Ngam choinu bi ani Pa om Chongtan
Ngam choinu nun ga ani Pa thwei bi han thang rwe, atiga ramkhai khatle karo ding balung pwan makka pi thun ngo. Atiga leinu lat tangnu khatchaza ga kriangnu gaye, hagana innai ding noh khatchale to make, atiga chongtan ding pi bapung pha thang nge. Chakrin ga nai rwe; thamlai lang pwan sinno.
Ani Pa na chongkhak heiya bi kabia nge 9
13 1Mi bing ga paannu ngam choinu nun thwei bi ong ngo, balangbe ani Pa khouna za makka ngam choinu khatchale maake, atiga amnu ngam bing ga ani Pa na thang damnu gaye. 2Atibriakpina tudannu ngam choinu ding maitwangnu maan ga ani Pa na han thang damnu ding maitwangnuwe, atiga maitwangnu bingna baraanto bating lu chung bi chongsem lat lang nge. 3Paannu bingna kasanu chwan ding lang lianga thinu make, atiyeda kasianu chwan ding lang za nge. Ngam choinu ding kachi mak lang nani nwamnubo? Kasanu towo, atiga nangna bakhouna pem za lang lousulune. 4Maan ga nang om sa lang ani Pa om swak to mi gaye. Atiyeda nangna baze maknu towe dabe, kachiyo; balangbe maanna thihai ding bahaa bi pwan make. Maan ga baze maknu tonu lu chung bi balung pwan latnu takhum baannu, ani Pa om swak to mi gaye. 5Atibriakpina nani thwei bi ong ngo, laaknu bina kan langza make atiyeda sung theinu lang le gaye. 6Haba briakpina le nanina ramkhai pinuwe, balangbe ngam choinu bing ga heiba thinu bahak lang chat makka chwanlaang tonu, ani Pa om chwanlaang to mi gaye. 7Nanina chaaknu ding pi thun ding ngo; ramkhai chaaknu khou ramkhai, pot ramkhai chaaknu khou pot ramkhai, takhwang chaaknu khou takhwang, takung chaaknu khou takung piro.
Kriangnuna Chongtan ding Pungpha Thangne
8Pakhatcha khou le pa-aam le chaak mako, khatna khat ting kriangnu za ding gaye; balangbe kateina khat ting kriangnu maan ga chongtan ding pungpha thang nge.
9Balangbe zathang bing, “Nang lungkoi lungmaan mak ting gaye, nang mi athat mak ting gaye, nang barusa mak ting gaye, nang antiam mak ting gaye,” khatle katei zathang tamgale, chong khat bina inkam lat thang nge; “Nazan ding napum bahak ting danga kriang ngo.”
10Kriangnuna nazan khou baze maknu to make; atibriakpina kriangnu ga chongtan om pungphanu gaye.
11Hei lumik ding theiga, haga towo: nani inthi bina insaang thounu lumik ga hung khop rwe; ani kama balumsanu kaan bina atun kanthangnu ga inku nai hung rwe. 12Nun ga braan nai rwe, baan ga tang nai rwe. Atibriakpina ani zing om chwan bing ga bathan satluga baan om kraan pon bing ga sin basoizo. 13Khwa baan bi ong danga ani tazeiga ring damzo; chongswak laswaknu khatle zu kalonu bi, lungkoi lungmaannu khatle indehnu bi, kae kanaanu khatle antiamnu bi ring dam mako. 14Atiyeda Pukraangba Jisu Christa ding nani pwan sin thangro, pum om bathainu pem za lang rang thang mako.