ଆମ୍ଭମାନଙ୍କ ପିତା ପୁନର୍ବାର ଆପଣା ଲୋକଙ୍କ ମଧ୍ୟରେ ବାସ କରନ୍ତି

ସିନ୍ଦୁକକୁ ତାହାର ତମ୍ବୁରେ ସ୍ଥାପନ କରାଯାଏ, ଏବଂ ଦାଉଦ ପ୍ରତ୍ୟେକ ଇସ୍ରାଏଲୀୟଙ୍କୁ ରୁଟି ଓ ପିଠା ଦିଅନ୍ତି, ତାʼପରେ ଆସଫଙ୍କ ହାତରେ ଆମ ପିତାଙ୍କ ପାଇଁ ଏକ ଧନ୍ୟବାଦ ଗୀତ ଦିଅନ୍ତି: ଜାତିମାନଙ୍କୁ କୁହ, ନିୟମ ସ୍ମରଣ କର, ସର୍ବଦା ତାଙ୍କୁ ଖୋଜ। ନିୟମିତ ଉପାସନା ଦୁଇ ସ୍ଥାନରେ ସଂଗଠିତ ହୁଏ, କାରଣ ଆବାସ ତମ୍ବୁ ଏବେ ବି ଗିବୀୟୋନରେ ଅଛି।

ଅଧ୍ୟାୟ 16।

ସେମାନେ ଆମ୍ଭମାନଙ୍କ ପିତାଙ୍କ ସିନ୍ଦୁକ ଆଣି, ଦାଉଦ ତାହା ନିମନ୍ତେ ଯେଉଁ ତମ୍ବୁ ସ୍ଥାପନ କରିଥିଲେ, ତହିଁ ମଧ୍ୟରେ ରଖିଲେ, ପୁଣି ଆମ୍ଭମାନଙ୍କ ପିତାଙ୍କ ସମ୍ମୁଖରେ ହୋମବଳି ଓ ମଙ୍ଗଳାର୍ଥକ ବଳି ଉତ୍ସର୍ଗ କଲେ। ଦାଉଦ ହୋମବଳି ଓ ମଙ୍ଗଳାର୍ଥକ ବଳି ଉତ୍ସର୍ଗ କରିସାରିଲା ଉତ୍ତାରେ, ସେ ଆମ୍ଭମାନଙ୍କ ପିତାଙ୍କ ନାମରେ ଲୋକମାନଙ୍କୁ ଆଶୀର୍ବାଦ କଲେ। ପୁଣି ସେ ପ୍ରତ୍ୟେକ ଇସ୍ରାଏଲୀୟ ଲୋକଙ୍କୁ, ପୁରୁଷ ହେଉ କି ସ୍ତ୍ରୀ ହେଉ, ଖଣ୍ଡେ ରୁଟି, ଖଣ୍ଡେ ଖର୍ଜ୍ଜୁର-ପିଠା ଓ ଖଣ୍ଡେ ଦ୍ରାକ୍ଷା-ପିଠା ବାଣ୍ଟି ଦେଲେ।

ସେ ଆମ୍ଭମାନଙ୍କ ପିତାଙ୍କ ସିନ୍ଦୁକ ସମ୍ମୁଖରେ ସେବା କରିବାକୁ, ସ୍ମରଣ କରାଇବାକୁ, ଧନ୍ୟବାଦ ଦେବାକୁ ଓ ଆମ୍ଭମାନଙ୍କ ପିତାଙ୍କ ପ୍ରଶଂସା କରିବାକୁ ଲେବୀୟମାନଙ୍କ ମଧ୍ୟରୁ କେତେକଙ୍କୁ ନିଯୁକ୍ତ କଲେ। ^a ଆସଫ ପ୍ରଧାନ ଥିଲେ, ଆଉ ତାଙ୍କ ଦ୍ଵିତୀୟ ଥିଲେ ଜିଖରିୟ, ତହୁଁ ଯିୟୀୟେଲ, ଶିମୀରାମୋତ୍‌, ଯିହୀୟେଲ, ମତ୍ତଥୀୟ, ଇଲୀୟାବ, ବନାୟ, ଓବେଦ୍‌-ଇଦୋମ ଓ ଯିୟୀୟେଲ, ସେମାନେ ନେବଲ ଓ ବୀଣା ଧରିଥିଲେ; ପୁଣି ଆସଫ କରତାଲ ବଜାଇଲେ। ବନାୟ ଓ ଯହସୀୟେଲ ଯାଜକମାନେ ଆମ୍ଭମାନଙ୍କ ପିତାଙ୍କ ନିୟମ-ସିନ୍ଦୁକ ସମ୍ମୁଖରେ ନିତ୍ୟ ତୂରୀ ବଜାଇବାର ଥିଲା।

