ሮሜ 13

13 ¹ሰው ሁሉ ለገዢ ባለ ሥልጣናት ሊገዛ ይገባል፤ ከአባታችን በቀር ሥልጣን የለምና፤ ያሉትም በአባታችን የተሾሙ ናቸው። ²ስለዚህ ሥልጣንን የሚቃወም አባታችን የመሠረተውን ይቃወማል፤ የሚቃወሙትም በራሳቸው ላይ ፍርድ ያመጣሉ። ³ገዢዎች ለክፉ ሥራ እንጂ ለበጎ ሥራ የሚያስፈሩ አይደሉም። ሥልጣንን ላለመፍራት ትፈልጋለህን? በጎውን አድርግ፤ ሞገሱንም ታገኛለህ። ⁴እርሱ ለመልካምህ የአባታችን አገልጋይ ነውና። ነገር ግን ክፉ ብታደርግ ፍራ፤ ሰይፉን በከንቱ አይታጠቅምና። እርሱ የአባታችን አገልጋይ፣ በክፉ አድራጊው ላይ ቍጣን የሚያመጣ በቀል አድራጊ ነው። ⁵ስለዚህ ስለ ቅጣት ብቻ ሳይሆን ስለ ኅሊናም ጭምር ልትገዙ ይገባል። ⁶ስለዚህ ደግሞ ግብርን ትከፍላላችሁ፤ ባለ ሥልጣናቱ ለዚህ ነገር ራሳቸውን ያስገዙ የአባታችን አገልጋዮች ናቸውና። ⁷የሚገባውን ሁሉ ክፈሉ፤ ግብር ለሚገባው ግብርን፣ ቀረጥ ለሚገባው ቀረጥን፣ አክብሮት ለሚገባው አክብሮትን፣ ክብር ለሚገባው ክብርን።

ፍቅር ሕግን ይፈጽማል

⁸እርስ በርሳችሁ ከመዋደድ በቀር ለማንም ዕዳ አይኑርባችሁ፤ ባልንጀራውን የሚወድ ሕግን ፈጽሟልና።

⁹“አታመንዝር፣ አትግደል፣ አትስረቅ፣ አትመኝ” የሚሉት ትእዛዛትና ሌላውም ትእዛዝ ሁሉ፣ “ባልንጀራህን እንደ ራስህ ውደድ” በሚለው በአንዱ ቃል ውስጥ ተጠቅልለዋልና።

¹⁰ፍቅር ለባልንጀራው ክፉ አያደርግም፤ ስለዚህ ፍቅር የሕግ ፍጻሜ ነው።

¹¹ጊዜውን እያወቃችሁ ይህን አድርጉ፤ ከእንቅልፍ የምትነቁበት ሰዓት አሁን ደርሷል፤ ድነት መጀመሪያ ካመንንበት ጊዜ ይልቅ አሁን ወደ እኛ ቀርቧል። ¹²ሌሊቱ ሊያልፍ ተቃርቧል፤ ቀኑም ቀርቧል። ስለዚህ የጨለማን ሥራ አውልቀን የብርሃንን ጦር ዕቃ እንልበስ። ¹³በቀን ብርሃን እንዳለን ባማረ ሁኔታ እንኑር፤ በዘፈንና በስካር አይሁን፣ በዝሙትና በነውር አይሁን፣ በጠብና በቅናት አይሁን። ¹⁴ነገር ግን ጌታን ኢየሱስ ክርስቶስን ልበሱ፤ የኀጢአተኛውን ባሕርይ ምኞት ለማርካት አታስቡ።