1ይ ዜና 14 FHB Father's Heart Bible™

14 ¹ኪራም ንጉስ ጢሮስ ድማ ንዳዊት ልኡኻት፥ ኦም ፅሕድን ወቐርቲ እምንን ፀረብትን፥ ቤት ክሰርሑሉ ሰደደሉ። ²ዳዊት ድማ ኣቦና ኣብ ልዕሊ እስራኤል ንጉስ ከም ዝገበሮ ፈለጠ፤ ምእንቲ ህዝቡ እስራኤል መንግስቱ ልዕል ኢላ ስለ ዝተለዓለት።

³ዳዊት ድማ ኣብ ኢየሩሳሌም ካልኦት ኣንስቲ ወሰደ፤ ካልኦት ኣወዳትን ኣጓላትን ከዓ ወለደ። ⁴ስም እቶም ኣብ ኢየሩሳሌም ዝተወለዱ ደቁ ድማ እዚኣቶም እዮም፦ ሳሙስ፥ ሶባብ፥ ናታን፥ ሰሎሞን፥ ⁵ኢያቤሓር፥ ኤሊሱዔ፥ ኤልጴሌጥ፥ ⁶ኖጋ፥ ናፌቅ፥ ያፍያ፥ ⁷ኤሊሳማ፥ ብዓልያዳ፥ ኤሊፋላት እዮም።

ኣቦና ንፍልስጥኤማውያን የፍርስ

⁸ፍልስጥኤማውያን ድማ ዳዊት ኣብ ልዕሊ ዅሉ እስራኤል ንጉስ ኮይኑ ኸም ዝተቐብአ ምስ ሰምዑ፥ ኵሎም ንዳዊት ክደልዩ ደዪቦም ወፁ። ዳዊት ከዓ ሰሚዑ ክገጥሞም ወፀ። ⁹ፍልስጥኤማውያን ከዓ መፂኦም ንለሰ ራፋይም ወረርዎ።

¹⁰ዳዊት ድማ ንኣቦና “ናብ ፍልስጥኤማውያን ክድይብዶ? ኣብ ኢደይከ ኣሕሊፍካ ትህበኒ?” ኢሉ ጠየቐ። ኣቦና ኸዓ “ደይብ፤ ኣብ ኢድካ ኸኣሕልፎም እየ” በሎ።

¹¹ናብ በኣልፐራሲም ድማ ደዪቦም፤ ዳዊት ከዓ ኣብኣ ወቕዖም። ዳዊት ድማ “ማይ ከም ዘፍርስ፥ ኣቦና ንፀላእተይ ብኢደይ ኣፍረሶም” በለ። ስለዙይ ድማ ነታ ቦታ በኣልፐራሲም ኢሎም ሰመይዋ። ^a a v11 በኣልፐራሲም ማለት “እቲ ዘፍርስ ጐይታ” ማለት እዩ። ¹²ፍልስጥኤማውያን ድማ ኣማልኽቶም ኣብኡ ሓደጉ፤ ዳዊት ከዓ ኣዘዘ እሞ ብሓዊ ኣንደድዎም።

¹³ፍልስጥኤማውያን ከዓ ንኻልኣይ ጊዜ ነቲ ለሰ ወረርዎ።

¹⁴ዳዊት ድማ መሊሱ ንኣቦና ጠየቐ፤ ኣቦና ኸዓ ከምዙይ በሎ፦ “ደድሕሪኦም ኣይትደይብ። ዘይርካ ብድሕሪኦም ኪዶም፤ ብመንፅር እቲ ሳጋሉ ተጋጠሞም። ¹⁵ኣብ ርእሲ እቲ ሳጋሉ ድምፂ ሰልፊ ምስ ሰማዕኻ፥ ሽዑ ናብ ውግእ ውፃእ፤ ኣቦኻ ንሰራዊት ፍልስጥኤማውያን ክወቕዖም ቅድሜኻ ወፂኡ እዩ እሞ።”

¹⁶ዳዊት ከዓ ኸምቲ ኣቦና ዝኣዘዞ ገበረ፤ ንሰራዊት ፍልስጥኤማውያንውን ካብ ገባዖን ክሳዕ ጌዘር ወቕዕዎም። ¹⁷ዝና ዳዊት ድማ ናብ ኵለን ሃገራት ተዘርግሐ፤ ኣቦና ኸዓ ፍርሃቱ ኣብ ኵሎም ኣህዛብ ኣውደቐ።