Ku Karɓi Marasa Ƙarfi a Bangaskiya

Wani mai bi yana cin kome, wani kuma ganye kaɗai, kowannensu kuma yana raina ɗayan a ɓoye. Bulus ya ƙi ya yanke abin da za a ci. Kowa yana ba da lissafi ga ubangidansa, Ubanmu kuma ya karɓi su duka biyu, don haka ainihin zunubin shi ne sa abin tuntuɓe a hanyar da ɗan'uwa yake bi.

Babi na 14.

To, ku karɓi wanda yake marar ƙarfi a bangaskiya, amma ba don ku yi gardama a kan ra'ayoyinsa ba. Wani yana da bangaskiyar cin kowane abu, amma wanda yake marar ƙarfi yakan ci ganye kawai. Kada mai ci ya rena wanda ba ya ci, kada kuma wanda ba ya ci ya shar'anta mai ci, gama Ubanmu ya karɓe shi. Kai wane ne da za ka shar'anta bawan wani? A gaban maigidansa ne yake tsayawa ko fāɗuwa. Zai kuwa tsaya, gama Ubangiji yana iya sa shi yă tsaya.

Wani yakan ɗauki wata rana ta fi wata, wani kuma yă ɗauka dukan kwanaki daidai suke. Sai kowa yă tabbata sosai a tunaninsa. Duk wanda yake kiyaye ranar, yana kiyaye ta ne saboda Ubangiji. Duk wanda yake ci, yana ci ne saboda Ubangiji, domin yana gode wa Ubanmu; wanda kuma ba ya ci, ba ya ci ne saboda Ubangiji, yana kuma gode wa Ubanmu. Gama babu wani a cikinmu da yake rayuwa domin kansa, babu kuma wani da yake mutuwa domin kansa. Idan muna da rai, muna rayuwa ne domin Ubangiji; idan kuma muka mutu, mun mutu ne domin Ubangiji. Saboda haka ko muna da rai ko mun mutu, na Ubangiji ne mu. Domin wannan ne Almasihu ya mutu ya kuma sāke tashi da rai, don yă zama Ubangijin matattu da masu rai.

To kai, me ya sa kake shar'anta ɗan'uwanka? Ko kai, me ya sa kake rena ɗan'uwanka? Dukanmu za mu tsaya a gaban kujeran shari'ar Ubanmu.

Gama a rubuce yake, “Muddin ina da rai, in ji Ubanmu, kowace gwiwa za ta durƙusa gare ni, kowane harshe kuma zai shaida ni.”

Saboda haka kowannenmu zai ba da lissafin kansa ga Ubanmu.

Saboda haka bari mu daina shar'anta juna. A maimakon haka, sai ku ƙudura cewa ba za ku taɓa sa dutsen tuntuɓe ko tarko a gaban ɗan'uwanku ba. Na sani, na kuma tabbata a cikin Ubangiji Yesu, cewa babu wani abu da yake marar tsarki a kansa; amma ga wanda yake tsammani abu marar tsarki ne, to a gare shi marar tsarki ne. Idan abinci yana ɓata wa ɗan'uwanka rai, to ba kana tafiya cikin ƙauna ba ke nan. Kada ka hallaka wanda Almasihu ya mutu dominsa saboda abincinka. Saboda haka kada ku bari a kushe abin da kuke ɗauka mai kyau ne. Gama Mulkin Ubanmu ba batun ci da sha ba ne, sai dai batun adalci da salama da farin ciki cikin Ruhu Mai Tsarki. ^a Duk wanda yake bauta wa Almasihu ta wannan hanya, yana faranta wa Ubanmu rai, mutane kuma sun yarda da shi. Saboda haka bari mu nemi duk abin da yake kawo salama da kuma gina juna. Kada ka rushe aikin Ubanmu saboda abinci. Dukan abubuwa masu tsarki ne, amma ba daidai ba ne a ci abin da yake sa wani yă yi tuntuɓe. Abu mai kyau shi ne kada ka ci nama, ko ka sha ruwan inabi, ko ka yi wani abin da zai sa ɗan'uwanka yă yi tuntuɓe.

Bangaskiyar da kake da ita, ka riƙe ta tsakaninka da Ubanmu. Mai albarka ne wanda ba ya shar'anta kansa a kan abin da ya amince da shi. Amma duk wanda yake da shakka, in ya ci, an yanke masa hukunci ke nan, domin bai ci da bangaskiya ba; duk kuma abin da ba daga bangaskiya ba ne, zunubi ne.