آتا بابئلئن حؤکمرانلیغینی تعیئن ادر
اِرِمیا تاختادان بئر یوغ تاخیر و بش قونشو پادشاهین اِلچئلرئنه خبر گؤندَرئر: نِبوکَدنِصّره قوللوق ادئن و یاشایین. معبدئن قابلارینین تئزلئکله گری قاییداجاغینی وعده ورن پیغمبرلر یالان دیئرلر. قابلار بابئله گده‌جک، و اونلارین نه واخت قاییداجاغینا آنجاق آتامیز قرار ورئر.
27 1یوشئیا اوغلو صئدقئیا یهودا پادشاهی اولوب سلطنت اتمَیه باشلایاندا، آتامیزدان اِرِمیایا بو سؤز نازئل اولدو:
2آتامیز منه بله ددی: اؤزونه بندلری و یوغ آغاجلاری دوزَلت و اونلاری بوینونا قوی. 3سونرا یهودا پادشاهی صئدقئیانین یانینا اورشلئمه گلن اِلچئلری واسئطه‌سی‌ائله اِدوم، موآب، عَمّون، صور و صئدون پادشاهلارینا خبر گؤندَر.
4اونلارا امر ات کی، آغالارینا بله دسئنلر: قوشونلارین آتاسی بله بویورور: «آغالارینیزا بونو دیئن: 5”من اؤزوم یری، اونون اوزونده‌کی ائنسانلاری و حیوانلاری بؤیوک قودرتئمله و اوزادیلمیش قولوملا یاراتدیم و اونو گؤزومه دوز گلن هر کسه ورئرم. 6ائندی بوتون بو تورپاقلاری قولوم بابئل پادشاهی نِبوقَدنِصَّره وردئم؛ حتّا چؤلون وحشی حیوانلارینی دا اونا قوللوق اتسئنلر دیئه اونا وردئم. 7بوتون مئلّتلر اؤز تورپاغینین واختی گلنه قدر اونا، اونون اوغلونا و نوه‌سئنه قوللوق اده‌جکلر؛ او واخت بئر چوخ مئلّت و بؤیوک پادشاهلار اونو اؤزلرئنه قوللوق اتدئره‌جکلر.“»
8آمّا بابئل پادشاهی نِبوقَدنِصَّره قوللوق اتمیه‌جک و بوینونو اونون یوغو آلتینا قویمایاجاق مئلّت و یا پادشاهلیق اولسا، او مئلّتی، اونون الی‌ائله محو اده‌نه قدر، قیلینج، آجلیق و وبا ائله جزالاندیراجاغام، آتامیز بویورور. 9«اونا گؤره، سئزه ”بابئل پادشاهینا قوللوق اتمیه‌جکسئنئز“ دیئن پیغمبرلرئنئزه، فالچیلارینیزا، رؤیا گؤرنلرئنئزه، گله‌جک‌دیئنلرئنئزه و جادوگرلرئنئزه قولاق آسمایین. 10”اونلار سئزه یالان نبئلئک ادئرلر، سئزی اؤز تورپاغینیزدان اوزاقلاشدیریرلار؛ من سئزی قوواجاغام و اؤله‌جکسئنئز. 11آمّا بوینونو بابئل پادشاهینین یوغو آلتینا گتئرن و اونا قوللوق ادن مئلّتی اؤز تورپاغیندا بوراخاجاغام، آتامیز بویورور، کی اونو ائشله‌سئن و اورادا یاشاسین.“»
12من یهودا پادشاهی صئدقئیایا دا هامان بو سؤزلری ددئم: بوینونوزو بابئل پادشاهینین یوغو آلتینا قویون، اونا و اونون خالقینا قوللوق ادئن و یاشایین. 13نئیه سن و سنئن خالقین، آتامیزین بابئل پادشاهینا قوللوق اتمیه‌جک مئلّت حاقّیندا بویوردوغو کئمی، قیلینجلا، آجلیقلا و وبا ائله اؤله‌سئنئز؟
14سئزه ”بابئل پادشاهینا قوللوق اتمیه‌جکسئنئز“ دیئن پیغمبرلره قولاق آسمایین، چونکی اونلار سئزه یالان نبئلئک ادئرلر. 15من اونلاری گؤندَرمه‌مئشم، آتامیز بویورور، آمّا اونلار منئم آدیمدا یالاندان نبئلئک ادئرلر، اونا گؤره من سئزی قوواجاغام و هلاک اولاجاقسینیز — هم سئز، هم ده سئزه نبئلئک ادن پیغمبرلر.
16سونرا من کاهئنلره و بوتون بو خالقا ددئم: آتامیز بله بویورور: سئزه ”باخین، آتامیزین اِوئنئن اشیالاری تئزلئکله بابئلدن گری گتئرئله‌جک“ دیئه نبئلئک ادن پیغمبرلرئنئزه قولاق آسمایین — اونلار سئزه یالان نبئلئک ادئرلر. 17اونلارا قولاق آسمایین. بابئل پادشاهینا قوللوق ادئن و یاشایین. نئیه بو شهر خارابایا دؤنسون؟
18آمّا اگر اونلار پیغمبردئرلرسه و آتامیزین سؤزو اونلاردادیرسا، قوی قوشونلارین آتاسینا یالوارسینلار کی، اونون اِوئنده، یهودا پادشاهینین اِوئنده و اورشلئمده قالان اشیالار بابئله گتمه‌سئن. 19چونکی قوشونلارین آتاسی سوتونلار، دنیز، پایالار و بو شهرده قالان او بئری اشیالار حاقّیندا بله بویورور، a a v19 بورادا «دنیز» بئر سو حؤوضه‌سی دیئل، بلکه معبدئن حیطئنده دوران و کاهئنلرئن یویونماق اوچون ائشله‌تدئیی نهنگ بورونج لَیَن‌دئر.
20او اشیالار کی، بابئل پادشاهی نِبوقَدنِصَّر یهودا پادشاهی یِهویاقئم اوغلو یِکونیانی یهودا و اورشلئمئن بوتون اعیانلاری ائله بئرلئکده اورشلئمدن بابئله اسئر آپاراندا، اونلاری گؤتورمه‌دی،
21بلی، قوشونلارین آتاسی آتامیزین اِوئنده، یهودا پادشاهینین اِوئنده و اورشلئمده قالان اشیالار حاقّیندا بله بویورور:
22اونلار بابئله آپاریلاجاق و من اونلارین دالینجا گلن گونه قدر اورادا قالاجاقلار، آتامیز بویورور. سونرا من اونلاری یوخاری گتئرئب بو یره قایتاراجاغام.
