ዘፀኣት 15 FHB Father's Heart Bible™

15 ¹ሽዑ ሙሴን ደቂ እስራኤልን እዝ መዝሙር እዙይ ንኣቦና ዘመሩ፦ ንኣቦና እዝምር ኣለኹ፥ ብኽብሪ ሰዓሩ እዩ እሞ፤ ንፈረስን ንፈረሰኛኡን ናብ ባሕሪ ደርበዮም። ²ኣቦና ሓይለይን መዝሙረይን እዩ፤ ንሱ ኸዓ ምድሓነይ ኮይኑ እዩ፤ እዙይ ኣቦይ እዩ፥ ከመስግኖውን እየ፥ ኣምላኽ ኣቦይ እዩ፥ ልዕል ከብሎውን እየ። ³ኣቦና ተዋጋኢ እዩ፤ ኣቦና ስሙ እዩ። ⁴ፈርዖን ንሰረገላታቱን ንሰራዊቱን ናብ ባሕሪ ደርበዮም፤ ሕሩያት መሳፍንቲ ኸዓ ኣብ ባሕሪ ኤርትራ ሰጠሙ። ^a a v4 ብዕብራይስጢ፦ ያም ሱፍ፥ “ባሕሪ ኣእዋም”። ⁵እቲ መዓሙቝ ማይ ኸደኖም፤ ከም እምኒ ድማ ናብ መዓሙቝ ወረዱ። ⁶ኦ ኣቦና! የማነይትኻ ብሓይሊ ግርምቲ እያ፤ ኦ ኣቦና! የማነይትኻ ነቲ ፀላኢ ትሰብሮ። ⁷ብዕቤት ግርማኻ ነቶም ዝትንስኡኻ ትግልብጦም፤ ነቲ ዝነድድ ቍጥዓኻ ትሰዶ፤ ከም ሓሰር ከዓ ይበልዖም። ⁸ብእስትንፋስ ኣፍንጫኻ እቲ ማይ ተኸመረ፤ እቲ ዝውሕዝ ማይ ከም ኵምራ ቆመ፤ እቲ መዓሙቝ ማይ ኣብ ልቢ ባሕሪ ረጎደ። ⁹እቲ ፀላኢ ድማ “ክስዕብ፥ ክርከብ፥ ነቲ ምርኮ ኸዓ ክመቅል እየ፤ ብእኡ ድማ ክፀግብ እየ። ሰይፈይ ክመልሕ እየ፤ ኢደይ ከዓ ከተጥፍኦም እያ” በለ። ¹⁰ብንፋስካ ነፋሕካ፤ እቲ ባሕሪ ኸደኖም፤ ኣብቲ ብርቱዕ ማይ ከም ዕረር ሰጠሙ። ¹¹ኦ ኣቦና! ኣብ ማእኸል ኣማልኽቲ ኸማኻ መን ኣሎ? ብቕድስና ግሩም፥ ብኽቡር ተግባራት ዝፍራሕ፥ ተኣምራት ዝገብር፥ ከማኻ መን ኣሎ? ¹²የማነይትኻ ዘርጋሕካ፤ እታ ምድሪ ኸዓ ወሓጠቶም። ¹³ብምሕረትካ ነቲ ዝተበዣኻዮ ህዝቢ መራሕካዮ፤ ብሓይልኻ ድማ ናብ ቅዱስ ማሕደርካ መራሕኻዮም። ¹⁴እቶም ህዝብታት ሰምዑ፤ ተንቀጥቀጡ፤ ንህዝቢ ፍልስጥኤም ድማ ጓህ ሓዞም። ¹⁵ሕዚ እቶም ሹመኛታት ኤዶም ሰምበዱ፤ ነቶም ዓበይቲ ሞኣብ ራዕዲ ሓዞም፤ ኵሎም እቶም ኣብ ከነዓን ዝነብሩ ኸዓ መኸኹ። ¹⁶ፍርሓትን ራዕድን ወደቖም፤ ብዕቤት ቅልፅምካ ህዝብኻ ኽሳዕ ዝሓልፍ፥ ኦ ኣቦና! እቲ ዝዓደግካዮ ህዝቢ ኽሳዕ ዝሓልፍ፥ ከም እምኒ ቀሰሙ። ¹⁷ናብ ውሽጢ ኸተእትዎምን ኣብ እምባ ርስትኻ ኽትተኽሎምን ኢኻ፤ ኦ ኣቦና! ነታ ንማሕደርካ ዝገበርካ ቦታ፥ ኦ ልዑል ኣቦ! ነቲ ኣእዳውካ ዘቘመቶ መቕደስ። ¹⁸ኣቦና ንዘለኣለመ ኣለም ክነግስ እዩ።

