Kuyamba kwa batu basasu
Bana bisi tina ba Mowabi bisi vevuka hanga zamba dyamwangana, amana bázimbulwa bakota mu tsya kivula kya Siyoni, yi kiti kya luyalu kya lungongu lwa bulunda kyalambulwa. Kaasi lulendu lwa Mowabi lwenina kuditsikisa kwa phamba, amana bu kalomba hana kifulu kya zulu, kalendaku kununga. Tata wetu wázonza; kaasi mbikudi wisi dila.
Tata wetu kisi zonza mu vese 14
16 1Tumenu bana ba mikoku kwena pfumu wa tsi, tuka ku Sela mu nzila ya tseki, ku mongu wa mwana wa ndumba wa Siyoni. 2Hanga banuni bana bisi tina, hanga zamba dyámwangana, bwabuna bena bana ba bakhetu ba Mowabi ku masabukulu ma Alinoni. 3Hekenu dibanza; zengenu mukanu; khitulenu kivula kyenu hanga phipha mu tsinzi ya tangwa. Swekenu batu bana bámwangana; luyekulaku mutu wuna wisi tina. 4Yambula batu bama bámwangana bazingila ha kati dya ngeyi, Mowabi; wukala wuna wisi bayamba kikuma kya wanzyo muzangi. Tangwa munyokudi kakala hika ku, amana kuzangana kumanisa, amana batu bana bisi nika bamana tota mu tsi, 5buna kiti kya luyalu kyakála kitungamana mu lungongu lwa bulunda, amana hana thandu kyandi mutu kazakala mu lukwikilu, muna sombolu dya Tavidi, mutu wuna wisi fundisa amana wisi sanda mukanu amana wisi tyakula mu kuhanga masonga. 6Twáyuka lulendu lwa Mowabi—buna kenina yi lulendu lwa lawu—bukamvi bwandi, lulendu lwandi, yi nganzi yandi; kuditsikisa kwandi kwenina kwa phamba. 7Buna, yambula Mowabi kakolaluka kikuma kya Mowabi; yambula kosu mutu kakolaluka. Syenu khondu, mu buwayi bwa lawu, kikuma kya mapha ma mbutu mya vinu ma Kili-Haleseti. 8Mukuma bilanga bya Esiboni bisi yuma, amana vinu dya Sibima; bapfumu ba makanda bábula mihandi myandi mya mboti, mina myábwana tii ku Yazeli amana myázimbala mu tseki; mimvuka myandi myámwangana amana myásabuka yanga dya mbuta. 9Buna, yisidila ni bidilu bya Yazeli kikuma kya vinu dya Sibima; yisikubwisa matsanga mama, Esiboni yi Eleyale, mukuma hana thandu ya mbutu yenu ya tsungi yi hana kuheka kwenu, miboku mya kunwana myábwa. 10Kyesi yi tsambu byákatulwa muna bilanga bya mbutu, amana muna bilanga bya vinu ka mikunga ku myayimbwa, ka miboku mya kyesi ku myayedikwa. Ka mutu ku wanika vinu muna masina; yámanisa miboku. 11Buna, mbundu yama yisikunga hanga ngoma ya misinga kikuma kya Mowabi, mu kati dyama kikuma kya Kili-Helesi. a a v11 Mbundu ya Tata wetu yisikunga, ata kikuma kya Mowabi — buwayi bwandi bubwana kwena kosu kanda kina pfundusu yandi yisimba. 12Amana muna tangwa Mowabi kadisonga, tangwa kadilembisa hana buangu bwa kuleya, amana kakwisa muna kikumbu kyandi mu kusambila, kanungaku. b b v12 «Buangu bwazangama» bwákala kikumbu kya hana mongu kina basadila mu kusambila banzambi ba luvunu yi mu kutambika makabu.
13Yayi yenina ndinga yina Tata wetu kázimbula kikuma kya Mowabi muna makula máhita.
14Kaasi buthwena, Tata wetu wázimbula: «Muna mvula tatu, hanga mvula za musadi wa mbongu, khembu ya Mowabi bakála lewula, ata ni batu bandi bavudi; amana ndambu yina yásala yikála yakeya yi yalebakana.»
