʼ ହସ୍ତ ଦ୍ଵାରା ମୋହର ଶତ୍ରୁମାନଙ୍କୁ ଭଗ୍ନ କଲେ।” ଏଣୁ ସେମାନେ ସେହି ସ୍ଥାନର ନାମ ବାଲ‍ପରାସୀମ ଦେଲେ। ^a ଆଉ ପଲେଷ୍ଟୀୟମାନେ ସେସ୍ଥାନରେ ଆପଣାମାନଙ୍କ ଦେବତାମାନଙ୍କୁ ତ୍ୟାଗ କଲେ, ପୁଣି ଦାଉଦ ଆଜ୍ଞା ଦେଲେ, ଆଉ ସେଗୁଡ଼ିକ ଅଗ୍ନିରେ ଦଗ୍ଧ ହେଲା।

ପଲେଷ୍ଟୀୟମାନେ ପୁନର୍ବାର ତଳଭୂମିରେ ଲୁଟତରାଜ କଲେ।

ଦାଉଦ ପୁନର୍ବାର ଆମ୍ଭମାନଙ୍କ ପିତାଙ୍କୁ ପଚାରିଲେ, ଆଉ ଆମ୍ଭମାନଙ୍କ ପିତା କହିଲେ, “ସେମାନଙ୍କ ପଛେ ଉଠିଯାଅ ନାହିଁ। ସେମାନଙ୍କୁ ଘେରି ବୁଲ, ପୁଣି ବାଲ୍‍ସମ୍‍ ବୃକ୍ଷଗୁଡ଼ିକ ସମ୍ମୁଖରୁ ସେମାନଙ୍କ ପ୍ରତି ଯାଅ। ଯେତେବେଳେ ତୁମ୍ଭେ ବାଲ୍‍ସମ୍‍ ବୃକ୍ଷଗୁଡ଼ିକର ଅଗ୍ରଭାଗରେ ଗମନର ଶବ୍ଦ ଶୁଣିବ, ସେତେବେଳେ ଯୁଦ୍ଧ କରିବାକୁ ବାହାରିଯାଅ—କାରଣ ପଲେଷ୍ଟୀୟ ସୈନ୍ୟଦଳକୁ ଆଘାତ କରିବା ନିମନ୍ତେ ତୁମ୍ଭ ପିତା ତୁମ୍ଭ ଆଗରେ ବାହାରିଯାଇଅଛନ୍ତି।”

ଆମ୍ଭମାନଙ୍କ ପିତା ଯେପରି ଆଜ୍ଞା ଦେଇଥିଲେ, ଦାଉଦ ସେପରି କଲେ, ପୁଣି ସେମାନେ ଗିବୀୟୋନଠାରୁ ଗେଷର ପର୍ଯ୍ୟନ୍ତ ପଲେଷ୍ଟୀୟ ସୈନ୍ୟଦଳକୁ ଆଘାତ କଲେ। ଆଉ ଦାଉଦଙ୍କ କୀର୍ତ୍ତି ସମସ୍ତ ଦେଶରେ ବ୍ୟାପିଗଲା, ପୁଣି ଆମ୍ଭମାନଙ୍କ ପିତା ସମସ୍ତ ଗୋଷ୍ଠୀଙ୍କୁ ତାହାଙ୍କ ପ୍ରତି ଭୀତ କରାଇଲେ।