ሮሜ 14 FHB Father's Heart Bible™

14 ¹ነቲ ብእምነት ዝደኸመ ሕዚ ተቐበልዎ፤ ብዛዕባ ሓሳቡ ግና ኣይትበኣስዎ። ²ሓደ ሰብ ኵሉ ኽበልዕ እምነት ኣለዎ፤ እቲ ዝደኸመ ግና ኣሕምልቲ ጥራሕ ይበልዕ። ³እቲ ዝበልዕ ነቲ ዘይበልዕ ኣይንዓቖ፤ እቲ ዘይበልዕ ድማ ነቲ ዝበልዕ ኣይፍረዶ፤ ኣቦና ተቐቢልዎ እዩ እሞ። ⁴ንስኻ ነቲ ናይ ካልእ ሰብ ኣገልጋሊ እትፈርድ መን ኢኻ? ኣብ ቅድሚ ጐይታኡ ደው ይብል ወይ ይወድቕ፤ ደው ክብል ድማ እዩ፤ ጐይታ ደው ከብሎ ይኽእል እዩ እሞ።

⁵ሓደ ንሓንቲ መዓልቲ ኻብ ካልእ ኣብሊፁ ይፈርድ፤ ካልእ ድማ ንዅላ መዓልቲ ማዕረ ይፈርድ። ነፍሲ ወከፍ ኣብ ሓሳቡ ብምሉእ ይረጋገፅ። ⁶እቲ ነታ መዓልቲ ዘኽብር ንጐይታ ኢሉ የኽብራ። እቲ ዝበልዕ ንኣቦና የመስግን እዩ እሞ፥ ንጐይታ ኢሉ ይበልዕ፤ እቲ ዘይበልዕ ድማ ንጐይታ ኢሉ ኣይበልዕን፥ ንኣቦና ኸዓ የመስግን። ⁷ካባና ሓደ እኳ ንርእሱ ዝነብር የለን፤ ካባና ሓደ እኳ ንርእሱ ዝመውት የለን። ⁸እንተ ነበርና፥ ንጐይታ ኢና እንነብር፤ እንተ ሞትና ድማ ንጐይታ ኢና እንመውት። ነበርና ሞትና፥ ናይ ጐይታ ኢና። ⁹ክርስቶስ ናይ ምውታንን ናይ ህያዋንን ጐይታ ክኸውን፥ ምእንቲ እዙይ ሞተ፥ ከም ብሓድሽ ከዓ ህያው ኮነ።

¹⁰ንስኻ ግና ስለ ምንታይ ንሓውካ ትፈርዶ? ንስኻኸ ስለ ምንታይ ንሓውካ ትንዕቖ? ኵላትና ኣብ ቅድሚ መንበር ፍርዲ ኣቦና ደው ክንብል ኢና እሞ።

¹¹ከምዙይ ዝብል ተፅሒፉ ኣሎ እሞ፦ “ኣነ ህያው ኮይነ ከም ዘለኹ፥ ኵሉ ብርኪ ንኣይ ክሰግድ፥ ኵሉ ልሳን ድማ ንኣይ ክእመን እዩ፥ ይብል ኣቦና።”

¹²እምበኣር ነፍሲ ወከፍና ብዛዕባ ርእሱ ንኣቦና ፀብፃብ ክህብ እዩ።

¹³እምበኣር ንሓድሕድኩም ምፍራድ ኣቋርፁ። ኣብ ክንድኡ ኣብ ቅድሚ ሓውኩም መዐንቀፊ ወይ መፈንጠር ከይተንብሩ ወስኑ። ¹⁴ብጐይታ ኢየሱስ ተረዲአ፥ ሓደ ነገር እኳ ብባዕሉ ርኹስ ከም ዘይኮነ እፈልጥ ኣለኹ፤ ነቲ ርኹስ እዩ ኢሉ ዝሓስቦ ግና፥ ንእኡ ርኹስ እዩ። ¹⁵ብሰንኪ ብልዒ ሓውካ እንተ ተጐድአ፥ ደጊም ብፍቕሪ ኣይትኸይድን ኣለኻ። በቲ ብልዒኻ ነቲ ክርስቶስ ዝሞተሉ ሰብ ኣይተጥፍኣዮ። ¹⁶እምበኣር እቲ ንስኻትኩም ፅቡቕ ኢልኩም እትርእይዎ፥ ክፉእ ኮይኑ ከይዝረበሉ። ¹⁷መንግስቲ ኣቦና ፅድቅን ሰላምን ኣብ መንፈስ ቅዱስ ዝኾነ ሓጐስን ደኣ እምበር፥ ምብላዕን ምስታይን ኣይኮነን። ^a a v17 ጳውሎስ ነታ መንግስቲ ከምዙይ ይገልፃ፦ ብዛዕባ ምብላዕን ምስታይን ዝኾነ ሕጊ ዘይኮነት፥ ፅድቅን ዓሚቕ ሰላምን መንፈሱ ዘፍርዮ ሓጐስን ደኣ እያ። ¹⁸እቲ ከምዙይ ጌሩ ንክርስቶስ ዘገልግል፥ ንኣቦና ባህ የብሎ፥ ኣብ ሰብ ድማ ቅቡል እዩ። ¹⁹እምበኣር ንሰላም ዘምፅእን ንሓድሕድና ዝሃንፀናን ነገር ንስዓብ። ²⁰ምእንቲ ብልዒ ኢልካ ናይ ኣቦና ስራሕ ኣይተጥፍእ። ኵሉ ነገር ንፁህ እዩ፤ ግና እቲ ንሰብ ዘዕንቅፍ ብልዒ ክፉእ እዩ። ²¹ስጋ ዘይምብላዕ፥ ወይኒ ዘይምስታይ፥ ወይ ንሓውካ ዘዕንቅፍ ነገር ዘይምግባር ፅቡቕ እዩ።

²²እታ ዘላትካ እምነት ኣብ ቅድሚ ኣቦና ንርእስኻ ሓዛ። እቲ በቲ ዝቕበሎ ነገር ንርእሱ ዘይፈርድ ሰብ ብፁእ እዩ። ²³እቲ ዝተጠራጠረ ግና እንተ በልዐ፥ ካብ እምነት ስለ ዘይኮነ፥ ተፈሪድዎ እዩ፤ ካብ እምነት ዘይኮነ ኵሉ ነገር ድማ ሓጢኣት እዩ።