ଆମ୍ଭମାନଙ୍କ ପିତାଙ୍କ ଉଦ୍ଦେଶ୍ୟରେ ଦାଉଦଙ୍କ ଧନ୍ୟବାଦ-ଗୀତ

ସେହି ଦିନ ଦାଉଦ ପ୍ରଥମେ ଆମ୍ଭମାନଙ୍କ ପିତାଙ୍କୁ ଧନ୍ୟବାଦ ଦେବା ନିମନ୍ତେ ଆସଫ ଓ ତାଙ୍କ ଭ୍ରାତୃଗଣଙ୍କୁ ନିଯୁକ୍ତ କଲେ: ଆମ୍ଭମାନଙ୍କ ପିତାଙ୍କୁ ଧନ୍ୟବାଦ ଦିଅ; ତାହାଙ୍କ ନାମ ଧରି ଡାକ; ଗୋଷ୍ଠୀସମୂହ ମଧ୍ୟରେ ତାହାଙ୍କ କର୍ମ ପ୍ରଚାର କର! ତାହାଙ୍କ ଉଦ୍ଦେଶ୍ୟରେ ଗାନ କର; ତାହାଙ୍କ ପ୍ରଶଂସା-ଗାନ କର; ତାହାଙ୍କ ସମସ୍ତ ଆଶ୍ଚର୍ଯ୍ୟ କର୍ମ ବର୍ଣ୍ଣନା କର! ତାହାଙ୍କ ପବିତ୍ର ନାମରେ ଉଲ୍ଲାସ କର; ଯେଉଁମାନେ ଆମ୍ଭମାନଙ୍କ ପିତାଙ୍କର ଅନ୍ଵେଷଣ କରନ୍ତି, ସେମାନଙ୍କ ଅନ୍ତଃକରଣ ଆନନ୍ଦିତ ହେଉ! ଆମ୍ଭମାନଙ୍କ ପିତାଙ୍କର ଓ ତାହାଙ୍କ ଶକ୍ତିର ଅନ୍ଵେଷଣ କର; ନିରନ୍ତର ତାହାଙ୍କ ଶ୍ରୀମୁଖର ଅନ୍ଵେଷଣ କର! ସେ ଯେଉଁ ଆଶ୍ଚର୍ଯ୍ୟ କର୍ମ କରିଅଛନ୍ତି, ତାହା, ତାହାଙ୍କ ଅଦ୍ଭୁତ ଲକ୍ଷଣ ଓ ତାହାଙ୍କ ମୁଖନିର୍ଗତ ବିଚାରସକଳ ସ୍ମରଣ କର। ହେ ତାହାଙ୍କ ଦାସ ଇସ୍ରାଏଲର ସନ୍ତାନଗଣ, ହେ ତାହାଙ୍କ ମନୋନୀତ ଯାକୁବର ସନ୍ତାନଗଣ! ସେ ଆମ୍ଭମାନଙ୍କ ପିତା ଅଟନ୍ତି; ତାହାଙ୍କ ବିଚାର ସମୁଦାୟ ପୃଥିବୀରେ ଅଛି। ତାହାଙ୍କ ନିୟମ ସଦାକାଳ ସ୍ମରଣ କର, ସେ ସହସ୍ର ପୁରୁଷ ପର୍ଯ୍ୟନ୍ତ ଯେଉଁ ବାକ୍ୟ ଆଜ୍ଞା କଲେ, ସେ ଅବ୍ରହାମଙ୍କ ସହିତ ଯେଉଁ ନିୟମ କଲେ, ଇସ୍‌ହାକଙ୍କ ନିକଟରେ କୃତ ତାହାଙ୍କ ଶପଥ, ସେ ତାହା ଯାକୁବଙ୍କ ପ୍ରତି ବିଧିରୂପେ, ଇସ୍ରାଏଲ ପ୍ରତି ଅନନ୍ତକାଳୀନ ନିୟମରୂପେ ସ୍ଥିର କଲେ, ସେ କହିଲେ, “ଆମ୍ଭେ ତୁମ୍ଭକୁ ତୁମ୍ଭ ଅଧିକୃତ ଅଂଶ ସ୍ଵରୂପ କିଣାନ ଦେଶ ଦେବା।” ଯେତେବେଳେ ତୁମ୍ଭେମାନେ ସଂଖ୍ୟାରେ ଅଳ୍ପ, ନଗଣ୍ୟ ଓ ସେହି ଦେଶରେ ପ୍ରବାସୀ ଥିଲ, ଏକ ଗୋଷ୍ଠୀରୁ ଅନ୍ୟ ଗୋଷ୍ଠୀକୁ, ଏକ ରାଜ୍ୟରୁ ଅନ୍ୟ ଲୋକଙ୍କ ନିକଟକୁ ଭ୍ରମଣ କଲ, ସେ କାହାକୁ ସେମାନଙ୍କ ଉପରେ ଉପଦ୍ରବ କରିବାକୁ ଦେଲେ ନାହିଁ; ସେ ସେମାନଙ୍କ ସକାଶେ ରାଜାମାନଙ୍କୁ ଅନୁଯୋଗ କଲେ,

