Nna Anyị Na-ebikwa Nʼetiti Ndị Ya Ọzọ

E debere igbe ahụ nʼụlọ ikwu ya, Devid nyekwara onye Izrel ọ bụla ogbe achịcha na achịcha ụtọ, mgbe ahụ o nyefere Asaf abụ ekele nye Nna anyị: gwanụ mba niile, chetanụ ọgbụgba ndụ ahụ, na-achọnụ ya mgbe niile. A haziri ofufe a na-efe mgbe niile nʼebe abụọ, ebe ọ bụ na ụlọ nzute ahụ ka guzo na Gibiọn.

Isi 16.

Ha butere igbe Nna anyị, dọba ya nʼime ụlọ ikwu ahụ Devid maara maka ya, ha chụkwara aja nsure ọkụ na aja udo nʼihu Nna anyị. Mgbe Devid chụchara aja nsure ọkụ na aja udo, ọ gọziri ndị ahụ nʼaha Nna anyị. O kenyere onye Izrel ọbụla, ma nwoke ma nwanyị, otu ogbe achịcha, achịcha dệt, na achịcha mkpụrụ vaịn a mịrị amị.

O họpụtara ụfọdụ nʼime ndị Livaị ka ha jee ozi nʼihu igbe Nna anyị, ịkpọku, inye ekele, na ito Nna anyị. ^a Asaf bụ onyeisi, onye na-eso ya bụ Zekaraya, mgbe ahụ Jeyel, Shemiramot, Jehiel, Matitaya, Ilaiab, Benaya, Obed-Idom, na Jeyel, ndị ji ụbọ akwara na une; Asaf na-eti ogene. Benaya na Jahaziel bụ ndị nchụaja ga na-afụ opi ike mgbe niile nʼihu igbe ọgbụgba ndụ Nna anyị.

Abụ Ekele Devid Nye Nna Anyị

Nʼụbọchị ahụ ka Devid buru ụzọ họpụta Asaf na ụmụnne ya inye Nna anyị ekele: Nyenụ Nna anyị ekele; kpọkuonụ aha ya; kwusaanụ ọrụ ya nʼetiti ndị niile! Bụkuonụ ya abụ; bụọnụ abụ otuto nye ya; kọọnụ banyere ọrụ ebube ya niile! Ṅụrịanụ ọṅụ nʼaha nsọ ya; ka obi ndị na-achọ Nna anyị ṅụrịa ọṅụ! Chọọnụ Nna anyị na ike ya; na-achọọnụ ihu ya mgbe niile! Chetanụ ọrụ ebube ndị ọ rụrụ, ọrụ ịtụnanya ya na ikpe o kpere. Unu ụmụ Izrel bụ ohu ya, unu ụmụ Jekọb, ndị ọ họpụtara! Ọ bụ Nna anyị; ikpe ya dị nʼụwa niile. Chetanụ ọgbụgba ndụ ya ruo mgbe ebighị ebi, okwu ahụ o nyere iwu maka ọgbọ 1,000, ọgbụgba ndụ ya na Ebraham gbara, iyi ọ ṅụụrụ Aịzik, nke o mesiri ike nye Jekọb dịka ụkpụrụ, nye Izrel dịka ọgbụgba ndụ ebighị ebi, ọ sị, “Aga m enye unu ala Kenan ka ọ bụrụ ihe nketa unu.” Mgbe unu dị ole na ole nʼọnụọgụgụ, bụrụkwa ndị na-adịghị mkpa, na ndị ọbịa nʼala ahụ, na-awagharị site na mba ruo na mba, site nʼotu alaeze ruo nʼebe ndị ọzọ, o kweghị ka onye ọbụla megbuo ha; ọ baara ndị eze mba nʼihi ha,

“Emetụkwala ndị m e tere mmanụ aka, emekpakwala ndị amụma m ahụhụ!”

