ኤርሚያስ 27 FHB Father's Heart Bible™

27 ¹ሴዴቅያስ ወዲ ኢዮስያስ ኣብ ይሁዳ ኽነግስ ምስ ጀመረ፥ እዝ ቃል እዙይ ካብ ኣቦና ናብ ኤርሚያስ መፀ፦

²ኣቦና ኸምዙይ በለኒ፦ ማእሰርትን ኣርዑትን ንባዕልኻ ግበር፥ ኣብ ክሳድካ ድማ ኣንብሮም። ³ሽዑ ብኢድ እቶም ናብ ኢየሩሳሌም ናብ ሴዴቅያስ ንጉስ ይሁዳ ዝመፁ ልኡኻት፥ ናብ ነገስታት ኤዶምን ሞኣብን ደቂ ኣሞንን ጢሮስን ሲዶንን መልእኽቲ ስደድ።

⁴ንጐይተቶም ድማ ከምዙይ ኢሎም ኽነግሩ እዘዞም፦ ኣቦ ሰራዊት ሰማያት ከምዙይ ይብል ኣሎ፦ “ንጐይተትኩም ከምዙይ በልዎም፦ ⁵ኣነ ባዕለይ ንምድሪ፥ ምስቶም ኣብ ገፅ ምድሪ ዘለዉ ሰብን እንስሳን፥ ብዓብዪ ሓይለይን ብዝርግሕቲ ቕልፅመይን ገበርክዋ፤ ንዝደለኽዎ ድማ እህቦ። ⁶ሕዚ ድማ እዘን ኵለን ሃገራት እዚኣተን ነቡከደነፆር ንጉስ ባቢሎን ንባርያይ ሃብክዎ፤ ነቶም ኣራዊት መሮር እውን ኽግዝኡሉ ሃብክዎ። ⁷ኵሎም ኣህዛብ ድማ ንእኡን ንወዱን ንወዲ ወዱን፥ ክሳዕ እታ ናይ ባዕሉ ምድሪ ጊዜ እትመፅእ ክግዝእዎ እዮም፤ ሽዑ ብዙሓት ኣህዛብን ዓበይቲ ነገስታትን ንእኡ ኸገዝእዎ እዮም።”

⁸እቲ ንነቡከደነፆር ንጉስ ባቢሎን ዘይግዛእ፥ ወይ ክሳዱ ኣብ ትሕቲ ኣርዑቱ ዘየንብር ህዝቢ ወይ መንግስቲ ግና፥ ነቲ ህዝቢ እቱይ ብሰይፍን ብጥሜትን ብመቕሰፍትን ክቐፅዖ እየ ይብል ኣቦና፥ ክሳዕ ብኢዱ ዘጥፍኦም። ⁹“እምበኣር ነቶም ‘ንጉስ ባቢሎን ኣይክትግዝኡን ኢኹም’ ዝብሉኹም ነቢያትኩምን ጠንቈልትኹምን ሓለምቲ ሕልምኹምን ገመትትኹምን ደገምትኹምን ኣይትስምዕዎም። ¹⁰ንሳቶም ሓሶት እዮም ዝንበዩልኩም ዘለዉ፤ ካብ ምድሪኹም ኣርሒቖም ይሰዱኹም ኣለዉ፤ ኣነ ኸዓ ከባርረኩም እየ፥ ክትሞቱውን ኢኹም። ¹¹ነቲ ክሳዱ ኣብ ትሕቲ ኣርዑት ንጉስ ባቢሎን ኣእትዩ ዝግዛኦ ህዝቢ ግና፥ ኣብ ምድሩ ኽሓድጎ እየ፥ ምእንቲ ኽሓርሳን ኣብኣ ኽነብርን ይብል ኣቦና።”

¹²ነዝ ዅሉ ቃላት እዚኣቶም ድማ ንሴዴቅያስ ንጉስ ይሁዳ ተዛረብክዎ፦ ክሳድኩም ኣብ ትሕቲ ኣርዑት ንጉስ ባቢሎን ኣእትዉ፤ ንእኡን ንህዝቡን ተገዝኡ፥ ንበሩ ድማ። ¹³ከምቲ ኣቦና ብዛዕባ እቲ ንጉስ ባቢሎን ዘይግዛእ ህዝቢ ዝበሎ፥ ንስኻን ህዝብኻን ስለ ምንታይ ብሰይፍን ብጥሜትን ብመቕሰፍትን ክትሞቱ?

