ሮሜ 13 FHB Father's Heart Bible™

13 ¹ነፍሲ ወከፍ ነቲ ዝገዝእ ስልጣን ክግዛእ ኣለዎ፤ ብዘይ ካብ ኣቦና ስልጣን የለን እሞ፥ እቶም ዘለዉ ኸዓ ብኣቦና ዝተመደቡ እዮም። ²ስለዙይ ነቲ ስልጣን ዝፃረር፥ ነቲ ኣቦና ዝሰርሖ እዩ ዝፃረር፤ እቲ ዝፃረር ድማ ኣብ ርእሱ ፍርዲ የውርድ። ³ገዛእቲ ነቲ ፅቡቕ ዝገብር ኣየፍርሑን፥ ነቲ ክፉእ ዝገብር ደኣ የፍርሑ። ነቲ ስልጣን ከይትፈርሕዶ ትደሊ? ፅቡቕ ግበር እሞ ካብኡ ውዳሴ ክትረክብ ኢኻ። ⁴ንሱ ፅቡቕ ንኽኾነልካ ኣገልጋሊ ኣቦና እዩ። ክፉእ እንተ ገበርካ ግና ፍራሕ፤ ነቲ ሰይፊ ንኸንቱ ኣይዓጥቕን እዩሞ። ንሱ ኣገልጋሊ ኣቦና፥ ኣብ ልዕሊ እቲ ክፉእ ዝገብር ቍጥዓ ዘውርድ ፈዳዪ እዩ። ⁵ስለዙይ ካብ መቕፃዕቲ ንምህዳም ጥራሕ ዘይኮነስ፥ ምእንቲ ሕሊናኹም ድማ ክትግዝኡ ኣለኩም። ⁶በዝ ምኽንያት እዙይ ከዓ ቐረፅ ትኸፍሉ ኢኹም፤ እቶም ስልጣናት ነዝ ነገር እዙይ ዝተወፈዩ ኣገልገልቲ ኣቦና እዮም እሞ። ⁷ንዅሉ እቲ ዝግብኦ ክፈሉ፤ ግብሪ ንዝግብኦ ግብሪ፥ ቐረፅ ንዝግብኦ ቐረፅ፥ ኣኽብሮ ንዝግብኦ ኣኽብሮ፥ ክብሪ ንዝግብኦ ክብሪ።

ፍቕሪ ንሕጊ ይፍፅሞ

⁸ንሓደ እኳ፥ ንሓድሕድኩም ከም እትፋቐሩ እንተ ዘይኮይኑ፥ ገለ ዕዳ ኣይሃሉኹም፤ እቲ ንብፃዩ ዘፍቅር ንሕጊ ፈፂሙ እዩ እሞ።

⁹እቲ ትእዛዛት፥ “ኣይትዘሙ፥ ኣይትቕተል፥ ኣይትስረቕ፥ ኣይትመነ፥” ካልእ ትእዛዝ እንተሃለወ ድማ፥ ኣብ ሓደ ቃል ተጠቓሊሉ ኣሎ፦ “ንብፃይካ ከም ነፍስኻ ኣፍቅር።”

¹⁰ፍቕሪ ንብፃዩ ክፉእ ኣይገብርን፤ ስለዙይ ፍቕሪ ፍፃሜ ሕጊ እያ።

¹¹ነዝ ግበሩ፥ ነቲ ጊዜ ድማ ፍለጡ፤ ካብ ድቃስኩም እትበራበሩሉ ሰዓት ሕዚ በፂሑ እዩ፤ ምድሓን ሕዚ ካብቲ ብመጀመርታ ዝኣመንናሉ እዋን ኣዝዩ ቀሪቡ ኣሎ እሞ። ¹²ለይቲ ክሓልፍ ቀሪቡ እዩ፥ መዓልቲ ተቓሪባ እያ። ስለዙይ ግብሪ ፀልማት ኣውፂእና፥ ኣፅዋር ብርሃን ንልበስ። ¹³ከምቲ ብቐትሪ ዝግበር፥ ብኣገባብ ንንበር፤ ብጓይላን ስኽራንን ዘይኮነ፥ ብዝሙትን ነውርን ዘይኮነ፥ ብባእስን ቅንኣትን ዘይኮነ። ¹⁴ኣብ ክንድኡ ደኣ ንጐይታ ኢየሱስ ክርስቶስ ልበስዎ እምበር፥ ንትምኒት ስጋ ንምፅጋብ ኣይትሕሰቡ።