Bụkuonụ Nna anyị abụ, ụwa niile! Na-ekwusaanụ nzọpụta ya ụbọchị ruo ụbọchị. Kwupụtanụ ọrụ dị ebube ya nʼetiti mba niile; gwaanụ ndị niile ihe ịtụnanya ndị o mere! Nʼihi na Nna anyị dị ukwuu, bụrụkwa onye kwesiri otuto karịa; ọ bụ onye a ga-atụ egwu karịa chi niile. Nʼihi na chi niile nke ndị mba bụ arụsị, ma Nna anyị kere eluigwe. Ebube na ịdị ukwuu dị nʼihu ya; ike na ọṅụ dị nʼebe obibi ya. Nyenụ Nna anyị, unu ezinụlọ niile nke ndị mba, nyenụ Nna anyị otuto na ike! Nyenụ Nna anyị otuto ruru aha ya; wetanụ onyinye bịanụ nʼihu ya! Fenụ Nna anyị ofufe nʼịma mma nke ịdị nsọ. Maanụ jijiji nʼihu ya, ụwa niile! Nʼezie, e guzosiela ụwa ike; a gaghị enugharị ya ma ọlị. Ka eluigwe ṅụrịa, ka ụwa nwee obi ụtọ, ka ha kwuo nʼetiti mba niile sị, “Nna anyị na-achị!” Ka oke osimiri bigbọọ, ya na ihe niile juru nʼime ya; ka ubi ṅụrịa ọṅụ, ya na ihe niile dị nʼime ha! Mgbe ahụ osisi niile nke ọhịa ga-abụ abụ ọṅụ nʼihu Nna anyị, nʼihi na ọ na-abịa ikpe ụwa ikpe. Nyenụ Nna anyị ekele, nʼihi na ọ dị mma; nʼihi na ịhụnanya ya na-adịgide ruo mgbe ebighị ebi! Sịkwanụ: “Zọpụta anyị, Nna anyị; chịkọta anyị napụta anyị site nʼetiti mba niile, ka anyị nye aha nsọ gị ekele ma ṅụrịa nʼotuto gị.” Ngọzi dịrị Nna anyị, site na mgbe ebighị ebi ruo mgbe ebighị ebi! Mgbe ahụ ndị niile sịrị, “Amen!” ma too Nna anyị.

A Hiwere Ofufe Nʼihu Igbe Nna Anyị

Ya mere, Devid hapụrụ Asaf na ụmụnne ya nʼebe ahụ nʼihu igbe ọgbụgba ndụ Nna anyị, ka ha jee ozi mgbe niile nʼihu igbe ahụ dịka ọrụ ụbọchị ọbụla chọrọ, na Obed-Idom, ya na ụmụnne ya iri isii na asatọ; Obed-Idom nwa Jedutun na Hosa ga-abụ ndị nche ọnụ ụzọ ama. Zadọk bụ onye nchụaja na ndị nchụaja ibe ya jere ozi nʼihu ụlọ nzute Nna anyị nʼebe dị elu ahụ dị na Gibiọn, ^b ịchụrụ Nna anyị aja nsure ọkụ nʼelu ebe ịchụ aja nsure ọkụ mgbe niile, ụtụtụ na anyasị, dịka ihe niile e dere nʼiwu Nna anyị si dị, nke o nyere Izrel nʼiwu. Ha na Heman na Jedutun nọkwa, ha na ndị ọzọ a họpụtara ma kpọọ aha ha inye Nna anyị ekele, nʼihi na ịhụnanya ya na-adịgide ruo mgbe ebighị ebi. Heman na Jedutun ji opi ike na ogene ha ga-eti, na ngwá egwu maka abụ nsọ nke Nna anyị. Ụmụ Jedutun nọ nʼọnụ ụzọ ama. Mgbe ahụ ndị niile lara, onye ọbụla nʼụlọ ya, Devid lọghachikwara ịgọzi ezinụlọ nke aka ya.