“ଆମ୍ଭ ଅଭିଷିକ୍ତ ଲୋକମାନଙ୍କୁ ସ୍ପର୍ଶ କର ନାହିଁ, ପୁଣି ଆମ୍ଭ ଭବିଷ୍ୟଦ୍‌ବକ୍ତାମାନଙ୍କର କୌଣସି କ୍ଷତି କର ନାହିଁ!”

ହେ ସମୁଦାୟ ପୃଥିବୀ, ଆମ୍ଭମାନଙ୍କ ପିତାଙ୍କ ଉଦ୍ଦେଶ୍ୟରେ ଗାନ କର! ଦିନକୁ ଦିନ ତାହାଙ୍କ ପରିତ୍ରାଣ ପ୍ରଚାର କର। ଗୋଷ୍ଠୀସମୂହ ମଧ୍ୟରେ ତାହାଙ୍କ ଗୌରବମୟ କର୍ମ ପ୍ରକାଶ କର; ସେ ଯେଉଁ ଆଶ୍ଚର୍ଯ୍ୟ କର୍ମ କରିଅଛନ୍ତି, ତାହା ପ୍ରତ୍ୟେକ ଲୋକଙ୍କୁ ଜଣାଅ! କାରଣ ଆମ୍ଭମାନଙ୍କ ପିତା ମହାନ ଓ ଅତିଶୟ ପ୍ରଶଂସନୀୟ ଅଟନ୍ତି; ସେ ସମସ୍ତ ଦେବତାଙ୍କ ଅପେକ୍ଷା ଭୟଯୋଗ୍ୟ ଅଟନ୍ତି। କାରଣ ଗୋଷ୍ଠୀସମୂହର ସମସ୍ତ ଦେବତା ତ ପ୍ରତିମା ମାତ୍ର, ମାତ୍ର ଆମ୍ଭମାନଙ୍କ ପିତା ଆକାଶମଣ୍ଡଳ ନିର୍ମାଣ କଲେ। ତେଜ ଓ ପ୍ରତାପ ତାହାଙ୍କ ସମ୍ମୁଖରେ ଅଛି; ବଳ ଓ ଆନନ୍ଦ ତାହାଙ୍କ ବାସସ୍ଥାନରେ ଅଛି। ହେ ଗୋଷ୍ଠୀସମୂହର ବଂଶସକଳ, ଆମ୍ଭମାନଙ୍କ ପିତାଙ୍କର ଗୁଣଗାନ କର, ଆମ୍ଭମାନଙ୍କ ପିତାଙ୍କ ଉଦ୍ଦେଶ୍ୟରେ ଗୌରବ ଓ ପରାକ୍ରମ ସ୍ଵୀକାର କର! ଆମ୍ଭମାନଙ୍କ ପିତାଙ୍କ ନାମର ଉପଯୁକ୍ତ ଗୌରବ ତାହାଙ୍କ ଉଦ୍ଦେଶ୍ୟରେ ସ୍ଵୀକାର କର; ନୈବେଦ୍ୟ ଘେନି ତାହାଙ୍କ ସମ୍ମୁଖକୁ ଆସ! ପବିତ୍ରତାର ସୌନ୍ଦର୍ଯ୍ୟରେ ଆମ୍ଭମାନଙ୍କ ପିତାଙ୍କ ଆରାଧନା କର। ହେ ସମୁଦାୟ ପୃଥିବୀ, ତାହାଙ୍କ ସମ୍ମୁଖରେ କମ୍ପମାନ ହୁଅ! ନିତାନ୍ତ ଜଗତ ସୁସ୍ଥିର ହୋଇଅଛି; ତାହା କେବେହେଲେ ବିଚଳିତ ହେବ ନାହିଁ। ଆକାଶମଣ୍ଡଳ ଆନନ୍ଦିତ ହେଉ, ପୁଣି ପୃଥିବୀ ଉଲ୍ଲସିତ ହେଉ, ଆଉ ଗୋଷ୍ଠୀସମୂହ ମଧ୍ୟରେ ଲୋକେ କହନ୍ତୁ, “ଆମ୍ଭମାନଙ୍କ ପିତା ରାଜତ୍ଵ କରନ୍ତି!” ସମୁଦ୍ର ଓ ତହିଁର ପୂର୍ଣ୍ଣତା ଗର୍ଜ୍ଜନ କରୁ; କ୍ଷେତ୍ର ଓ ତହିଁ ମଧ୍ୟସ୍ଥିତ ସମସ୍ତ ବସ୍ତୁ ଉଲ୍ଲାସ କରୁ! ସେତେବେଳେ ବନର ବୃକ୍ଷସମୂହ ଆମ୍ଭମାନଙ୍କ ପିତାଙ୍କ ସମ୍ମୁଖରେ ଆନନ୍ଦରେ ଗାନ କରିବେ, କାରଣ ସେ ପୃଥିବୀର ବିଚାର କରିବାକୁ ଆସୁଅଛନ୍ତି। ଆମ୍ଭମାନଙ୍କ ପିତାଙ୍କୁ ଧନ୍ୟବାଦ ଦିଅ, କାରଣ ସେ ମଙ୍ଗଳମୟ; କାରଣ ତାହାଙ୍କ ଦୟା ଅନନ୍ତକାଳସ୍ଥାୟୀ! ଆହୁରି କୁହ: “ହେ ଆମ୍ଭମାନଙ୍କ ପିତା, ଆମ୍ଭମାନଙ୍କୁ ପରିତ୍ରାଣ କର; ଗୋଷ୍ଠୀସମୂହ ମଧ୍ୟରୁ ଆମ୍ଭମାନଙ୍କୁ ସଂଗ୍ରହ କରି ଉଦ୍ଧାର କର, ଯେପରି ଆମ୍ଭେମାନେ ତୁମ୍ଭ ପବିତ୍ର ନାମର ଧନ୍ୟବାଦ କରିବୁ ଓ ତୁମ୍ଭ ପ୍ରଶଂସାରେ ଉଲ୍ଲାସ କରିବୁ।” ଆମ୍ଭମାନଙ୍କ ପିତା ଅନାଦିକାଳରୁ ଅନନ୍ତକାଳ ପର୍ଯ୍ୟନ୍ତ ଧନ୍ୟ ହେଉନ୍ତୁ! ତେବେ ସମସ୍ତ ଲୋକ “ଆମେନ୍‌!” ବୋଲି କହିଲେ ପୁଣି ଆମ୍ଭମାନଙ୍କ ପିତାଙ୍କ ପ୍ରଶଂସା କଲେ।

