ዘሌዋውያን 24 FHB Father's Heart Bible™

24 ¹ኣቦና ንሙሴ ኸምዙይ ኢሉ ተዛረቦ፦

²“ንደቂ እስራኤል፥ ናይ ብርሃን ዝኸውን ፅሩይ ዝተቐጥቀጠ ዘይቲ ኣውሊዕ ከምፅኡልካ ኣዝዞም፤ መብራህቲ ኵልሻዕ ምእንቲ ክነድድ። ³ኣብ መራኸቢ ድንኳን ኣብ ወፃኢ መጋረጃ ምስክር ኮይኑ፥ ኣሮን ካብ ምሸት ክሳዕ ንግሆ ኣብ ቅድመይ ኵልሻዕ የዳልዎ፤ ንውሉድ ወለዶኹም ናይ ዘለኣለም ሕጊ እዩ። ^a a v3 እቲ ‘ምስክር’ ዝበሃል፥ ነቲ ኣብ ታቦት ኪዳን ዝተቐመጠ ሰሌዳ እምኒ ናይ ኪዳን የመልክት። ⁴ኣብቲ ፅሩይ ቐዋሚ ቐንዲል ነቲ ቐናዲል ኣብ ቅድመይ ኵልሻዕ የዳልዎ።

⁵ልሑም ሕሩጭ ውሰድ እሞ ዓሰርተ ኽልተ ሕብስቲ ስንክት፤ ነንሓደ ሕብስቲ ዳርጋ ኽልተ ኪሎ ግራም ሕሩጭ ይግበር። ⁶ኣብ ክልተ መስርዕ ጌርካ፥ ኣብ ነንሓደ መስርዕ ሽዱሽተ ሽዱሽተ ጌርካ፥ ኣብቲ ፅሩይ ጠረጴዛ ኣብ ቅድመይ ስርዓዮም። ⁷ኣብ ነንሓደ መስርዕ ፅሩይ ዕጣን ግበረሉ፤ እዙይ ንመዘከርታ እቲ ሕብስቲ ዝኸውን፥ ንኣይ ብሓዊ ዝቐርብ መስዋእቲ እዩ። ⁸ኣብ ነፍሲ ወከፍ መዓልቲ ሰንበት ካብ ደቂ እስራኤል ተቐቢሉ፥ ኣብ ቅድመይ ኵልሻዕ ይስርዓዮ፤ እዙይ ናይ ዘለኣለም ኪዳን እዩ። ⁹እዙይ ናይ ኣሮንን ደቁን እዩ፤ ኣብ ቅዱስ ቦታ ኮይኖም ድማ ይብልዕዎ፤ ካብቲ ንኣይ ብሓዊ ዝቐርብ መስዋእቲ ንእኡ ቅዱሰ ቅዱሳን ብፅሒት እዩ እሞ፥ ናይ ዘለኣለም ግዲኦም እዩ።”

ስም ኣቦ ዝተሓለወሉ

¹⁰ኣቦኡ ግብፃዊ ዝኾነ ወዲ ሓንቲ እስራኤላዊት ሰበይቲ ድማ ናብ ማእኸል ደቂ እስራኤል ወፀ፤ እቲ ወዲ እታ እስራኤላዊት ሰበይቲ ኸዓ ኣብ ሰፈር ምስ ሓደ እስራኤላዊ ሰብኣይ ተባኣሰ። ¹¹እቲ ወዲ እታ እስራኤላዊት ሰበይቲ ኸዓ ነቲ ስም ረጊሙ ፀረፈ፤ ናብ ሙሴ ድማ ኣምፅእዎ። ኣዲኡ ኸዓ ሸሎሚት እትበሃል ጓል ዲብሪ ናይ ነገድ ዳን እያ ነበረት። ¹²ኣቦና ፍቓዱ ክሳዕ ዝገልፀሎም ድማ ናብ ቤት ማእሰርቲ ኣእተውዎ። ¹³ኣቦና ድማ ንሙሴ ኸምዙይ ኢሉ ተዛረቦ፦

¹⁴“ነቲ ዝፀረፈ ናብ ወፃኢ ሰፈር ኣውፅኣዮ። ኵሎም እቶም ዝሰምዑ ኣእዳዎም ኣብ ርእሱ የንብሩ፤ ድሕሪዙይ ኵሉ እቲ ማሕበር ብእምኒ ይቐጥቅጥዎ። ^b b v14 እቶም መሰኻኽር ነቲ መርገም ናይ ምስማዕ በደል ናብቲ ፀራፊ ምእንቲ ኽመልሱ፥ ኣእዳዎም ኣብ ርእሲ እቲ ፀራፊ ኣንበሩ። ¹⁵ንደቂ እስራኤል ድማ ከምዙይ በሎም፦ ንኣቦና ዝፀረፈ ኵሉ ሓጢኣቱ ይፆር። ¹⁶ስመይ ዝፀረፈ ይቀተል፤ ኵሉ እቲ ማሕበር ብእምኒ ይቐጥቅጥዎ። ጓና ኾነ ወዲ ዓዲ ማዕረ፥ ነቲ ስም ዝፀረፈ ይቀተል።

¹⁷“ዝኾነ ሰብ ዝቐተለ ኸዓ ይቀተል። ¹⁸እንስሳ ዝቐተለ ኸዓ ይኽሓሰሉ፤ ነፍሲ ክንዲ ነፍሲ። ¹⁹ሓደ ሰብ ኣብ ብፃዩ ጕድኣት እንተ ገበረ፥ ከምቲ ዝገበሮ ይግበረሉ፦ ²⁰ስብራት ክንዲ ስብራት፥ ዓይኒ ክንዲ ዓይኒ፥ ስኒ ክንዲ ስኒ፤ ከምቲ ንሰብ ዘውረደሉ ጕድኣት፥ ከምኡ ይግበረሉ። ²¹እንስሳ ዝቐተለ ይኽሓሰሉ፤ ሰብ ዝቐተለ ድማ ይቀተል። ²²ንጓናን ንወዲ ዓድን ማዕረ ሓደ ሕጊ ይኹን፤ ኣነ ኣቦኻትኩም እየ እሞ።”

²³ሙሴ ድማ ንደቂ እስራኤል ነገሮም፤ ነቲ ዝፀረፈ ድማ ናብ ወፃኢ ሰፈር ኣውፂኦም ብእምኒ ቐጥቂጦም ቀተልዎ። ደቂ እስራኤል ከዓ ኸምቲ ኣቦና ንሙሴ ዝኣዘዞ ገበሩ።