¹⁹ኣፍራስ ፈርዖንን ሰረገላታቱን ፈረሰኛታቱን ናብ ባሕሪ ምስ ኣተዉ፥ ኣቦና ንማይ እታ ባሕሪ ኣብ ልዕሊኦም መለሶ፤ ደቂ እስራኤል ግና ብንቑፅ ምድሪ ኣቢሎም ብማእኸል እታ ባሕሪ ተሳገሩ። ²⁰ማርያም እታ ነብይት፥ ሓፍቲ ኣሮን፥ ከበሮ ብኢዳ ወሰደት፤ ኵለን እተን ኣንስቲ ኸዓ ብኸበሮን ብስዕስዒትን ሰዓባኣ። ²¹ማርያም ድማ ከምዙይ ኢላ ዘመረትሎም፦ “ንኣቦና ዘምሩሉ፥ ብኽብሪ ሰዓሩ እዩ እሞ፤ ንፈረስን ንፈረሰኛኡን ናብ ባሕሪ ደርበዮም።”

ናብ ምድረ በዳ

²²ሙሴ ድማ ንእስራኤል ካብ ባሕሪ ኤርትራ ናብ ምድረ በዳ ሱር መርሖም፤ ኣብቲ ምድረ በዳ ሰለስተ መዓልቲ ተጓዒዞም ማይ ኣይረኸቡን። ²³ናብ ማራ መፁ፤ እቲ ማይ ግና መሪር ስለ ዝነበረ ኽሰትይዎ ኣይከኣሉን። ስለዙይ ከዓ ማራ ተሰምየት። ²⁴እቲ ህዝቢ ድማ ኣብ ልዕሊ ሙሴ ኣጕረምረሙ፥ “እንታይ ክንሰቲ ኢና?” ከዓ በሉ። ²⁵ናብ ኣቦና ጨደረ፤ ንሱ ኸዓ ሓደ ጉንዲ ኦም ኣርኣዮ፤ ናብቲ ማይ ደርበዮ፤ እቲ ማይ ድማ ጥዑም ኮነ። ኣብኡ ኣቦና ሕግን ስርዓትን መደበሎም፥ ኣብኡ ድማ ፈተኖም።

²⁶ንሱ ድማ ከምዙይ በለ፦ “ንቓል ኣቦኻ ብሓቂ እንተ ሰማዕኻ፥ ኣብ ቅድሚኡ ቅኑዕ እንተ ጌርካ፥ ንትእዛዛቱ እንተ ተኣዘዝካ፥ ኵሉ ሕግጋቱ ድማ እንተ ሓሎኻ፥ ካብቲ ኣብ ልዕሊ ግብፂ ዘውረድኩዎ ሕማም ሓደ እኳ ኣባኻ ኣየውርድን እየ፤ ኣነ ኣቦኻ እቲ ዝፍውሰካ እየ እሞ።” ^b b v26 ኣብ መሪር ማይ ማራ፥ ኣቦና ከም እቲ ዝፍውስ ኮይኑ ንርእሱ ገለፀ፤ ነቲ ምረት ናብ ጥዑም እናለወጠ፥ ንርእሱ ኸዓ ከም ፈዋሲ ህዝቡ ኾይኑ ምሳታቶም ተኣሰረ።

²⁷ናብ ኤሊም ድማ መፁ፤ ኣብኣ ኸዓ ሰብዓ ኦም ተምርን ዓሰርተ ኽልተ ዓይኒ ማይን ነበረ፤ ኣብኡ ድማ ኣብ ጥቓ እቲ ማይ ሰፈሩ።