Seneibü Bou to Lembü Kubü
Lai lit po che ka ngüh thon sühko, lamleibü jongaibü kho mang che ki—seneibü Bou to lembü langkei, meten tegü teshapan aying lausikei maangpon haanbü la yeibü. Kheijinei weko weko lenenkei: kaibü lolo lembü kümashi, sanou tükdebü yingashi, shieikoebü shuong to haükushi, souhat sepeimau to teyoko, maibü danko amaibü to jinkuashi.
12 1Hibü, jaisinasi shuong, seneibü Bou onou shuongei ngei kan to sudajada, kaneibü mang kho langkei, saopobü hoba hao to maangshikbü lembü lele kuashi; ho kaneibü ngühmai hoba songsido kibü lem ki. 2Ho meten tegü teshapjan, lausikei seneibü Bou maangangbü—maibü, maangshikbü hoba penbüsoubü kho—kanei damanchühla shanga, kaneibü maangpon haanbü la yeiko kan lulu haantishi.
3Kü la kubü onou danko ngei kan weko to lenda, kanei lulu to dam shedbü to aei yaangbou dogo tedamjan, lausikei seneibü Bouei mütpem weko la phet kubü mailem thüng tegü, songsido kibü daman damashi. 4Mang cheei phe juong kibü tegü, hoba phe pendouei jetei kümsilei akümda, 5kheijinei sen, juongnyu kisikei, Khrista to mang che ki, hoba sen weko kho cheei che la phe ki. 6Sen la kubü onou thüng tegü seneibü jongsak shuong sem sem ki; ngümbü yingalonga, seneibü mailem thüng tegü kho jungjan; 7khangenbü yingalonga, seneibü khangenbüa; aoei lenda haoei, haoeibü lenbüa; 8haüyobou kho, haüyobüa; kubou kho, mu aleko; leiyeibou kho, maangkaangko; onou lenbou kho, olinko.
9Sanou kho tükdebü yingshi. Amaibü kho mangsenashi; maibü kho himlepan hatashi. 10Jaisinasi sanou yoa cheei che to sanouashi. Nyenhang kubü ka cheei che to aei shaangyoashi. 11Maangdak to teshaalejan, lausikei soushoua laakjungko, Bunyubou to khangenashi. 12Maanglema olinashi, khonku ka lounyu natenashi, welaubü ka liko khümbo kishi. 13Seneibü Bou mütli shuong khamlaje, kanei haoen to thuikaashi; thangbou okbü to shijan.
14Kan shieikoebü shuong to haükuashi; haükuashi, hoba tekhüktuok. 15Olinbü shuong yoa olinyoashi; haapbü shuong yoa haapyoashi. 16Cheei che yoa maangpon che yoan kishi. Kan lulu teyaangtijan, lausikei eaaoabü shuong yoa kiashi. Kan lulu nyeka songsido kibü la teyeijan. 17Ao to ong amaibü shanga amaibü tekungaijan; müt pendou thedanga nyenhang kibü kümla shaang damashi. 18Thükalonga, kan la ki thüng tegü, müt pendou yoa sangmaia kishi.
19Sanoubü jenabou shuong, kan lulu shanga phok telamjan; lausikei seneibü Bou maangshat shanga shang phokuashi. Laishibaei lenda, “Phok lambü ngeibü ki, ngei kungailabü,” dogo seneibü Bouei lauda.
20Aeiko, “Nyi dangbou müheilonga, hao la shausiyung kushi; deilalonga, hao la yungla kushi; kho kümlaje, nyi haoeibü khua wankak ongshaikulabü.” a a v20 Dangbou khua wankak ongshaikubü ho ngüh kho, ngethinei loubü onou danko haoen to himou ayingsi maangpon sepeibü yoa yaangtibü la lenda.
21Amaibüei kan tethükenjan, lausikei maibüei amaibü thükenashi.
