Ng'atuutyetap Kwanda eng' Kimnateet ne Laitorani
Kigoitoi kimnateetap kiptainik ne po Kwandanyo, si kigoitoi aisuruut ak igonyit, ma kong'wanegei. Yeityo pesen agenge ne tagei ko chamyet, ne ma yachin kokwennyi ne ya ak nooto si isuldoi Ng'atuutyet. Kagobata sait; olaach ngoroik che po betusyet.
Ng'alaali Kwandanyo eng' mustari 9
13 1Ingoming'injigei chii age tugul kiptainik che tinyei kimnateet, amu ma mi kimnateet age tugul kobatee ne punu Kwandanyo, ak kimnateet chuuto che mi, ko ki inde Kwandanyo. 2Nooto anyun, age tugul ne puunyei kimnateet, ko puunyei kiit ne kigimit Kwandanyo; ak che puunyei, ko ibu icheegei kirwooget. 3Ma po kaiyweisyet laitorani agobo kiy ne myee, ago agobo ne ya. Imache si maiiywei kimnateet? Yai ne myee, ak koboiboitu agobo inyee. 4Amu otwogindetap Kwandanyo ineendet, agobo myeeindong'ung'. Ago ngot iyai ne ya, iywei; amu ma ib rotweet kwen. Amu otwogindetap Kwandanyo ineendet, yaaktaindet ne ibu nereegek agobo ne yaei ne ya. 5Nooto anyun, oming'injigei, ma eng' amu kergong'yet kityo, ago agobo ng'wanindap muguleldang'wong' agine. 6Nooto anyun si ogoitoi aisuruut, amu minigap Kwandanyo icheek che tinyei kimnateet, che itabaanat eng' kiito inoni kityo. 7Ogoitochin piik tugul tuguuk che otunji: aisuruut ne kigoitoi aisuruut; aisuruutap keeswek ne kigoitoi aisuruutap keeswek; igonyit ne kigoitoi igonyit; toroornatet ne kigoitoi toroornatet.
Isuldoi Chamyet Ng'atuutyet
8Amotinye tunwegap chii age tugul, kobatee chamyet ne ochamyegei okweek tugul; amu ne chamei chiito age, ko isuldoi Ng'atuutyet.
9Amu ng'atuutik—“Mogesesen, Amerumisye, Amochoorse, Amoam ng'etkong',”—ak ng'atuutyet age tugul ne ter, ko kiyumgei tugul eng' ng'olyoot agenge: “Cham chiitap kokweng'ung' ko uu inyee ineeng'.”
10Ma yachin chamyet chiitap kokwennyi kiy ne ya; nooto anyun, ko chamyet suldoyeetap Ng'atuutyet.
11Oyai niito, ongen sait: amu kagoit sait ne otuuch eng' rueet; amu neegit yetunet nguno kosiir ye ki kiyan tai. 12Machei kobata keemeet, ak neegit peet. Nooto anyun keisto poisyonigap mesundeito, ak kelaachigei kariigap lapkeiyet. 13Keiboiyote komyee, ko uu eng' betuut: ma eng' lelutik ak maatyet, ma eng' sokseet ak teweernateet, ma eng' pooryeet ak ng'etkong'. 14Ago olaachigei Kiptaiyat Jeso Kristo; ak amochopchigei poorto si oyam maguutikyik che po tengek.