Mathayo 7

7 ¹"Msihukumu, ili nanyi msije mkahukumiwa. ²Kwa maana kwa hukumu mnayohukumu, ndivyo mtakavyohukumiwa, na kwa kipimo mnachopima, ndivyo mtakavyopimiwa. ³Kwa nini unatazama kibanzi kilicho ndani ya jicho la ndugu yako, lakini boriti iliyo ndani ya jicho lako mwenyewe huioni? ⁴Au unawezaje kumwambia ndugu yako, 'Niache nikitoe kibanzi ndani ya jicho lako,' na kumbe boriti imo ndani ya jicho lako mwenyewe? ⁵Ewe mnafiki, itoe kwanza boriti ndani ya jicho lako mwenyewe; ndipo utakapoona wazi kukitoa kibanzi ndani ya jicho la ndugu yako.

⁶"Msiwape mbwa kilicho kitakatifu, wala msitupe lulu zenu mbele ya nguruwe—wasije wakazikanyaga kwa miguu yao, kisha wakageuka na kuwararua vipande vipande.

Baba Huwapa Wale Waombao

⁷"Ombeni, nanyi mtapewa; tafuteni, nanyi mtaona; bisheni hodi, nanyi mtafunguliwa. ⁸Kwa maana kila aombaye hupewa, naye atafutaye huona, naye abishaye hodi atafunguliwa. ⁹Au ni mtu yupi miongoni mwenu, ambaye mwanawe akimwomba mkate, atampa jiwe? ¹⁰Au akiomba samaki, atampa nyoka? ¹¹Basi ikiwa ninyi mlio waovu mnajua kuwapa watoto wenu vipawa vyema, si zaidi sana Baba yenu wa mbinguni atawapa mema wale wamwombao?

¹²"Basi, katika kila jambo, watendeeni watu kama vile mtakavyo wawatendee ninyi; kwa maana hii ndiyo Torati na Manabii.

¹³"Ingieni kwa kupitia mlango ulio mwembamba, kwa maana mlango ni mpana, na njia ni pana iendayo upotevuni, nao ni wengi waingiao kwa kuipitia. ¹⁴Bali mlango ni mwembamba, na njia ni nyembamba iendayo uzimani, nao ni wachache waionao.

Hutambulika kwa Matunda Yao

¹⁵"Jihadharini na manabii wa uongo: huja kwenu wakiwa wamevaa mavazi ya kondoo, lakini ndani ni mbwa-mwitu wakali wanaorarua. ¹⁶Kwa matunda yao mtawatambua. Je, watu huchuma zabibu katika miti ya miiba, au tini katika mibaruti? ¹⁷Vivyo hivyo, kila mti mwema huzaa matunda mema, bali mti mbaya huzaa matunda mabaya. ¹⁸Mti mwema hauwezi kuzaa matunda mabaya, wala mti mbaya kuzaa matunda mema. ¹⁹Kila mti usiozaa matunda mema hukatwa na kutupwa motoni. ²⁰Basi, kwa matunda yao mtawatambua.

Ni Wale Tu Wafanyao Mapenzi ya Baba

²¹"Si kila mtu aniambiaye, 'Bwana, Bwana,' atakayeingia katika ufalme wa Baba yetu, bali yeye afanyaye mapenzi ya Baba yangu aliye mbinguni. ²²Wengi wataniambia siku ile, 'Bwana, Bwana, je, hatukutabiri kwa jina lako, na kwa jina lako kutoa pepo, na kwa jina lako kufanya miujiza mingi?' ²³Ndipo nitakapowaambia waziwazi: 'Sikuwajua ninyi kamwe; ondokeni kwangu, ninyi watenda maovu.'

Jenga Juu ya Mwamba

²⁴"Basi kila mtu ayasikiaye maneno yangu haya na kuyafanya, atafananishwa na mtu mwenye busara aliyeijenga nyumba yake juu ya mwamba. ²⁵Mvua ikanyesha, mafuriko yakaja, pepo zikavuma, zikaipiga nyumba ile, lakini haikuanguka, kwa maana msingi wake ulikuwa juu ya mwamba. ²⁶Na kila mtu ayasikiaye maneno yangu haya asiyeyafanya, atafananishwa na mtu mpumbavu aliyeijenga nyumba yake juu ya mchanga. ²⁷Mvua ikanyesha, mafuriko yakaja, pepo zikavuma, zikaipiga nyumba ile, ikaanguka—na kuanguka kwake kulikuwa kukubwa."

²⁸Ikawa Yesu alipomaliza kusema maneno haya, makutano wakastaajabishwa na mafundisho yake, ²⁹kwa sababu alikuwa akiwafundisha kama mtu mwenye mamlaka, wala si kama waandishi wao.