Khedai diya manuh khan nimite thaka jaga
Moab laga bhagi thaka manuh khan bhangi jowa basa nisina urai ase aru taikhan ke Zion laga chaya tolte lukibole koise, aru ekta asol morom laga singhason dikhai dise. Kintu Moab laga ghomand khali phutani ase, aru uncha jagah te tai laga prarthana kaam nakoribo. Amar Pitri koi dise; tinu bhi bhabobadi kandi ase.
16 1Desh laga raja ke mer bacha khan pathai dibi, Sela pora jongol laga rasta hoi kene, Zion laga chukri laga pahar te. 2Uri thaka chiriya khan nisena, sarikena thaka basa nisena, Moab laga chukri khan Arnon laga pani paar jaga te eneka ase. 3Salla dibi; niyai dibi; dinmaan laga somoi te tumar chaya ke rati nisena bonabi. Khedai diya khan ke lukai dibi; polai juwa khan ke thogai nadibi. 4Moab, moi laga khedai diya khan ke tumar logot te thakibo dibi; nosto kora manuh pora tarkhan nimite ekta lukai thaka jaga hobi. Jitia julum kora manuh aru nathakibo, aru nosto kora kaam bondh hoi jabo, aru theni kora khan desh pora harai jabo, 5titia ekta singhason vachan laga morom te khara kori dibo, aru etu uporte David laga tombu te biswas pora ekjon bohibo, kun pora niyai koribo aru niyai bisaribo aru dharmikota kori bole joldi koribo. 6Amikhan Moab laga phutani laga kotha huni loise—tai kiman bisi phutani kore—tai laga ghamondi, tai laga phutani, aru tai laga khong; tai laga dangor kotha khan eku nohoi. 7Etu nimite Moab bilap koribi Moab nimite; sob manuh bilap koribi. Kir-hareseth laga angur pitha khan nimite, bisi dukh pora bhangikena, mon dukh koribi. 8Kilemane Heshbon laga kheti khan sukhi jaise, aru Sibmah laga angur gos bhi; desh khan laga raja khan pora etu laga bhal daal khan ke kati phelaise, kun tu Jazer tak punchi jaise aru jongol te phailikena jaise; etu laga notun daal khan phailikena samundar paar kori jaise. 9Etu nimite Moi Jazer laga kanda nisena Sibmah laga angur gos nimite kandi ase; Heshbon aru Elealeh, Moi moi laga suli pani pora tumikhan ke bhijai dibo, kilemane tumar gorom din laga phol aru tumar kheti kata uporte lorai laga hala giri porise. 10Khushi aru anond phol dhora kheti pora loi loise, aru angur bagan khan te eku git naga, eku khushi laga awaj nutha. Kun bhi angur chipa jaga te angur rosh nachipai; Moi hala tu bondh kori dise. 11Etu nimite moi laga mon Moab nimite bina nisena kanda awaj kore, moi laga bhitor laga pura mon Kir-heres nimite. a a v11 Amar Pitri laga mon Moab uporte bhi dukh pora kanda awaj kore — Tar laga bisar kun manuh khan ke chubo, etu sob manuh tak Tar dukh punche. 12Aru jitia Moab nijor ke anibo, jitia tai uchha jaga te nijor ke tirai dibo aru prathana koribole tai laga mondir te ahhibo, tai eku jiti naparibo. b b v12 Ekta 'uchha jaga' tu pahar uporte thaka ekta puja ghor asele, kun tu misa devta khan ke puja kora aru bolidan dibole cholai thakise.
13Eitu amar Pitri pora age te Moab laga biste koi diya kotha ase.
14Kintu etiya amar Pitri koise, “Tinta saal pichete, kaam kora nokor laga saal nisena, Moab laga mahima tu heen koribo, tai laga bisi dangor sonkha thakile bhi; aru bachi juwa khan bisi komti aru komjur hobo.”