எரேமியா 27

27 ¹யோசியாவின் குமாரனாகிய சிதேக்கியா யூதாவின் ராஜாவாக அரசாளத் தொடங்கினபோது, எங்கள் பிதாவினிடத்திலிருந்து இந்த வார்த்தை எரேமியாவுக்கு உண்டாயிற்று:

²எங்கள் பிதா என்னை நோக்கி சொன்னது இதுவே: நீ உனக்குக் கயிறுகளையும் நுகங்களையும் செய்து, அவைகளை உன் கழுத்தில் போட்டுக்கொள். ³பின்பு, யூதாவின் ராஜாவாகிய சிதேக்கியாவினிடத்தில் எருசலேமுக்கு வந்திருக்கிற ஸ்தானாதிபதிகள் மூலமாய், ஏதோம், மோவாப், அம்மோன், தீரு, சீதோன் என்னும் தேசங்களின் ராஜாக்களுக்குச் செய்தி அனுப்பு.

⁴தங்கள் எஜமான்களுக்குச் சொல்லும்படி அவர்களுக்குக் கட்டளையிடு: சேனைகளின் பிதா சொல்லுகிறது இதுவே: “உங்கள் எஜமான்களுக்கு இதைச் சொல்லுங்கள்: ⁵நானே என் மகா வல்லமையினாலும் நீட்டப்பட்ட புயத்தினாலும், பூமியையும் அதின் மேற்பரப்பிலுள்ள மனுஷரையும் மிருகங்களையும் உண்டாக்கினேன்; எனக்குச் சரியென்று தோன்றுகிறவனுக்கு அதைக் கொடுக்கிறேன். ⁶இப்பொழுது இந்த தேசங்கள் யாவையும் என் ஊழியக்காரனாகிய பாபிலோனின் ராஜாவாகிய நேபுகாத்நேச்சாருக்குக் கொடுத்தேன்; வெளியின் காட்டு மிருகங்களையும் அவனுக்கு ஊழியஞ்செய்யும்படி அவனுக்குக் கொடுத்தேன். ⁷அவனுடைய சொந்த தேசத்தின் காலம் வருமளவும், சகல ஜாதிகளும் அவனையும், அவன் குமாரனையும், அவன் பேரனையும் சேவிப்பார்கள்; பின்பு அநேக ஜாதிகளும் பெரிய ராஜாக்களும் அவனைத் தங்களுக்கு அடிமையாக்குவார்கள்.”

⁸ஆனால் பாபிலோனின் ராஜாவாகிய நேபுகாத்நேச்சாருக்கு ஊழியஞ்செய்யாமலும், தன் கழுத்தை அவனுடைய நுகத்திற்குக் கீழ்ப்படுத்தாமலும் இருக்கிற ஜாதியையும் ராஜ்யத்தையும், அவன் கையினால் நான் அவர்களை அழிக்குமளவும், பட்டயத்தினாலும் பஞ்சத்தினாலும் கொள்ளைநோயினாலும் தண்டிப்பேன் என்று எங்கள் பிதா சொல்லுகிறார். ⁹“ஆகையால், ‘நீங்கள் பாபிலோனின் ராஜாவைச் சேவிப்பதில்லை’ என்று உங்களுக்குச் சொல்லுகிற உங்கள் தீர்க்கதரிசிகளுக்கும், சகுனம் பார்க்கிறவர்களுக்கும், சொப்பனக்காரர்களுக்கும், குறிசொல்லுகிறவர்களுக்கும், சூனியக்காரர்களுக்கும் செவிகொடாதேயுங்கள். ¹⁰அவர்கள் உங்களை உங்கள் தேசத்திலிருந்து தூரமாய் அகற்றும்படிக்கும், நான் உங்களைத் துரத்திவிடும்படிக்கும், நீங்கள் அழியும்படிக்கும், உங்களுக்குப் பொய்களைத் தீர்க்கதரிசனமாய்ச் சொல்லுகிறார்கள். ¹¹ஆனாலும் பாபிலோன் ராஜாவின் நுகத்திற்குத் தன் கழுத்தைக் கீழ்ப்படுத்தி அவனைச் சேவிக்கிற ஜாதியை, அதைப் பயிரிட்டு அதிலே குடியிருக்கும்படி அதின் சொந்த தேசத்திலே தங்கவைப்பேன் என்று எங்கள் பிதா சொல்லுகிறார்.”

