Avāwui Thaomei Mangasāmlakla Shārthai
Thaomeiwui vang thao kala khamui tharāda khani ithumwui Avāwui mangāli leishonra, sabbath kachida kathar eina ngarānra. Chiwui thili mi akhana ngazek ngaroklakha Aming chili mashātta khonshi kala ali lunggui eina horthatta; chiwui ain chiya kha̱minaoranu, ramnaoranu, ain akhamāng eina zatra kajina.
24 1Ithumwui Avāna Mosesli hānga,
2"Thaomei chi mangasāmlakla shārda leikhavai, kahorwui vang shungkakhui kashenga olive thao chi naphaoli khuirāmi khavai Israelnaobingli kasolu. 3Kazip khavai kachonshimwui alungli, ningkhami okowui mairār kānshokta, Aaronna ngazin eina thuilaga ngathor eina tangda mangasāmlakla iwui mangāli mayonra. Hi nathumwui thot kachida mamalaila mayonkhavaiwui shiyanna. a a v3 'Ningkhami oko' china kadharawui ngalung taibingli haihaina, chibing chi kadharawui oko alungli sanghaikasāna. 4Khamathinga thaomeishong chili ana iwui mangāli thaomeibing chi mangasāmlakla mayonra.
5"Manaktak kahai mathir khuilaga khamui tharāda khani sālu; khamui akha kachida mathir kg. khani eina sāra. 6Chi apeng khani sāda, apeng akhali tharuk-tharuk eina khamathinga tabletungli iwui mangāli hailu. 7Apeng kachida khamathinga frankincense sanglu, chi khamuiwui phaningung khavai yarna, iwui vang mei eina rikkatā kachigatna. 8Israelwui mibingwui eina katang makhavai tuingashit akha sāda, Sabbaththang kachida ana chi iwui mangāli mangasāmlakla haira. 9Chi Aaron kala awui naomayarabingwui yarna, kala athumna chi katharapamli shaira; hi awui vang iwui mei eina rikkatāwui eina tharmathengmeikap kaji yarna, athumwui mivāshumki kaji yarna."
Avāwui Ming Yangmi Khavai
10Awui avā Egyptnao kahai, Israel sha̱nao akhawui naomayara akhana Israelnaobingwui ngachaili vāhaowa; kala Israel sha̱naowui naomayara china rāmrah alungli Israel mi akhali shokngarara. 11Israel sha̱naowui naomayara china Ming chi khonkashi eina kachipata, kala athumna ali Mosesli khuirai. Awui ava̱ chi Dan shangwui Dibriwui naongalāva̱ Shelomithna. 12Ithumwui Avāna khisara kaji chi athumli seihā masāmiranglakha eina tangda athumna ali narhaiya. 13Chieina ithumwui Avāna Mosesli hānga,
14"Khonkashi sā mi chi rāmrahwui ayarli khuishoklu. Chi kashā mibing saikorana awui kuili athumwui pāng parra, chiwui thili yarui ashangva̱na ali ngalung eina horthatra. b b v14 Shākhibingna kachipat sā miwui kuili pāng haisangda, khonkashi chi shākhuiwui khayon chi ngakarmi khavaina. 15Israelwui mibingli hithāda hānglu: Kachikathāna ithumwui Avāli khonshiakha, awui khayon phungra. 16Kachikathāna iwui ming chi kachipatakha shaothatphalungra; yarui ashangva̱na ali ngalung eina horthatphalungra. Kha̱mila ramnaola, kachikathāna Ming chi kachipatakha shaothatphalungra.
17"Kachikathāna mi akha shaothatakha, chipā chi shaothatphalungra. 18Kachikathāna sha̱kei akha shaothatakha, ana mirinwui vang mirin runra. 19Kachikathāna awui khongnainaoli khamā sāhaiakha, awuitungli chithāda sāra: 20Kashuiwui vang kashui, mikwui vang chi mik, hāwui vang chi hā: mi khatna khatli khamā sāhai athishurda, awuitungli chithāda sāra. 21Sha̱kei shaothata china chiwui vang runra; kha mi shaothatakha chipāli shaothatra. 22Kha̱mi ngasokharābingwui vangla kala ramnaobingwui vangla ain akhamāng leira, kaja I nathumwui Avāna."
23Chieina Mosesna Israelnaobingli hānga; kala athumna khonkashi kahai mi chi rāmrah ayarli khuishokta ali ngalung eina horthathaowa. Ithumwui Avāna Mosesli kakaso athishurda Israelwui mibingna sai.
