Bouei Amlangbü Thuseibü Che Loushatda
Hananiei po nyi insiaubu Babilon kaangkhüh jangthetlabü dogo chemsophanga chühenkei, hoba kho chühla shanga Jeremiaeibü kaangkhüh jangthetkei. Jeremiaei Amen dogo jongaikei, kheijinei bu kaangkhüh kuilan tek kaangkhüh yoa louiban, Hanani to nyi mütshuong shangiednyu to maanglemla leilubü shanga hailabü dogo lenkei. Hao haikei.
28 1Kho poa, Jihuda Choba Zedekiaei songdakbü shaangla, po leiboubü ngaoboubü lita, Gibeonbü Azzureibü shou thuseibü Hananiei, Bou chema, ungshedbou hoba mütshuong pendou thedanga, ngo to laukei: 2“Thükenbou Bunyubou, Israelbü Mühghaüei lauda: Ngei Babilon Chobaeibü on leiluan apbei. 3Babilon Choba Nebukadnezzarei Bunyubou chemeibü peisilei pendou han ka Babilon to lekei; khübü po nyi onbüa ho kaonyek to ngei leingaibalabü. 4Jihuda Choba Jehoiakimeibü shou Jekhonia hoba Babilon to langsenbü Jihudabü pendou kho, ho kaonyek to ngei leingaibalabü, dogo Bunyubouei lauda, aishanga ngei Babilon Chobaeibü on leilulabü.”
5Thuseibü Jeremiaei, Bou chema loan kibü ungshedbou hoba mütshuong pendou thedanga, thuseibü Hanania to jongaikei. 6Thuseibü Jeremiaei laukei: “Amen! Bouei kho tegü kümshi. Babilon ka Bou chemeibü peisilei hoba langsenbü pendou ho kaonyek to leingaibajinei, nyi tetenko lauyobü ngüh kho khei yingtishi. 7Lausikei tou ngei ka to hoba ho mütshuong pendou to lenbü ho ngüh ditashi: 8Sen thedanga shangiednyu kibü thuseibü shuongei phang juong hoba sangle yaangbü shuong khulimbo wapyo, thushed, hoba limei kho tetenan laukei. 9Sangmai tetenbü thuseibü kho, haoeibü ngüh loushedlabü jihsiphaia ong, Bouei maimaitham hautibü thuseibü dogo ngelabü.”
10Kheijinei thuseibü Hananiei thuseibü Jeremiaeibü ngüma ka on angkhüm sungan apbei, hoba kho leiluan apbei, 11Hananiei mütshuong pendou to laukei, “Bunyubouei hai lauda: Kho tegü ngei po nyi onbüa Babilon Choba Nebukadnezzareibü on phang pendoueibü ngüma ka leiluan aplabü.” Kheijinei thuseibü Jeremia haukei.
12Hananiei thuseibü Jeremiaeibü ngüma ka on angkhüm leiluan apbü phaia, Boueibü ngüh Jeremia jungto loukei:
13“Hauan Hanania to lenashi: Bouei lauda: Nyi buei kümbü angkhüm leiluan apbei, lausikei nyi khü jeila nameibü angkhüm kümlabü. 14Aishanga Thükenbou Bou, Israelbü Boueibü hai lauda: Babilon Choba Nebukadnezzar khangenla shanga, ngei ho phang pendoueibü ngüma to nameibü on phoakei, hoba haoenei khangenlabü. Ngei hao la yamkabü meisiau ham kuakei.”
15“Thuseibü Jeremiaei thuseibü Hanania to laukei, ‘Ditashi, Hanania! Bouei no ahautikei; nyi ho mütshuong to amlangbü ngüha mailemtikei.’
16Khoei Bouei lauda: Ho poa ngei no kaodak ka sungenlabü; nyi Bou to khulimbo loula ngekbü shanga hailabü.”
17Hobaje thuseibü Hanania kho poatham, nyetboubü lita haikei.
