1 IZikhronike 14

14 ¹UHiramu inkosi yaseThire wathumela izithunywa kuDavide, kanye nezingodo zomsedari, ababazi bamatshe, nababazi bezingodo, ukuze bamakhele indlu. ²UDavide wazi ukuthi uBaba wethu wayemenze inkosi phezu kuka-Israyeli, ngokuba umbuso wakhe waphakanyiselwa phezulu ngenxa yabantu bakhe u-Israyeli.

³UDavide wathatha abanye abafazi eJerusalema, wazala namanye amadodana namadodakazi. ⁴Yilawa amagama abantwana abazalelwa yena eJerusalema: uShamuwa, uShobabi, uNathani, noSolomoni, ⁵u-Ibhari, u-Elishuwa, u-Elpeleti, ⁶uNoga, uNefegi, uJafiya, ⁷u-Elishama, uBheeliyada, no-Elifeleti.

UBaba wethu ufohlela amaFilisti

⁸Kwathi amaFilisti esezwile ukuthi uDavide ugcotshiwe waba yinkosi phezu kuka-Israyeli wonke, bonke benyukela ukuyofuna uDavide. UDavide wezwa, waphuma ukuyobhekana nabo. ⁹AmaFilisti ayesefikile ahlasela isiGodi saseRefayimi.

¹⁰UDavide wabuza kuBaba wethu, wathi: “Ngikhuphukele yini amaFilisti? Uzawanikela yini esandleni sami?” UBaba wethu wathi kuye: “Khuphuka, ngizawanikela esandleni sakho.”

¹¹Benyukela eBhali Pherasimi; uDavide wawabulala khona. UDavide wathi: “UBaba wethu ufohlele izitha zami ngesandla sami njengokufohla kwesikhukhula samanzi.” Ngakho leyo ndawo bayiqamba ngokuthi iBhali Pherasimi. ^a a v11 IBhali Pherasimi lisho ukuthi “iNkosi efohlayo.” ¹²AmaFilisti ashiya onkulunkulu bawo khona, uDavide wakhipha umyalo, bashiswa ngomlilo.

¹³AmaFilisti aphinda futhi ahlasela isiGodi.

¹⁴UDavide waphinda wabuza kuBaba wethu, uBaba wethu wathi: “Ungakhuphuki ubalandele. Bazungeze, ubahlasele uvela maqondana nezihlahla zebhalsamu. ¹⁵Kuyothi lapho uzwa umsindo wokuhamba ezihlokweni zezihlahla zebhalsamu, ube usuphuma uyokulwa—ngokuba uYihlo usephumile phambi kwakho ukuyobulala impi yamaFilisti.”

¹⁶UDavide wenza njengokuba uBaba wethu wayemyalile, bayibulala impi yamaFilisti kusukela eGibeyoni kuze kufike eGezeri. ¹⁷Udumo lukaDavide lwanda emazweni onke, uBaba wethu wenza ukuba zonke izizwe zimesabe.