Nagnaed Manen ni Amatayo iti Tengnga dagiti Tattaona

Maisaad ti arka iti toldana, ket ited ni David iti tunggal Israelita ti tinapay ken keyk, kalpasanna itedna ken Asaph ti kanta ti panagyaman iti Amatayo: ibagayo kadagiti nasion, laglagipenyo ti tulag, sapulenyo isuna iti kankanayon. Maurnos ti kanayon a panagdayaw iti dua a lugar, ta nakatakder pay laeng ti tabernakulo idiay Gibeon.

Agsao ni Amatayo iti bersikulo 22

Kapitulo 16.

Intugotda ti lakasa ni Amatayo ket insaadda iti uneg ti tolda a pinasdek ni David para iti dayta, ket nangidatagda kadagiti daton a mapuoran ken daton a pannakikappia iti sangoanan ni Amatayo. Idi nalpasen ni David ti nangidaton kadagiti daton a mapuoran ken daton a pannakikappia, binendisionanna dagiti tattao iti nagan ni Amatayo. Biningayna ti tunggal Israelita, lallaki ken babbai, iti maysa a tinapay, maysa a tinapay a dates, ken maysa a tinapay a pasas.

Pinilina dagiti dadduma a Levita a mangserbi iti sangoanan ti lakasa ni Amatayo, tapno agawag, agyaman, ken mangidaydayaw ken ni Amatayo. ^a Ni Asaph ti panguluen, ket maikadua kenkuana ni Zacarias, kalpasanna da Jeiel, Semiramot, Jehiel, Matitias, Eliab, Benaias, Obed-edom, ken Jeiel, nga addaan kadagiti arpa ken lira; ket ni Asaph ti agtukar kadagiti simbalo. Dagiti papadi a da Benaias ken Jahaziel ti agtukar kadagiti trumpeta a kanayon iti sangoanan ti lakasa ti tulag ni Amatayo.

Ti Kanta ni David a Panagyaman ken ni Amatayo

Iti dayta nga aldaw, immuna a pinili ni David da Asaph ken dagiti kakabsatna tapno agyamanda ken ni Amatayo: Agyamankayo ken ni Amatayo; awagandyo ti naganna; ipakaammoyo dagiti aramidna kadagiti tattao! Agkantakayo kenkuana; agkantakayo iti pagdaydayaw kenkuana; salaysayenyo amin a nakaskasdaaw nga aramidna! Agrag-okayo iti nasantoan a naganna; agrag-o koma dagiti puso dagiti agsapsapul ken ni Amatayo! Sapulenyo ni Amatayo ken ti pigsana; sapulenyo ti sangoananna a kanayon! Laglagipenyo dagiti nakaskasdaaw nga aramid nga inaramidna, dagiti milagrona ken dagiti ukom nga imbagana. Dakayo nga annak ni Israel, ti adipenna, dakayo nga annak ni Jacob, dagiti napilina! Isu ni Amatayo; adda iti entero a daga dagiti panangukomna. Laglagipenyo ti tulagna iti agnanayon, ti sao nga imbilinna iti sangaribu a kaputotan, ti tulag nga inaramidna ken ni Abraham, ti sapatana ken ni Isaac, ti pinatalgedna ken ni Jacob kas bilin, ken ni Israel kas agnanayon a tulag, kinunana, “Kenka itedkonto ti daga ti Canaan kas bingaymo a tawid.” Idi bassitkayo laeng, saan a napateg, ken ganggannaetkayo iti daga, bayat nga agdaldaliasatkayo manipud nasion agingga iti nasion, manipud iti maysa a pagarian agingga iti sabali a tattao, awan ti binay-anna a mangidadanes kadakuada; sinawanna dagiti ari gapu kadakuada,

“Diyo sagiden dagiti pinulotanko, ken diyo dangran dagiti propetak!”

