ሮሜ 12

12 ¹እንግዲህ ወንድሞችና እኅቶች ሆይ፤ በአባታችን ምሕረት እለምናችኋለሁ፤ ሰውነታችሁን ቅዱስና እርሱን ደስ የሚያሰኝ ሕያው መሥዋዕት አድርጋችሁ አቅርቡ፤ ይህም እውነተኛውና ተገቢው አምልኮአችሁ ነው። ²የዚህን ዘመን ምሳሌ አትከተሉ፤ ነገር ግን አእምሯችሁ በመታደስ ተለወጡ፤ መልካሙንና ደስ የሚያሰኝውን ፍጹሙንም የአባታችንን ፈቃድ ልትመረምሩ እንድትችሉ።

³በተሰጠኝ ጸጋ ለእያንዳንዳችሁ እናገራለሁ፤ ራሳችሁን ማሰብ ከሚገባችሁ አብልጣችሁ አታስቡ፤ ነገር ግን አባታችን ለእያንዳንዱ እንዳከፋፈለው የእምነት መጠን በማስተዋል አስቡ። ⁴አንድ አካል ብዙ ብልቶች እንዳሉት፤ ብልቶቹም ሁሉ አንድ ዐይነት ተግባር እንደሌላቸው፤ ⁵እንዲሁ እኛ ብዙዎች ሆነን በክርስቶስ አንድ አካል ነን፤ እያንዳንዳችንም የሌሎቹ ብልቶች ነን። ⁶እንደ ተሰጠን ጸጋ መጠን የተለያዩ ስጦታዎች አሉን፤ ትንቢት ከሆነ እንደ እምነታችን መጠን እንጠቀምበት፤ ⁷አገልግሎት ከሆነ በአገልግሎታችን ይሁን፤ የሚያስተምር በማስተማሩ ይትጋ፤ ⁸የሚያበረታታ በማበረታታት ይትጋ፤ የሚሰጥ በልግስና ይስጥ፤ የሚመራ በትጋት ይምራ፤ የሚምር በደስታ ይማር።

⁹ፍቅር ያለ ግብዝነት ይሁን። ክፉውን ነገር ጥሉ፤ መልካሙን ነገር አጥብቃችሁ ያዙ። ¹⁰በወንድማዊ ፍቅር እርስ በርሳችሁ ተዋደዱ። እርስ በርሳችሁ በመከባበር ቅድሚያ ተሰጣጡ። ¹¹በትጋት የላሉ አትሁኑ፤ ነገር ግን በመንፈስ የጋለ ሁኑ፤ ጌታን አገልግሉ። ¹²በተስፋ ደስ ይበላችሁ፤ በመከራ ታገሡ፤ በጸሎት ጽኑ። ¹³የአባታችን ሕዝብ በሚያስፈልጋቸው ነገር ተካፈሉ፤ እንግዳ መቀበልን ትጉ።

¹⁴የሚያሳድዷችሁን ባርኩ፤ ባርኩ እንጂ አትርገሙ። ¹⁵ደስ ከሚላቸው ጋራ ደስ ይበላችሁ፤ ከሚያለቅሱ ጋራ አልቅሱ። ¹⁶እርስ በርሳችሁ በአንድ ልብ ኑሩ። ትዕቢተኞች አትሁኑ፤ ነገር ግን ከትሑታን ጋራ ተባበሩ። በራሳችሁ ዐይን ጠቢባን አትሁኑ። ¹⁷ለማንም ክፉን በክፉ አትመልሱ፤ በሰው ሁሉ ፊት መልካም የሆነውን ለማድረግ አስቀድማችሁ አስቡ። ¹⁸ቢቻላችሁ በእናንተ በኩል ያለውን ሁሉ አድርጋችሁ ከሰው ሁሉ ጋራ በሰላም ኑሩ።

¹⁹ወዳጆች ሆይ፤ ራሳችሁን አትበቀሉ፤ ነገር ግን ለአባታችን ቍጣ ስፍራ ተዉ፤ እንዲህ ተብሎ ተጽፎአልና፦ “በቀል የእኔ ነው፤ እኔ እመልሳለሁ” ይላል አባታችን።

²⁰ከዚህ ይልቅ፦ “ጠላትህ ቢራብ አብላው፤ ቢጠማ አጠጣው፤ ይህን በማድረግህ በራሱ ላይ የእሳት ፍም ትከምርበታለህ።” ^a a v20 በጠላት ራስ ላይ የእሳት ፍም መከመር ማለት ባልተጠበቀ ደግነት በኀፍረት ወይም በወቀሳ ፍጹም እንዲሸነፍ ማድረግን ያመለክታል።

²¹በክፉ አትሸነፉ፤ ነገር ግን ክፉውን በመልካም አሸንፉ።