ପ୍ରଥମ ବଂଶାବଳୀ 15 FHB Father's Heart Bible™

15 ¹ଦାଉଦ ଦାଉଦ-ନଗରରେ ଆପଣା ନିମନ୍ତେ ଗୃହ ନିର୍ମାଣ କଲେ, ଆମ୍ଭମାନଙ୍କ ପିତାଙ୍କ ସିନ୍ଦୁକ ନିମନ୍ତେ ଏକ ସ୍ଥାନ ପ୍ରସ୍ତୁତ କଲେ ଓ ତହିଁ ନିମନ୍ତେ ଏକ ତମ୍ବୁ ସ୍ଥାପନ କଲେ। ²ସେତେବେଳେ ଦାଉଦ କହିଲେ, “ଆମ୍ଭମାନଙ୍କ ପିତାଙ୍କ ସିନ୍ଦୁକ ଲେବୀୟମାନଙ୍କ ବିନା ଆଉ କେହି ବୋହିବା ଉଚିତ ନୁହେଁ, କାରଣ ଆପଣା ସିନ୍ଦୁକ ବୋହିବା ପାଇଁ ଓ ଅନନ୍ତକାଳ ଆପଣାର ସେବା କରିବା ପାଇଁ ଆମ୍ଭମାନଙ୍କ ପିତା ସେମାନଙ୍କୁ ମନୋନୀତ କଲେ।”

³ପୁଣି ଆମ୍ଭମାନଙ୍କ ପିତାଙ୍କ ସିନ୍ଦୁକକୁ ତହିଁର ପ୍ରସ୍ତୁତ ସ୍ଥାନକୁ ଆଣିବା ନିମନ୍ତେ ଦାଉଦ ସମଗ୍ର ଇସ୍ରାଏଲଙ୍କୁ ଯିରୂଶାଲମରେ ଏକତ୍ର କଲେ। ⁴ସେ ହାରୋଣଙ୍କ ବଂଶଧରମାନଙ୍କୁ ଓ ଲେବୀୟମାନଙ୍କୁ ଏକତ୍ର କଲେ: ⁵କହାତର ସନ୍ତାନମାନଙ୍କ ମଧ୍ୟରୁ ଉରୀୟେଲ ଅଧ୍ୟକ୍ଷ ଓ ତାହାର ଏକ ଶହ କୋଡ଼ିଏ ଜଣ ଭାଇ; ⁶ମରାରିର ସନ୍ତାନମାନଙ୍କ ମଧ୍ୟରୁ ଅସାୟ ଅଧ୍ୟକ୍ଷ ଓ ତାହାର ଦୁଇ ଶହ କୋଡ଼ିଏ ଜଣ ଭାଇ; ⁷ଗେର୍ଶୋମର ସନ୍ତାନମାନଙ୍କ ମଧ୍ୟରୁ ଯୋୟେଲ ଅଧ୍ୟକ୍ଷ ଓ ତାହାର ଏକ ଶହ ତିରିଶ ଜଣ ଭାଇ; ⁸ଇଲୀଷାଫନର ସନ୍ତାନମାନଙ୍କ ମଧ୍ୟରୁ ଶମୟୀୟ ଅଧ୍ୟକ୍ଷ ଓ ତାହାର ଦୁଇ ଶହ ଜଣ ଭାଇ; ⁹ହିବ୍ରୋଣର ସନ୍ତାନମାନଙ୍କ ମଧ୍ୟରୁ ଇଲୀୟେଲ ଅଧ୍ୟକ୍ଷ ଓ ତାହାର ଅଶୀ ଜଣ ଭାଇ; ¹⁰ଉଷୀୟେଲର ସନ୍ତାନମାନଙ୍କ ମଧ୍ୟରୁ ଅମ୍ମୀନାଦବ ଅଧ୍ୟକ୍ଷ ଓ ତାହାର ଏକ ଶହ ବାର ଜଣ ଭାଇ।

¹¹ଦାଉଦ ସାଦୋକ ଓ ଅବୀୟାଥର ଯାଜକଙ୍କୁ, ପୁଣି ଉରୀୟେଲ, ଅସାୟ, ଯୋୟେଲ, ଶମୟୀୟ, ଇଲୀୟେଲ ଓ ଅମ୍ମୀନାଦବ ଲେବୀୟମାନଙ୍କୁ ଡାକିଲେ। ¹²ପୁଣି ସେ ସେମାନଙ୍କୁ କହିଲେ, “ତୁମ୍ଭେମାନେ ଲେବୀୟ ବଂଶସମୂହର ମୁଖ୍ୟ ଅଟ। ଆମ୍ଭମାନଙ୍କ ପିତାଙ୍କ ସିନ୍ଦୁକକୁ ଆମ୍ଭେ ତହିଁ ନିମନ୍ତେ ଯେଉଁ ସ୍ଥାନ ପ୍ରସ୍ତୁତ କରିଅଛି, ସେଠାକୁ ଆଣିବା ପାଇଁ ତୁମ୍ଭେମାନେ ଓ ତୁମ୍ଭମାନଙ୍କ ଭାଇମାନେ ଆପଣାମାନଙ୍କୁ ପବିତ୍ର କର। ¹³କାରଣ ପ୍ରଥମ ଥର ତୁମ୍ଭେମାନେ ତାହା ବୋହିଲ ନାହିଁ ବୋଲି, ପୁଣି ଆମ୍ଭେମାନେ ବିଧିମତେ ତାହାଙ୍କର ଅନ୍ଵେଷଣ କରିଲୁ ନାହିଁ ବୋଲି ଆମ୍ଭମାନଙ୍କ ପିତା ଆମ୍ଭମାନଙ୍କ ଉପରେ ଭାଙ୍ଗି ପଡ଼ିଲେ।”