Agkantakayo ken ni Amatayo, entero a daga! Ipakaammoyo ti pannakaisalakanna aldaw-aldaw. Iwaragwagyo dagiti nadayag nga aramidna kadagiti nasion; ibagayo kadagiti amin a tattao dagiti nakaskasdaaw nga inaramidna! Ta naindaklan ni Amatayo ken maikari unay a pagdayawan; nasken a pagbutngan isuna ngem dagiti amin a dios. Ta didiosen laeng dagiti amin a dios dagiti tattao, ngem ni Amatayo ti nangaramid kadagiti langit. Adda ti dayag ken kinadakkel iti sangoananna; adda ti pigsa ken ragsak iti pagnaedanna. Itedyo ken ni Amatayo, dakayo amin a pamilia dagiti tattao, itedyo ken ni Amatayo ti dayag ken pigsa! Itedyo ken ni Amatayo ti dayag a maikari iti naganna; mangiyegkayo iti daton ket umayyo iti sangoananna! Agdayawkayo ken ni Amatayo iti nadayag a kinasanto. Agkintayegkayo iti sangoananna, entero a daga! Pudno a natibker ti pannakaipasdek ti lubong; saanto a pulos a mayanug. Agrag-o koma dagiti langit, ket agrag-o koma ti daga, ket ibagada koma kadagiti nasion, “Agari ni Amatayo!” Agdanogdog koma ti taaw ken amin nga adda iti uneg; agrag-o koma dagiti talon ken amin nga adda kadakuada! Kalpasanna, agkantanto iti rag-o dagiti kayo ti kabakiran iti sangoanan ni Amatayo, ta umay isuna tapno ukomen ti daga. Agyamankayo ken ni Amatayo, ta isu ket naimbag; ta agtalinaed iti agnanayon ti di agbalbaliw nga ayatna! Ibagayo met pay, “Isalakannakami, Amami; urnongennakami ken ruarennakami manipud kadagiti nasion, tapno agyamankami iti nasantoan a naganmo ken agrag-okami iti pagdaydayawmo.” Mabendisionan koma ni Amatayo, manipud iti agnanayon agingga iti agnanayon! Kalpasanna, kinuna dagiti amin a tattao, “Amen!” ket indaydayawda ni Amatayo.

Naipasdek ti Panagdayaw iti Sangoanan ti Lakasa ni Amatayo

Isu a binay-an ni David sadiay da Asaph ken dagiti kakabsatna iti sangoanan ti lakasa ti tulag ni Amatayo, tapno agserbida a kanayon iti sangoanan ti lakasa a maitunos iti kasapulan ti tunggal aldaw, ken ni Obed-edom a kadua ti innem a pulo ket walo a kakabsatna; da Obed-edom a anak ni Jeduthun ken ni Hosa ti agbalin a managbantay kadagiti ruangan. Ket ni Zadok a padi ken dagiti kapadina ti nagserbi iti sangoanan ti tabernakulo ni Amatayo iti nangato a disso a pagdaydayawan idiay Gibeon, ^b tapno mangidatonda kadagiti daton a mapuoran ken ni Amatayo iti altar dagiti daton a mapuoran a kanayon, iti bigat ken iti rabii, a maitunos iti amin a nakasurat iti linteg ni Amatayo, nga imbilinna iti Israel. Kaduada da Heman ken Jeduthun, ken dagiti dadduma pay a napili ken naituding babaen iti nagan tapno agyamanda ken ni Amatayo, ta agnanayon ti di agbalbaliw nga ayatna. Addaan da Heman ken Jeduthun kadagiti trumpeta ken simbalo a tukaren, ken kadagiti instrumento para kadagiti nasantoan a kanta ni Amatayo. Naisaad iti ruangan dagiti annak ni Jeduthun. Kalpasanna, nagawid dagiti amin a tattao, tunggal maysa iti balayna, ket nagsubli ni David tapno bendisionanna ti pamilyana.