ଆମ୍ଭମାନଙ୍କ ପିତାଙ୍କ ସିନ୍ଦୁକ ସମ୍ମୁଖରେ ଆରାଧନା ସ୍ଥାପିତ

ତେଣୁ ଦାଉଦ ଆସଫ ଓ ତାଙ୍କ ଭ୍ରାତୃଗଣଙ୍କୁ ଆମ୍ଭମାନଙ୍କ ପିତାଙ୍କ ନିୟମ-ସିନ୍ଦୁକ ସମ୍ମୁଖରେ, ପ୍ରତିଦିନର ଆବଶ୍ୟକ ଅନୁସାରେ ସିନ୍ଦୁକ ସମ୍ମୁଖରେ ନିତ୍ୟ ସେବା କରିବା ନିମନ୍ତେ ସେଠାରେ ରଖିଲେ, ଆଉ ଓବେଦ୍‌-ଇଦୋମ ଓ ତାହାର ଅଠଷଠି ଭ୍ରାତାଙ୍କୁ ମଧ୍ୟ ରଖିଲେ; ଯିଦୂଥୂନର ପୁତ୍ର ଓବେଦ୍‌-ଇଦୋମ ଓ ହୋଷା ଦ୍ଵାରପାଳ ହେବାର ଥିଲେ। ପୁଣି ସାଦୋକ ଯାଜକ ଓ ତାଙ୍କ ସଙ୍ଗୀ ଯାଜକମାନେ ଗିବୀୟୋନସ୍ଥ ଉଚ୍ଚସ୍ଥଳୀରେ ଥିବା ଆମ୍ଭମାନଙ୍କ ପିତାଙ୍କ ଆବାସ ସମ୍ମୁଖରେ ସେବା କଲେ, ^b ଆମ୍ଭମାନଙ୍କ ପିତା ଇସ୍ରାଏଲକୁ ଯେଉଁ ବ୍ୟବସ୍ଥା ଆଜ୍ଞା କଲେ, ତହିଁରେ ଲିଖିତ ସମସ୍ତ ବିଷୟ ଅନୁସାରେ, ହୋମବେଦି ଉପରେ ସକାଳ ଓ ସନ୍ଧ୍ୟା, ନିତ୍ୟ ଆମ୍ଭମାନଙ୍କ ପିତାଙ୍କ ଉଦ୍ଦେଶ୍ୟରେ ହୋମବଳି ଉତ୍ସର୍ଗ କରିବା ନିମନ୍ତେ। ସେମାନଙ୍କ ସଙ୍ଗରେ ହେମନ ଓ ଯିଦୂଥୂନ, ପୁଣି ଆମ୍ଭମାନଙ୍କ ପିତାଙ୍କୁ ଧନ୍ୟବାଦ ଦେବା ନିମନ୍ତେ ମନୋନୀତ ଓ ନାମ ଦ୍ଵାରା ନିର୍ଦ୍ଦିଷ୍ଟ ଅବଶିଷ୍ଟ ଲୋକମାନେ ଥିଲେ, କାରଣ ତାହାଙ୍କ ଦୟା ଅନନ୍ତକାଳସ୍ଥାୟୀ। ହେମନ ଓ ଯିଦୂଥୂନଙ୍କ ସଙ୍ଗରେ ବଜାଇବା ନିମନ୍ତେ ତୂରୀ ଓ କରତାଲ, ପୁଣି ଆମ୍ଭମାନଙ୍କ ପିତାଙ୍କ ପବିତ୍ର ଗୀତ ନିମନ୍ତେ ବାଦ୍ୟଯନ୍ତ୍ର ଥିଲା। ଯିଦୂଥୂନର ପୁତ୍ରମାନେ ଦ୍ଵାରରେ ନିଯୁକ୍ତ ଥିଲେ। ତହୁଁ ସମସ୍ତ ଲୋକ ପ୍ରତ୍ୟେକେ ଆପଣା ଆପଣା ଗୃହକୁ ପ୍ରସ୍ଥାନ କଲେ, ପୁଣି ଦାଉଦ ଆପଣା ପରିବାରକୁ ଆଶୀର୍ବାଦ କରିବା ନିମନ୍ତେ ଫେରିଗଲେ।