¹⁴ତେଣୁ ଯାଜକମାନେ ଓ ଲେବୀୟମାନେ ଆମ୍ଭମାନଙ୍କ ପିତାଙ୍କ ସିନ୍ଦୁକ ଆଣିବା ନିମନ୍ତେ ଆପଣାମାନଙ୍କୁ ପବିତ୍ର କଲେ। ¹⁵ପୁଣି ମୋଶା ଆମ୍ଭମାନଙ୍କ ପିତାଙ୍କ ବାକ୍ୟାନୁସାରେ ଯେପରି ଆଜ୍ଞା ଦେଇଥିଲେ, ସେହିପରି ଲେବୀୟମାନେ ଆମ୍ଭମାନଙ୍କ ପିତାଙ୍କ ସିନ୍ଦୁକକୁ ସାଙ୍ଗୀ ସହିତ ଆପଣା କାନ୍ଧରେ ବୋହିଲେ।

¹⁶ଆଉ ଦାଉଦ ଲେବୀୟ ଅଧ୍ୟକ୍ଷମାନଙ୍କୁ କହିଲେ ଯେ, ସେମାନେ ଆପଣା ଭାଇମାନଙ୍କୁ ଗାୟକ ରୂପେ ନିଯୁକ୍ତ କରନ୍ତୁ, ଯେପରି ସେମାନେ ବୀଣା, ନେବଲ ଓ କରତାଳରେ ଆନନ୍ଦ-ସ୍ଵର ଉଠାନ୍ତି। ¹⁷ତହିଁରେ ଲେବୀୟମାନେ ଯୋୟେଲର ପୁତ୍ର ହେମନଙ୍କୁ, ପୁଣି ତାହାର ଭାଇମାନଙ୍କ ମଧ୍ୟରୁ ବେରିଖୀୟର ପୁତ୍ର ଆସଫଙ୍କୁ ଓ ସେମାନଙ୍କ ଭାଇ ମରାରିର ସନ୍ତାନମାନଙ୍କ ମଧ୍ୟରୁ କୂଶୀୟର ପୁତ୍ର ଏଥନଙ୍କୁ ନିଯୁକ୍ତ କଲେ। ¹⁸ଆଉ ସେମାନଙ୍କ ସଙ୍ଗରେ ସେମାନଙ୍କ ଦ୍ଵିତୀୟ ଶ୍ରେଣୀର ଭାଇମାନେ: ଜିଖରୀୟ, ଯାସୀୟେଲ, ଶିମୀରାମୋତ, ଯିହୀୟେଲ, ଉନ୍ନି, ଇଲୀୟାବ, ବନାୟ, ମାସେୟ, ମତ୍ତଥୀୟ, ଇଲୀଫଲେହୁ, ମିକ୍‌ନେୟ ଓ ଦ୍ଵାରପାଳ ଓବେଦ୍‌-ଇଦୋମ ଓ ଯିୟୀୟେଲ। ¹⁹ହେମନ, ଆସଫ ଓ ଏଥନ ଗାୟକମାନେ ପିତ୍ତଳ-କରତାଳ ବଜାଇବା ନିମନ୍ତେ; ²⁰ଜିଖରୀୟ, ଅସୀୟେଲ, ଶିମୀରାମୋତ, ଯିହୀୟେଲ, ଉନ୍ନି, ଇଲୀୟାବ, ମାସେୟ ଓ ବନାୟ ଅଲାମୋତ୍‌ ଅନୁସାରେ ନେବଲ ବଜାଇବା ନିମନ୍ତେ; ^a a v20 ଅଲାମୋତ୍‌ ଏକ ସଙ୍ଗୀତ-ସଙ୍କେତ ଥିଲା, ସମ୍ଭବତଃ ଏହା ଉଚ୍ଚ ବା ତୀକ୍ଷ୍ଣ ସ୍ଵରକୁ ବୁଝାଉଥିଲା। ²¹ଆଉ ମତ୍ତଥୀୟ, ଇଲୀଫଲେହୁ, ମିକ୍‌ନେୟ, ଓବେଦ୍‌-ଇଦୋମ, ଯିୟୀୟେଲ ଓ ଅସସୀୟ ଶିମୀନୀତ ଅନୁସାରେ ବୀଣାରେ ଅଗ୍ରଣୀ ହେବା ନିମନ୍ତେ ନିଯୁକ୍ତ ହେଲେ। ^b b v21 ଶିମୀନୀତ (ଅର୍ଥ ‘ଅଷ୍ଟମ’) ଏକ ସଙ୍ଗୀତ-ସଙ୍କେତ ଥିଲା, ସମ୍ଭବତଃ ଏହା ନୀଚ ବା ଗମ୍ଭୀର ସ୍ଵରକୁ ବୁଝାଉଥିଲା। ²²ଲେବୀୟମାନଙ୍କ ପ୍ରଧାନ କନନୀୟ ଗାନ କାର୍ଯ୍ୟର ଭାରପ୍ରାପ୍ତ ଥିଲା; ସେ ନିପୁଣ ଥିବାରୁ ସଙ୍ଗୀତ ପରିଚାଳନା କଲା। ²³ବେରିଖୀୟ ଓ ଇଲକାନା ସିନ୍ଦୁକ ନିମନ୍ତେ ଦ୍ଵାରପାଳ ହେବା ନିମନ୍ତେ ନିଯୁକ୍ତ ହେଲେ। ²⁴ଶବନୀୟ, ଯିହୋଶାଫଟ, ନଥନେଲ, ଅମାସୟ, ଜିଖରୀୟ, ବନାୟ ଓ ଇଲୀୟେଜର ଯାଜକମାନେ ଆମ୍ଭମାନଙ୍କ ପିତାଙ୍କ ସିନ୍ଦୁକ ସମ୍ମୁଖରେ ତୂରୀ ବଜାଇବା ନିମନ୍ତେ ନିଯୁକ୍ତ ହେଲେ; ଆଉ ଓବେଦ୍‌-ଇଦୋମ ଓ ଯିହୀୟ ସିନ୍ଦୁକ ନିମନ୍ତେ ଦ୍ଵାରପାଳ ହେଲେ।

