Aritoktem asoshi Akhüm
Moab ajenertemi prokshia tesep ozü ama milendaba, aser Zion akhüm nung akhümtsü ta mela, temeim yimlibilem chuba menden ka agitsü. Saka Moab asükümbaji amajok tushi lir, aser pa puthang nung pei tenlaji manoktaktsü. Asen Tebu o shiogo; saka ainkarji la asoshi jeb.
16 1San chanutemji lima obendangba dang, Sela nungi arem lenmang agi, Zion jala tenem dangi yokang. 2Milendaba ozütem ama, prokshia tesep ama, yamaji Moab jalatem Arnon tzütendak nung lir. 3Tebilemba shiang; mang yangang; anjongmeshi tiyong nung ne akhüm aonung ama inyakang. Aritoktem miima inyakang; ajener mashioktsüla. 4Moab, kü aritoktem ne rongnung alidakjang; tesamatsüba nungi parnok asoshi akhüm aliang. Rishikangshiba mali külen, aser tesamatsü azünga adokogo, aser pungchitem lima nungi pilaogo, 5Idangji temeim yimlibilem nung chuba menden ka yanglutsü, aser shibai o bendangba, ochi bushiba, aser temeshiba karaa inyaker, Dawid tentet nung temulung alemba nung iba nung amentsü. 6Onoki Moab asükümba angashiogo—pa kanga asüküm—pa mezümeküm, pa asükümba, aser pa rasa; pa külaka benshibaji amajok lir. 7Anungji Moab Moab asoshi ola adoka jebang; ajak jebang. Kir-hareset kismis amtsüktem asoshi, kanga azük, mang yimang. 8Kechiaser Heshbon alutem azülar, aser Sibma tsükmenatzü dong; kintem obendangertemi Yazer tashi amak pei tajungtiba kongsangtem raraogo, aser arem nung nemzüya; pei tepentem sünga anen, aser tzüyim ajang. 9Anungji ni Yazer ajeb den Sibma tsükmenatzü dong asoshi jebtsü; Heshbon aser Eleale, nai kü nüktzü agi nenok shitoktsü, kechiaser ne mei süngjang aser ne aluruwa madang tongbang ola mechioogo. 10Tejang jenti moapu nungi tepela aser mulung achiba bener oadokogo, aser tsükmenatzü lu nung ken matener, tepela ola magütsü. Yi pungchidak nung nisung kati yi mapungchitsü; nai ayimtenba süitemogo. 11Anungji kü mulung Moab asoshi kongki ama ola adoker, kü tiyongi Kir-heres asoshi ola adoker. a a v11 Asen Tebu mulungi Moab madangbo ola adoker—pa obendangi pareba nisung shia dang pa tejashi amaker. 12Aser kodang Moab pa tashi sayua tenem talang nung lula-a akümer, aser sarasademtsü asoshi pa tekülemdak dangi arudir, pa mangutsü. b b v12 ‘Tenem talang’ aji süngyanglu külemtsü aser tenla agütsütsü asoshi mapa inyaker tenem kolak tekülemdak ka liasü.
13Iba asen Tebui alemli nung Moab indang jembiba o lir.
14Saka tang asen Tebui ashiogo, “Ayanger küm ama, küm asem nung, pa nisung jenti ajak liaka, Moab sentsüwangshiji sensatsütsü; aser tanüngbatem kanga ishika aser tejang kecha alitsü.”