Romnao 14

14 ¹Ara shitkasangli khangazana chi khuisanglu, kha awui kaphaning chiwui pongli tuingaphun sākhavai maningmana. ²Mi akhana ot saikora shai khavai shitkasang lei, kha khangazana chi hanthing-hanrā chimāng shai. ³Kashaiya china mashaiya chili ningkachai khavai maningmana, kala mashaiya china kashaiya chili bichar sākhavai maningmana, kaja ithumwui Avāna ali khuisanghaira. ⁴Na khipāda kateiwui raoli bichar sākhala? Awui khalattawui akhavā miktāli a nganinga lah kongluira; kha a nganingra, kaja Prohona ali nganing ngasak shapra.

⁵Mi akhana zimiksho akhali khangatei zimikshowuitungli reimeida phaninga; khangatei akhana zimiksho saikora tākam eina phaninga. Mi kachiva̱ khalattawui ningli mikhavai shitsangchao phalungra. ⁶Zimiksho chi kamayon a china Prohowui vang mayonna. Kashaiya china Prohowui vang shai, kaja ana ithumwui Avāli ningkashi; mashaiya china Prohowui vang mashaimana, kala ithumwui Avāli ningkashi. ⁷Kaja ithumwui ngachaili khipākha khalattawui vang maringmana, kala khipākha khalattawui vang mathimana. ⁸Ithumna ringakha, Prohowui vang ringa; thiakha, Prohowui vang thi. Ringlala thilala, ithum Prohowuina. ⁹Khristana thihaida ringluishita; hi kathebing kala kharingabing khanini chiwui Proho sākhavaina.

¹⁰Kha na, khi sāda nachināli bichar sākhala? Lah na, khi sāda nachināli ningkachaikhala? Ithum saikora ithumwui Avāwui bicharli kānganingserphalungra.

¹¹Hithada kapihaida lei: "I ringlakha eina, da ithumwui Avāna hānga, khukti saikorana ili khorumra, kala male saikorana ili khamayāra."

¹²Chieina, ithumwui ngachai mi kachiva̱na khalattawui vang chi ithumwui Avāli hāngphatphalungra.

¹³Chieina, akha eina akha bichar masāluilu. Chiwui mahutle, nachināwui miktāli phei ngaphok khavai lah khalen chi katang maleingasakluira da khangarān sālu. ¹⁴Ot khikhala khalatta makathar maleimana kaji Proho Jishuwui lungli shitsangchaoda ina thei; kha khipānakha chi makathar da phaninga a chili chiya makatharna. ¹⁵Kashakazāna nachināli ningkhanang ngasakakha, nava leikashi eina zatluimana. Khristana awui vang thihaikahai mi chi nawui kashakazāna sāshimānhaialu. ¹⁶Chieina, nathumna kaphā da phaning kahai chi makaphā da mahāng ngasakalu. ¹⁷Ithumwui Avā wungram hi phāshak phazā maningmana, kha khamashung khangarong, chingri kahai kala Manglā Katharali khamathānna. ^a a v17 Paulna wungram chi latluida hāngchithei: phāshak phazāwui pongli ain lairik maningmana, kha khamashung khangarong, chingri kahai katāmei kala awui Manglāna sākahai khamathānna. ¹⁸Kachikathāna Khristali hithāda otram ngatha̱miakha ithumwui Avāli ningyāng ungngasaka kala mibingna khuisangkapaina. ¹⁹Chiwui vang eina, chingri kahai rāhaimi kala akha eina akha sāsangmi ot chi ithumna kharomsa. ²⁰Kashakazāwui vang eina ithumwui Avāwui ot masākazamhailu. Ot saikora kathara mānga, kha mili phei ngaphok ngasak khavai shaikahai chi khamashung maningmana. ²¹Sā mashaikahai, drakhāra̱ mamangkahai, kala navānaoli phei ngaphok ngasak khavai khipopo masākahai chi kaphā otna.

²²Nawui shitkasang chi ithumwui Avāwui mangāli nakhalatta singtitlu. Akhalatta phai ot eina akhalatta bichar masā a chi sokhamina. ²³Kachikathāna chukmaja̱phā a chi shaiakha yonngasakra, khikhalajila shitkasang eina kharā maningmana; shitkasang eina kharā maningkahai khipopo chi morei otna.