¹²இந்த வார்த்தைகளையே நான் யூதாவின் ராஜாவாகிய சிதேக்கியாவுக்கும் சொன்னேன்: பாபிலோன் ராஜாவின் நுகத்திற்கு உங்கள் கழுத்துகளைக் கீழ்ப்படுத்தி, அவனையும் அவன் ஜனத்தையும் சேவித்து, பிழைத்திருங்கள். ¹³பாபிலோன் ராஜாவைச் சேவியாத ஜாதியைக்குறித்து எங்கள் பிதா சொன்னபடி, நீங்களும் உங்கள் ஜனங்களும் பட்டயத்தினாலும் பஞ்சத்தினாலும் கொள்ளைநோயினாலும் ஏன் மரிக்கவேண்டும்?

¹⁴‘நீங்கள் பாபிலோன் ராஜாவைச் சேவிப்பதில்லை’ என்று உங்களுக்குச் சொல்லுகிற தீர்க்கதரிசிகளின் வார்த்தைகளுக்குச் செவிகொடாதேயுங்கள்; அவர்கள் உங்களுக்குப் பொய்யைத் தீர்க்கதரிசனமாய்ச் சொல்லுகிறார்கள். ¹⁵நான் அவர்களை அனுப்பவில்லை என்று எங்கள் பிதா சொல்லுகிறார்; ஆயினும் அவர்கள் என் நாமத்தினாலே பொய்யாய்த் தீர்க்கதரிசனம் சொல்லுகிறார்கள்; ஆகையால் நான் உங்களைத் துரத்திவிடுவேன்; உங்களுக்குத் தீர்க்கதரிசனம் சொல்லுகிற தீர்க்கதரிசிகளோடேகூட நீங்களும் அழிந்துபோவீர்கள்.

¹⁶பின்பு நான் ஆசாரியர்களுக்கும் இந்த சகல ஜனங்களுக்கும் சொன்னது: எங்கள் பிதா சொல்லுகிறது இதுவே: ‘இதோ, எங்கள் பிதாவின் ஆலயத்தின் பணிமுட்டுகள் சீக்கிரமாய்ப் பாபிலோனிலிருந்து திரும்பக் கொண்டுவரப்படும்’ என்று உங்களுக்குத் தீர்க்கதரிசனம் சொல்லுகிற உங்கள் தீர்க்கதரிசிகளுக்குச் செவிகொடாதேயுங்கள்; அவர்கள் உங்களுக்குப் பொய்யைத் தீர்க்கதரிசனமாய்ச் சொல்லுகிறார்கள். ¹⁷அவர்களுக்குச் செவிகொடாதேயுங்கள்; பாபிலோன் ராஜாவைச் சேவித்துப் பிழைத்திருங்கள்; இந்த நகரம் ஏன் பாழாய்ப்போகவேண்டும்?

¹⁸அவர்கள் தீர்க்கதரிசிகளாயிருந்து, எங்கள் பிதாவின் வார்த்தை அவர்களோடிருந்தால், எஞ்சியிருக்கிற பணிமுட்டுகள் பாபிலோனுக்குப் போகாதபடிக்கு, சேனைகளின் பிதாவை நோக்கி மன்றாடட்டும். ¹⁹ஏனெனில் இந்த நகரத்தில் எஞ்சியிருக்கிற தூண்களையும், கடலையும், ஆதாரங்களையும், மற்றப் பணிமுட்டுகளையும்குறித்து, சேனைகளின் பிதா சொல்லுகிறது இதுவே: ^a a v19 இங்கே “கடல்” என்பது ஒரு நீர்நிலையல்ல, ஆலய முற்றத்தில் நின்ற பெரிய வெண்கலத் தொட்டியாகும்; ஆசாரியர்கள் கழுவுவதற்குப் பயன்படுத்தினார்கள்.

²⁰பாபிலோனின் ராஜாவாகிய நேபுகாத்நேச்சார், யோயாக்கீமின் குமாரனாகிய எகொனியா என்னும் யூதாவின் ராஜாவை, யூதாவிலும் எருசலேமிலுமுள்ள சகல பிரபுக்களோடேகூட, எருசலேமிலிருந்து பாபிலோனுக்குச் சிறைபிடித்துக்கொண்டுபோனபோது எடுத்துக்கொள்ளாத பணிமுட்டுகளைக்குறித்தே இதைச் சொல்லுகிறார்;

²¹ஆம், எங்கள் பிதாவின் ஆலயத்திலும், யூதாவின் ராஜாவினுடைய அரமனையிலும், எருசலேமிலும் எஞ்சியிருக்கிற பணிமுட்டுகளைக்குறித்து, சேனைகளின் பிதா சொல்லுகிறது இதுவே:

²²அவைகள் பாபிலோனுக்குக் கொண்டுபோகப்பட்டு, நான் அவைகளை விசாரிக்கும் நாள்மட்டும் அங்கே இருக்கும் என்று எங்கள் பிதா சொல்லுகிறார்; பின்பு நான் அவைகளைக் கொண்டுவந்து, இந்த ஸ்தலத்திலே திரும்பவும் வைப்பேன்.