Mamkeleni oswele ukholo
Elinye ikholwa lidla nantoni na, elinye lidla imifuno kuphela, elowo edela ngokuzolileyo omnye. UPawulos ala ukugqiba ngokudla. Elowo uphendula enkosini yakhe, uBawo wethu ubamkele bobabini, ngoko isono sokwenene kukubeka isikhubekiso apho kuhamba khona umzalwana.
14 1Ke mamkeleni lowo oswele ukholo, kodwa ningaphikisani naye ngeemvo zakhe. 2Omnye unokholo lokuba adle nantoni na, kanti lowo uswele ukholo udla imifuno kuphela. 3Lowo udlayo makangamdeli lowo ongadliyo, kananjalo lowo ongadliyo makangamgwebi lowo udlayo, kuba uBawo wethu umamkele. 4Ungubani na wena ogweba umkhonzi womnye? Umi okanye uwe phambi kwenkosi yakhe; uya kuma kodwa, kuba iNkosi inako ukummisa.
5Omnye uthi omnye umhla mkhulu kunomnye; omnye uthi yonke imihla iyafana. Elowo makeyiseke ngokupheleleyo engqondweni yakhe. 6Lowo ugcina umhla, uwugcinela iNkosi. Lowo udlayo, udlela iNkosi, kuba ebulela kuBawo wethu; nalowo ongadliyo, akadleli iNkosi, aze abulele kuBawo wethu. 7Kuba akukho namnye kuthi ophilela yena siqu, akukho namnye kuthi ofela yena siqu. 8Ukuba siyaphila, siphilela iNkosi; ukuba siyafa, sifela iNkosi. Nokuba siyaphila, nokuba siyafa, singabeNkosi. 9UKrestu wafa, waza wabuya waphila ngenxa yale nto: ukuze abe yiNkosi yabafileyo nabaphilileyo.
10Ke wena, kungani na ukuba umgwebe umzalwana wakho? Okanye wena, kungani na ukuba umdele umzalwana wakho? Kuba sonke siya kuma phambi kwesihlalo somgwebo sikaBawo wethu.
11Kuba kubhaliwe kwathiwa: “Ndihleli nje, utsho uBawo wethu, onke amadolo aya kuguqa phambi kwam, lonke ulwimi luya kuvuma kum.”
12Ngoko ke, elowo kuthi uya kuziphendulela kuBawo wethu ngaye siqu.
13Ngoko yekani ukugweba omnye komnye. Kunoko gqibani ukuba ningabeki isikhubekiso okanye umgibe phambi komzalwana wenu. 14Ndiyazi, ndeyisekile eNkosini uYesu, ukuba akukho nto iyinqambi ngokwayo; kodwa kulowo uthi iyinqambi, iyinqambi kuye. 15Ukuba ukudla kuyamenzakalisa umzalwana wakho, akusahambi ngothando. Musa ukumtshabalalisa ngokudla kwakho lowo uKrestu wamfelayo. 16Ngoko musani ukuvumela ukuba oko nikuthathela njengokulungileyo kuthethwe ngako njengento embi. 17Ubukumkani bukaBawo wethu abukokudla nokusela, kodwa bubulungisa, noxolo, novuyo olukuMoya oyiNgcwele. a a v17 UPawulos ubuchaza kwakhona ubukumkani: abuluncwadi lwemithetho ngokudla nokusela, kodwa bukukuma ngokufanelekileyo, noxolo olunzulu, novuyo oluveliswa nguMoya wakhe. 18Lowo okhonza uKrestu ngale ndlela uyakholeka kuBawo wethu, akholeke nasebantwini. 19Ngoko ke, masiphuthume oko kuzisa uxolo, nokwakhana komnye nomnye. 20Musa ukutshabalalisa umsebenzi kaBawo wethu ngenxa yokudla. Zonke izinto zihlambulukile, kodwa ukudla okwenza umntu akhubeke kubi. 21Kulungile ukungayidli inyama, ukungaseli iwayini, nokungenzi nantoni na eyenza umzalwana wakho akhubeke.
22Ukholo lwakho lugcine kuwe siqu phambi koBawo wethu. Unoyolo lowo ungazigwebiyo ngoko akwamkelayo. 23Lowo othandabuzayo ugwetyiwe ukuba uyadla, kuba akukho lukholweni; kuba nantoni na engaphumiyo elukholweni sisono.
