Matjembü Sei Danko Boueibü Ngühkhüm
Yaangenbü sei kho seneibü Bou phanga kikei, khoei khüm hoba nyenhang kho ngümbü aying lausikei kujan. Kheijinei touje lepbü olinbü che kho sanou ki, kho mütliei lubü to amaibü akümda hoba khoei ngühkhüm olinda. Chalou kho latetche; shaang shanga nei kaiashi.
13 1Müt pendouei thüka yaangenbü sei shuong phanga natenko kijan, aishanga Bou ka limanje sei aki, hoba kibü sei shuong kho Bouei phokubü ki. 2Kheijinei aoei sei to dangyoko kida haoei Bouei phokubü to dangyoko kida, hoba dangbü shuongei matjem haoen lolo to jinkulabü. 3Matjembü shuong kho maibü kümsilei to hatbü aki, lausikei amaibü kümsilei to ong ki. Nyi sei to ahattila mangsühda lo? Maibü kümashi, kheijinei haoei no la maibü lenlabü. 4Hao kho kaibü maibü shanga Boueibü khangenbü ki. Lausikei nyi amaibü kümalonga, hatashi, aishanga haoei in kho jim shanga apeda. Hao kho Boueibü khangenbü, amaibü kümbou to maangshat lotlabü phoklambou che ki. 5Khoei kanei natenko kijan, kayang ka satenla shanga shianje ayingko, lausikei kaneibü maangpon shanga tegü ki. 6Hibü ong kanei khüm kuda tokei, aishanga matjembü shuong kho Boueibü khangenbü shuong, habü kümsilei to lolo khapetan kibü shuong ki. 7Kanei aoyou la olinbü pendou kujan: aoei la khüm olinda khüm, aoei la nam olinda nam, aoei la souhat olinda souhat, aoei la nyenhang olinda nyenhang kujan.
Sanouei Ngühkhüm Olinda
8Cheei che to sanoubü shianje, aoyou la aikei teolin, aishanga lubü to sanoubouei Ngühkhüm olinda.
9Aishanga ngühkhüm shuong—“Nyi asangalanbü tejungei, nyi müt tühaiti, nyi tekok, nyi tedüh”—hoba lubü ngühkhüm pendou, habü ngüh chea weenakei: “Kaibü lepbou to no lolo tegü sanoushi.”
10Sanouei lepbou to amaibü akümda; khoei sanou kho Ngühkhüm olinbü ki.
11Jihsiphai ngean, ho kümjan: kan yepmang ka loenlabü jihsiphai tou sühkei, aishanga senei shaangla mailembü jihsiphai tokei tou seneibü khümenbü nyangbou kia. 12Miou satkhüman kia, chalou nyangko loua. Kheijinei senei nakthüh kümsilei shuong sattikho hoba ngesakbü insiaubu yukkukho. 13Senei chalou thedanga kibü tegü saopobü hangsilama paikho: shaubüyungbü hoba kiu khianbü to ayingko, asangalanbü hoba aseasangbü to ayingko, oyongümyobü hoba nyekto shatbü to ayingko. 14Aeiko, kanei Bunyubou Jisu Khrista neishi, hoba shabü hangeilamei maangdakbü soutila shanga lamthen teküm.
