Bouei Babilon Sangle Sakkuda
Jeremiaei lolo hele hoba kaangkhüh angkhüm yeian, aenei sangle Choba shuongeibü ngühlang künbü shuong to Nebukadnezar ik to natenla hoba longan kila dogo ngüh hautikei. Bou chem peisilei sepeinyu louibalabü dogo chühenbü thuseibü shuong kho shangiednyu kibü ki. Peisilei kho Babilon to haulabü, hoba touje leibala shanga seneibü Bou lolo janenda.
27 1Josiaeibü shou Zedekia Jihuda Choba la songdakla khangbü jihsiphaia, Jeremia jungto Boueibü habü ngüh loukei,
2Bouei kü to hai laukei, Nyi lolo hele hoba kaangkhüh angkhüm yeitishi, hoba khübü kaibü ngüma phoashi. 3Kheijinei Jerusalem to Jihuda Choba Zedekia jungto loubü ngühthonbü shuong danko, Edom Choba, Moab Choba, Ammon Choba, Tair Choba hoba Sidon Choba jungto ngühlang hautishi.
4Haoen to jembü bunyubou shuong to lenla sakkushi, Lakjaibü dan Bouei hai lauda, “Kaneibü bunyubou shuong to hai lenashi, 5Ngei kü seiei hoba phak shingbüei kaodak, kho taka kibü müt hoba meisiau shuong ham yaükei, hoba ngei aoyou la tükde dogo chühenda, hao la ho kulabü. 6Tou ngei habü kaonyek pendou Babilon Choba Nebukadnezar, kü khangenbou la kua; hoba khambü yamkabü meisiau shuongkei hao khangenla ngei hao la kua. 7Phang pendouei hao, hao shou hoba hao shi khangenlabü, hao jembü kaodak jihsiphai asühshongko; kheijinei phang juong hoba Choba yaangbü shuongei hao to haoen khangenla kümlabü.”
8Lausikei Babilon Choba Nebukadnezar to akhangenlaje, ayingsi hao kaangkhüh phanga jembü ngüm aphojan phang ayingsi sangle kho, kho phang to ngei inei, mühsinou hoba limei shieikoelabü, dogo Bouei lauda, ngei haoeibü ikei haoen amautishongko. 9“Kheijinei kaneibü thuseibü shuong, seibüyaübü shuong, manghlibou shuong, manghtakbü shuong, ayingsi takbüthapbü shuong, aoyouei kan to, ‘Kanei Babilon Choba akhangenlabü,’ dogo lenbü to kanei ngüha alejan. 10Haoenei kan to amlangbü tetenko lauda, kan kaneibü kaodak ka saabü to hautida; ngei kan shian aplabü, hoba kanei hailabü. 11Lausikei Babilon Choba kaangkhüh phanga jembü ngüm phoan hao khangenbü phang kho, ngei kho jembü kaodaka tephokulabü, dogo Bouei lauda, kho ungla hoba khünei kila.”
12Ngei Jihuda Choba Zedekia to habü ngüh jeteitham laukei, Babilon Choba kaangkhüh phanga kaneibü ngüm phoashi, hao hoba hao mütshuong khangenshi, hoba lang kishi. 13Babilon Choba akhangenlabü phang shangabü Bouei laubü tegü, nyi hoba kaibü mütshuong aila inei, mühsinou hoba limei hailabü?
14Aoyouei kan to, ‘Kanei Babilon Choba akhangenlabü,’ dogo lenbü thuseibü to ngüha alejan, aishanga haoenei kan to amlangbü tetenko lauda. 15Ngei haoen ahauti, dogo Bouei lauda, kheijinei haoenei kü nyena amlangbü tetenko lauda, khoei ngei kan shian aplabü hoba kanei maulabü—kan hoba kan to tetenko laubü thuseibü shuong.
16Kheijinei ngei ungshedbou shuong hoba habü mütshuong pendou to laukei, Bouei hai lauda, ‘Chühashi, Bou chema kibü peisilei shuong Babilon ka longche kian longeitilabü,’ dogo tetenko laubü kaneibü thuseibü to ngüha alejan—haoenei kan to amlangbü tetenko lauda. 17Haoen to ngüha alejan. Babilon Choba khangenshi hoba lang kishi. Habü sangnyu aila leilubü la yeitida?
18Lausikei haoen thuseibü yingalonga, hoba Boueibü ngüh haoen yoa kialonga, haoeibü chema, Jihuda Choba chema hoba Jerusalema joubü peisilei shuong Babilon to ahaula shanga, haoen Lakjaibü dan Bou to sukujakushi. 19Aishanga thaonyu shuong, Yungnyu, khamthung shuong, hoba habü sangnyua joubü peisilei shuong shangabü Lakjaibü dan Bouei hai lauda, a a v19 Habü “Yungnyu” kho dei aying, lausikei Lembüchem chemsophanga lobü chinamei kümbü yaangbü phau che ki, aoyou ungshedbou shuongei shisho shanga tetsikei.
20Babilon Choba Nebukadnezarei Jihuda Choba Jehoiakim shou Jekhonia hoba Jihuda si Jerusalembü yaangenbü shuong pendou yoa Jerusalem ka Babilon to langsenbü jihsiphaia alebü peisilei shuong,
21hoat, Bou chema, Jihuda Choba chema hoba Jerusalema joubü peisilei shuong shangabü Lakjaibü dan Bouei hai lauda,
22Khübü Babilon to künan ngailabü hoba khünei khüplabü, ngei khübü shanga loulabü chalou asühshongko, dogo Bouei lauda. Kheijinei ngei khübü leibalabü hoba habü kishang to longeitilabü.