¹⁴ነቶም ‘ንጉስ ባቢሎን ኣይክትግዝኡን ኢኹም’ ዝብሉኹም ነቢያት ኣይትስምዕዎም፤ ሓሶት እዮም ዝንበዩልኩም ዘለዉ እሞ። ¹⁵ኣነ ኣይለኣኽክዎምን እየ ይብል ኣቦና፥ ንሳቶም ግና ብስመይ ብሓሰት ይንበዩ ኣለዉ፤ ስለዙይ ከባርረኩም እየ፥ ንስኻትኩምን እቶም ዝንበዩልኩም ነቢያትን ድማ ክትጠፍኡ ኢኹም።

¹⁶ሽዑ ነቶም ካህናትን ነዝ ኵሉ ህዝቢ እዙይን ከምዙይ በልክዎም፦ ኣቦና ኸምዙይ ይብል ኣሎ፦ ነቶም ‘እንሆ፥ ኣቑሑ ቤት ኣቦና ቀልጢፉ ኻብ ባቢሎን ክምለስ እዩ’ ኢሎም ዝንበዩ ነቢያትኩም ኣይትስምዕዎም፤ ሓሶት እዮም ዝንበዩልኩም ዘለዉ። ¹⁷ኣይትስምዕዎም። ንንጉስ ባቢሎን ተገዝኡ፥ ንበሩ ድማ። እዛ ኸተማ እዚኣ ስለ ምንታይ ዑና ኽትከውን?

¹⁸ንሳቶም ነቢያት እንተ ኾይኖም፥ ቃል ኣቦናውን ምሳታቶም እንተሎ ግና፥ እቲ ኣብ ቤቱን ኣብ ቤት ንጉስ ይሁዳን ኣብ ኢየሩሳሌምን ዝተረፈ ኣቑሑ ናብ ባቢሎን ከይከይድ፥ ናብ ኣቦ ሰራዊት ሰማያት ይለምኑ። ¹⁹ኣቦ ሰራዊት ሰማያት ብዛዕባ እቶም ኣዕማድን እቲ ባሕርን እቲ መቐመጢ ኣቑሑን ኣብዛ ኸተማ እዚኣ ዝተረፈ ኻልእ ኣቑሑን ከምዙይ ይብል ኣሎ፥ ^a a v19 ኣብዙይ “እቲ ባሕሪ” ዝተብሃለ፥ እቲ ኣብ ኣፍደገ ቤተ መቕደስ ደው ኢሉ ዝነበረ፥ ካህናት ዝሕፀቡሉ ዓብዪ ናይ ነሃስ ገበራ ደኣ እምበር፥ ዓብዪ ማይ ኣይኮነን።

²⁰እቲ ነቡከደነፆር ንጉስ ባቢሎን፥ ንኢኮንያን ወዲ ዮዓቂም ንጉስ ይሁዳ ምስ ኵሎም ክቡራት ይሁዳን ኢየሩሳሌምን ካብ ኢየሩሳሌም ናብ ባቢሎን ምስ ማረኸ ዘይወሰዶ፥

²¹እወ፥ ኣቦ ሰራዊት ሰማያት ብዛዕባ እቲ ኣብ ቤት ኣቦናን ኣብ ቤት ንጉስ ይሁዳን ኣብ ኢየሩሳሌምን ዝተረፈ ኣቑሑ ኸምዙይ ይብል ኣሎ፦

²²ናብ ባቢሎን ክውሰዱ እዮም፥ ክሳዕ እታ ኣነ ዝበፅሓሎም መዓልቲ ኸዓ ኣብኡ ክፀንሑ እዮም ይብል ኣቦና። ሽዑ ኸደይቦም፥ ናብዝ ቦታ እዙይ ድማ ክመልሶም እየ።