²⁵ତହିଁରେ ଦାଉଦ, ଇସ୍ରାଏଲର ପ୍ରାଚୀନବର୍ଗ ଓ ସହସ୍ରପତିମାନେ ଆମ୍ଭମାନଙ୍କ ପିତାଙ୍କ ନିୟମ-ସିନ୍ଦୁକକୁ ଓବେଦ୍‌-ଇଦୋମର ଗୃହରୁ ଆନନ୍ଦ ସହକାରେ ଆଣିବା ନିମନ୍ତେ ଗଲେ। ²⁶ଆମ୍ଭମାନଙ୍କ ପିତା ଆମ୍ଭମାନଙ୍କ ପିତାଙ୍କ ନିୟମ-ସିନ୍ଦୁକ ବହନକାରୀ ଲେବୀୟମାନଙ୍କୁ ସାହାଯ୍ୟ କରିବାରୁ, ସେମାନେ ସାତୋଟି ବୃଷ ଓ ସାତୋଟି ମେଷ ବଳିଦାନ କଲେ। ²⁷ଆଉ ଦାଉଦ ସୂକ୍ଷ୍ମ କ୍ଷୌମ ବସ୍ତ୍ରର ଉତ୍ତରୀୟ ପିନ୍ଧିଥିଲେ, ପୁଣି ସିନ୍ଦୁକ ବହନକାରୀ ସମସ୍ତ ଲେବୀୟ, ଗାୟକମାନେ ଓ ଗାନ କାର୍ଯ୍ୟର ଅଧ୍ୟକ୍ଷ କନନୀୟ ମଧ୍ୟ ସେହିପରି ପିନ୍ଧିଥିଲେ; ଆଉ ଦାଉଦ କ୍ଷୌମ ଏଫୋଦ ମଧ୍ୟ ପିନ୍ଧିଥିଲେ। ²⁸ଏରୂପେ ସମଗ୍ର ଇସ୍ରାଏଲ ଆନନ୍ଦ-ଧ୍ଵନି, ଶୃଙ୍ଗ-ନାଦ, ତୂରୀ ଓ କରତାଳ ସହିତ, ପୁଣି ନେବଲ ଓ ବୀଣା ବଜାଇ ଆମ୍ଭମାନଙ୍କ ପିତାଙ୍କ ନିୟମ-ସିନ୍ଦୁକ ଆଣିଲେ।

²⁹ଆମ୍ଭମାନଙ୍କ ପିତାଙ୍କ ନିୟମ-ସିନ୍ଦୁକ ଦାଉଦ-ନଗରରେ ପ୍ରବେଶ କରିବା ସମୟରେ ଶାଉଲର କନ୍ୟା ମୀଖଲ ଝରକା ଦେଇ ଅନାଇଲା; ଆଉ ସେ ଦାଉଦ ରାଜାଙ୍କୁ ନୃତ୍ୟ ଓ ଉଲ୍ଲାସ କରୁଥିବା ଦେଖି ଆପଣା ମନରେ ତାହାଙ୍କୁ ତୁଚ୍ଛ କଲା।