Ithumwui Avāwui oko mashunga ngarān kaji
Kharewui kasāli mi akha khiwui vang thikahai kaji theilaga Davidna kalatda sāsa: Ishavāwui ningkhami oko chi Levinaobingmāna, athumwui shakhaili phungphalungra. Hina chi kapi athishurda, laa kasābing kala laakhanobing eina sāhaowa, kala Davidna pheichak sai — Michalna charfa eina yangshokda ali yangkharinga.
15 1Davidna Davidwui keinungli akhalattawui vang shim sai, ithumwui Avāwui okowui vang apam akha ngarānda, chiwui vang kachonshim akha khonkhui. 2Chiwui thili Davidna hānga, "Levinaobing māngna ithumwui Avāwui oko phungzatra, kaja ithumwui Avāna awui oko phungmi khavai kala mashimānda ali otram ngatha̱mi khavai athumli kapangkhui."
3Davidna ithumwui Avāwui oko chi ngarān kahai apamli akhui khavai Israel saikorali Jerusalemli kazipkhui. 4Ana Aaronwui naotunbing kala Levinaobing kazipkhuisera: 5Kohathwui naomayarabingwui eina, kathāna Uriel, kala ali ngasoda awui theisābing shākha maga̱; 6Merariwui naomayarabingwui eina, kathāna Asaiah, kala ali ngasoda awui theisābing shākhani maga̱; 7Gershomwui naomayarabingwui eina, kathāna Joel, kala ali ngasoda awui theisābing shākha thumrā; 8Elizaphanwui naomayarabingwui eina, kathāna Shemaiah, kala ali ngasoda awui theisābing shākhani; 9Hebronwui naomayarabingwui eina, kathāna Eliel, kala ali ngasoda awui theisābing hangchishat; 10Uzzielwui naomayarabingwui eina, kathāna Amminadab, kala ali ngasoda awui theisābing shākha tharāda khani.
11Davidna pāngmon Zadok eina Abiathar, kala Levinaobing Uriel, Asaiah, Joel, Shemaiah, Eliel, kala Amminadabli hokhui. 12Ana athumli hānga, "Nathum Leviwui shimkhurwui wungva̱bingna. Ina chiwui vang ngarān kahai apamli ithumwui Avāwui oko akhui khavai, nathum khalatta kala nathumwui theisābing tharmathenglu. 13Nathumna khare atamli chi maphungrarwui vang, ithumwui Avāwui malungkhavāt ithumtungli heitāhaowa, kaja ithumna ali mashunga maphāmana."
14Chieina pāngmonbing kala Levinaobingna ithumwui Avāwui oko akhui khavai athum khalatta tharchigata. 15Levinaobingna ithumwui Avāwui tui eina Mosesna kaso kahai athishurda, ithumwui Avāwui oko chi thingphānla athumwui yartuili phunga.
16Davidna Levinaobingwui akhokabingli, athumwui theisābing chi laa kasā sāda phākhuida, lyre, tingteilā kala kortar singlaga khamathānna akhon khāngkhui khavai hānga. 17Chieina Levinaobingna Joelwui naomayara Heman, awui theisā Berechiahwui naomayara Asaph, kala athumwui theisā Merarinaobingwui eina Kushaiahwui naomayara Ethan kapangkhui. 18Kala athumli ngasoda, athumwui achinā ngarā kakhanebing: Zechariah, Jahaziel, Shemiramoth, Jehiel, Unni, Eliab, Benaiah, Ma-aseiah, Mattithiah, Eliphelehu, Mikneiah, Obed-edom, kala Je-iel, ngavei khamayonbing. 19Laa kasābing Heman, Asaph, kala Ethanna pithraiwui kortar singkhavai sai; 20Zechariah, Aziel, Shemiramoth, Jehiel, Unni, Eliab, Ma-aseiah, kala Benaiahna Alamoth athishurda tingteilā singkhavai sai; a a v20 Alamoth hi laa sāwui atam akhana sai, akhon kazing chi shichin khavaina thada. 21kala Mattithiah, Eliphelehu, Mikneiah, Obed-edom, kala Je-iel, kala Azaziah, athumna Sheminith athishurda lyre eina thānkhavai sai. b b v21 Sheminith (chiya 'kachishat') hi laa sāwui atam akhana sai, akhon teo chi shichin khavaina thada. 22Levinaobingwui kathāna Chenaniahna laa sāwui akhoka sai; ana laa chi thānmi, kaja a themkathema kajina. 23Berechiah kala Elkanahna oko chiwui ngavei khamayon sākhavai sai. 24Shebaniah, Joshaphat, Nethanel, kala Amasai, Zechariah, Benaiah, kala Eliezer, pāngmonbingna ithumwui Avāwui oko ngalemli talla̱ khongkhavai sai; Obed-edom kala Jehiahna oko chiwui ngavei khamayon sai.
25David, Israelwui khararnaobing, kala thingthingwui raithānabingna, ithumwui Avāwui tuingashit oko chi Obed-edomwui shimwui eina mathānthup eina khuiung khavai unga. 26Ithumwui Avāna tuingashit oko kaphunga Levinaobingli ngachonmi kajiwui vang, athumna mukvā shini kala yaovā shini pha̱phayai. 27Davidna khamanaka kachon katuma phahon ngavai, oko kaphunga Levinaobing saikorala, laa kasābingla, kala laa sāwui wungva̱ Chenaniahla chithāda ngavai; Davidla khamanaka ephod ngavai. 28Israel saikorana ringkaphākhon, angajikhon, talla̱, kala kortar eina ngasoda, tingteilā kala lyre singda ithumwui Avāwui tuingashit oko chi khuiunga.
29Ithumwui Avāwui tuingashit oko chi Davidwui keinungli ungkashung tharan, Saulwui naongalāva̱ Michalna charfa eina yangshoka. Awunga Davidna pheichak kasā kala phāshak phazā chi theida, awui ningli yangkharinglākhaowa.
