Ịkwadebe Igbe Nna Anyị nke Ọma

Devid nwara ọzọ, ebe ọ chọpụtala ihe mere mbọ mbụ ahụ ji gbuo otu nwoke: ọ bụ naanị ndị Livaị na-ebu igbe Nna anyị, nʼubu ha. Nʼoge a, e mere ya dịka e si dee ya, ya na ndị ọbụ abụ na ngwa egwu, Devid na-agbakwa egwu — ebe Maịkal si na windo na-ele anya ma na-eleda ya anya.

Isi 15.

Devid wuuru onwe ya ụlọ nʼime obodo Devid, kwadebe ebe maka igbe Nna anyị, ma maa ụlọ ikwuu maka ya. Mgbe ahụ, Devid sịrị, “Ọ dịghị onye ọzọ ga-ebu igbe Nna anyị ma ọ bụghị ndị Livaị, nʼihi na Nna anyị họọrọ ha ibu igbe ya na ijere ya ozi ruo mgbe ebighị ebi.”

Devid kpọkọtara Izrel niile na Jerụsalem iji bulite igbe Nna anyị gaa nʼebe ahụ e kwadeberela maka ya. Ọ kpọkọtakwara ụmụ Erọn na ndị Livaị: sitere nʼụmụ Kohat, Uriel onyeisi, ya na mmadụ 120 nʼime ndị ikwu ya; sitere nʼụmụ Merarai, Asaia onyeisi, ya na mmadụ 220 nʼime ndị ikwu ya; sitere nʼụmụ Gẹshọm, Juel onyeisi, ya na mmadụ 130 nʼime ndị ikwu ya; sitere nʼụmụ Elizafan, Shemaia onyeisi, ya na mmadụ 200 nʼime ndị ikwu ya; sitere nʼụmụ Hebrọn, Eliel onyeisi, ya na mmadụ iri asatọ nʼime ndị ikwu ya; sitere nʼụmụ Uziel, Aminadab onyeisi, ya na mmadụ 112 nʼime ndị ikwu ya.

Devid kpọrọ ndị nchụaja bụ Zadọk na Abịata, na ndị Livaị bụ Uriel, Asaia, Juel, Shemaia, Eliel, na Aminadab. Ọ sịrị ha, “Unu bụ ndịisi ezinụlọ ndị Livaị. Doonụ onwe unu nsọ, unu na ndị ikwu unu, iji bulite igbe Nna anyị gaa nʼebe m kwadeberela maka ya. Nʼihi na unu ebughị ya na mbụ, Nna anyị dakwasịrị anyị nʼiwe, ebe ọ bụ na anyị achọghị ya nʼụzọ ziri ezi.”

Ya mere ndị nchụaja na ndị Livaị doro onwe ha nsọ iji bulite igbe Nna anyị. Ndị Livaị ji osisi ịbu ya buru igbe Nna anyị nʼubu ha, dịka Mosis nyere nʼiwu, site nʼokwu Nna anyị.

Devid gwara ndịisi ndị Livaị ka ha họpụta ndị ikwu ha ka ha bụrụ ndị ọbụ abụ, na-eji ụbọ akwara, une, na ogene na-eweli olu nʼọṅụ. Ndị Livaị họpụtara Heman nwa Juel; Asaf nwa Berekaia onye ikwu ya; na site nʼikwu ha bụ ndị Merarai, Itan nwa Kushaia. Ya na ha, ndị ikwu ha nke ọkwa nke abụọ: Zekaraia, Jaaziel, Shemiramọt, Jehaiel, Uni, Elaiab, Benaia, Maaseia, Matitaia, Elifelehu, Miknaia, Obed-Edọm, na Jeiel, ndị nche ọnụ ụzọ. Ndị ọbụ abụ bụ Heman, Asaf, na Itan ga-eti ogene bronz; Zekaraia, Aziel, Shemiramọt, Jehaiel, Uni, Elaiab, Maaseia, na Benaia ga-akpọ une dịka Alamọt si dị; ^a Matitaia, Elifelehu, Miknaia, Obed-Edọm, Jeiel, na Azazaia ga-eji ụbọ akwara na-edu dịka Sheminit si dị. ^b Kenanaia, onyeisi ndị Livaị, bụ onye nlekọta ịbụ abụ; ọ na-eduzi egwu nʼihi na ọ bụ onye nwere nkà. Berekaia na Elkena ga-abụ ndị nche ọnụ ụzọ maka igbe ahụ. Shebanaia, Joshafat, Netanel, Amasai, Zekaraia, Benaia, na Elieza, bụ ndị nchụaja, ga-afụ opi nʼihu igbe Nna anyị; Obed-Edọm na Jehaia bụ ndị nche ọnụ ụzọ maka igbe ahụ.

Devid, ndị okenye Izrel, na ndịisi agha na-achị ọtụtụ puku mmadụ, jiri ọṅụ gaa ibulite igbe ọgbụgba ndụ Nna anyị site nʼụlọ Obed-Edọm. Nʼihi na Nna anyị nyeere ndị Livaị bụ ndị na-ebu igbe ọgbụgba ndụ Nna anyị aka, ha chụrụ ehi oke asaa na ebule asaa nʼaja. Devid yi uwe mwụda e ji ezi akwa ọcha dụọ, otu a kwa ka ndị Livaị niile na-ebu igbe ahụ, ndị ọbụ abụ, na Kenanaia onyeisi ịbụ abụ meekwara; Devid yikwara efọd e ji akwa ọcha dụọ. Izrel niile ji mkpu ọṅụ, ụda opi mpi, opi, na ogene, na-akpọ une na ụbọ akwara, bulite igbe ọgbụgba ndụ Nna anyị.

Ka igbe ọgbụgba ndụ Nna anyị na-abanye nʼobodo Devid, Maịkal nwa Sọl nwanyị sitere na windo lee anya. Mgbe ọ hụrụ eze Devid ka ọ na-agba egwu na-aṅụrị ọṅụ, ọ ledara ya anya nʼobi ya.