ዮናስ 3 FHB Father's Heart Bible™

3 ¹ሽዑ ቃል ኣቦና ካልኣይ ጊዜ ናብ ዮናስ መፀ፦

²“ተስእ! ናብታ ዓባይ ከተማ ነነዌ ኺድ፤ ኣነ ዝህበካ መልእኽቲ ኸዓ ኣብኣ ኣውጅ።”

³ዮናስ ድማ ከምቲ ኣቦና ዝበሎ፥ ተሲኡ ናብ ነነዌ ከደ። ነነዌ ድማ የመና ዓባይ ከተማ ነበረት፤ ንምሕላፋ ድማ ሰለስተ መዓልቲ የድሊ ነበረ። ⁴ዮናስ ድማ ናይ ሓደ መዓልቲ መገዲ ናብታ ከተማ ኣትዩ፥ “ድሕሪ ኣርብዓ መዓልቲ ነነዌ ክትግልበጥ እያ!” ኢሉ ኣእወየ። ^a a v4 “ክትግልበጥ” ዝብል ቃል ብፍላጥ ክልተ ትርጉም ዘለዎ እዩ፦ ክጠፍእ ወይ ክቕየር ማለት ክኸውን ይኽእል፤ ነዝ ድማ እቲ ዝተረፈ ክፋል እዚ ምዕራፍ ዝፍፅሞ ስላቕ እዩ።

⁵ሰብ ነነዌ ድማ ብእግዚኣብሄር ኣመኑ። ፆም ኣወጁ፤ ካብ ዓበይቶም ክሳዕ ኣናእሽቶም ድማ ወጮ ተኸደኑ።

⁶እዝ ወረ እዙይ ናብ ንጉስ ነነዌ ምስ በፅሐ፥ ካብ ዙፋኑ ተሲኡ፥ ክዳኑ ኣውፂኡ፥ ወጮ ተኸዲኑ፥ ኣብ ሓሙዅሽቲ ተቐመጠ። ⁷ብትእዛዝ ንጉስን ክቡራትን ድማ ኣብ ነነዌ ኸምዙይ ኢሉ ኣወጀ፦ “ዝኾነ ሰብ ኮነ እንስሳ፥ ከፍቲ ኾነ ኣባጊዕ፥ ገለ እኳ ኣይጥዐሙ፤ ኣይውፈሩ ወይ ማይ ኣይስተ።” ⁸ሰብን እንስሳን ወጮ ይከደኑ፤ ነፍሲ ወከፍ ድማ ብምሉእ ሓይሉ ናብ እግዚኣብሄር የእዊ። ነፍሲ ወከፍ ከዓ ካብ ክፉእ መገዱን ካብቲ ኣብ ኣእዳዉ ዘሎ ዓመፅን ይመለስ። ⁹መን ይፈልጥ? ምእንቲ ኸይንጠፍእ፥ እግዚኣብሄር ተመሊሱ ይናሳሕ፥ ካብ ነዳዲ ቝጥዓኡውን ይምለስ ይኸውን።

¹⁰እግዚኣብሄር ግብርታቶም፥ ካብ ክፉእ መገዶም ከም ዝተመለሱ ምስ ረአየ፥ ካብቲ ኣብ ልዕሊኦም ከውርድ ዝበሎ መዓት ተናስሐ፤ ኣይገበሮንውን።