1 ዜና መዋዕል 14

14 ¹የጢሮስ ንጉሥ ኪራም፣ ቤት ይሠራለት ዘንድ የዝግባ ግንዶችን፣ ግንበኞችንና ጠራቢዎችን ይዘው የሚሄዱ መልእክተኞችን ወደ ዳዊት ላከ። ²ዳዊትም አባታችን በእስራኤል ላይ እንዳነገሠው ዐወቀ፤ ይህም መንግሥቱ ስለ ሕዝቡ ስለ እስራኤል ከፍ ከፍ ተደርጎ ነበርና።

³ዳዊትም በኢየሩሳሌም ሌሎች ሚስቶችን አገባ፤ ሌሎች ወንዶችና ሴቶች ልጆችንም ወለደ። ⁴በኢየሩሳሌም የተወለዱለት ልጆች ስሞች እነዚህ ናቸው፤ ሳሙአ፣ ሶባብ፣ ናታን፣ ሰሎሞን፣ ⁵ይብሐር፣ ኤሊሱዓ፣ ኤልጲሌጥ፣ ⁶ኖጋ፣ ኔፌግ፣ ያፊዓ፣ ⁷ኤሊሳማ፣ ብዔልያዳ፣ ኤሊፈሌጥ።

አባታችን ፍልስጥኤማውያንን ሰብሮ ገባ

⁸ፍልስጥኤማውያንም ዳዊት በመላው እስራኤል ላይ ንጉሥ ሆኖ መቀባቱን በሰሙ ጊዜ፣ ሁሉም ዳዊትን ፍለጋ ወጡ፤ ዳዊትም ሰምቶ ሊገጥማቸው ወጣ። ⁹ፍልስጥኤማውያንም መጥተው የራፋይምን ሸለቆ ወረሩ።

¹⁰ዳዊትም አባታችንን፣ “በፍልስጥኤማውያን ላይ ልውጣን? በእጄስ አሳልፈህ ትሰጠኛለህን?” ብሎ ጠየቀ። አባታችንም፣ “ውጣ፤ በእጅህም አሳልፌ እሰጥሃለሁ” አለው።

¹¹ወደ በኣል ፋራፂም ወጡ፤ ዳዊትም በዚያ መታቸው። ዳዊትም፣ “አባታችን እንደሚገነፍል ጎርፍ ጠላቶቼን በእጄ ሰበራቸው” አለ። ስለዚህ ያንን ቦታ በኣል ፋራፂም ብለው ሰየሙት። ^a a v11 በኣል ፋራፂም ማለት “ሰብሮ የሚገባ ጌታ” ማለት ነው። ¹²ፍልስጥኤማውያንም አማልክቶቻቸውን በዚያ ጥለው ሄዱ፤ ዳዊትም አዘዘ፤ በእሳትም ተቃጠሉ።

¹³ፍልስጥኤማውያንም እንደ ገና ሸለቆውን ወረሩ።

¹⁴ዳዊትም እንደ ገና አባታችንን ጠየቀ፤ አባታችንም እንዲህ አለ፤ “ተከትለሃቸው አትውጣ፤ ከበውም ከባልሳን ዛፎች ትይዩ ድረስባቸው። ¹⁵በባልሳን ዛፎች ጫፍ ላይ የሰልፍ ኮቴ ድምፅ በሰማህ ጊዜ፣ ለጦርነት ውጣ፤ የፍልስጥኤማውያንን ሰራዊት ሊመታ አባትህ ቀድሞህ ወጥቶአልና።”

¹⁶ዳዊትም አባታችን እንዳዘዘው አደረገ፤ የፍልስጥኤማውያንንም ሰራዊት ከገባዖን እስከ ጌዝር ድረስ መቱ። ¹⁷የዳዊትም ዝና በየአገሩ ሁሉ ተስፋፋ፤ አባታችንም አሕዛብን ሁሉ በእርሱ እንዲፈሩ አደረገ።