Matthew 7 FHB Father's Heart Bible™

7 ¹“Bisar nakoribi, titia tumikhan ke bhi bisar nakoribo. ²Kilemane tumikhan kineka bisar kore, eneka tumikhan ke bhi bisar koribo; aru tumikhan ki naap pora naap diye, eneka tumikhan ke bhi naap kori dibo. ³Tumi kele tumar bhai laga suku te thaka dhuli tu dikhe, kintu nijor laga suku te thaka dangor khuri tu nadikhe? ⁴Nahole, tumar nijor laga suku te khuri thaka homoi te, tumi kineka tumar bhai ke kobo pare, ‘Ahh, moi tumar suku pora dhuli tu ulai dibo’? ⁵Hey kapati manuh, prothom tumar nijor laga suku pora khuri tu ulabi; titia tumar bhai laga suku pora dhuli ulabole bhal pora dikhibo.

⁶“Pobitro jinis tu kutta khan ke nadibi, aru tumikhan laga moti khan gahori khan age te naphelabi—tarkhan eitu theng pora chepai dibo, titia ghuri kene tumikhan ke phatai dibo.

Manga Khan Ke Pitri pora Diye

⁷“Mangbi, titia tumikhan paabo; bisaribi, titia pabo; dorja te marbi, titia tumikhan nimite khuli dibo. ⁸Kilemane kun mange tai pai, kun bisare tai pai, aru kun dorja te mare, tar nimite khuli dibo. ⁹Nahole, tumikhan majot te kun eneka manuh ase, jun laga putro pora roti mangile, tai ke pathor dibo? ¹⁰Nahole, maas mangile, tai ke saap dibo? ¹¹Titia hoile, tumikhan biya hoilebi, nijor bacha khan ke bhal uphar dibole jane, tenehoile sorgot te thaka tumar Pitri pora Tai ke manga khan ke kiman bhal jinis aru nadibo?

¹²“Titia hoile, sob kaam te, tumikhan kineka manuh khan pora tumikhan logot te kora bisare, eneka tumikhan bhi tarkhan logot te koribi; kilemane eitu he Niyom aru Bhabobadi khan ase.

¹³“Soru dorja pora ghusi jabi, kilemane dangor dorja aru chaukhana rasta tu khotom hua phale loijai, aru bisi manuh eitu pora ghusi jai. ¹⁴Kintu jibon phale loijai dorja tu soru aru rasta tu bhi soru ase; komti manuh he eitu pai.

Tarkhan laga Phol pora Chini Loi

¹⁵“Misa bhabobadi khan pora hoshiar thakibi: tarkhan mer laga kapra lagai kene tumikhan logot te ahe, kintu bhitor te bhuka rong-kutta khan ase. ¹⁶Tarkhan laga phol pora tumikhan tarkhan ke chini lobo. Kata ghas pora angur, nahole kata guti pora dimoru phol joma kore naki? ¹⁷Eneka pora, sob bhal ghas pora bhal phol dhore, kintu biya ghas pora biya phol dhore. ¹⁸Bhal ghas pora biya phol dhoribo napare, aru biya ghas pora bhal phol dhoribo napare. ¹⁹Kun ghas bhal phol nadhore, eitu katikena jui te phelai diye. ²⁰Titia hoile, tarkhan laga phol pora tumikhan tarkhan ke chini lobo.

Khali Pitri laga Itcha Kora Khan

²¹“Moi ke, ‘Prabhu, Prabhu,’ kua sob manuh amar Pitri laga rajyo te naghusibo, kintu sorgot te thaka moi laga Pitri laga itcha kun kore, tai he ghusibo. ²²Hei din te bisi manuh Moi ke kobo, ‘Prabhu, Prabhu, amikhan Apuni laga nam te bhabobani kora nai naki, Apuni laga nam te bhoot khan khedai diya nai naki, Apuni laga nam te bisi asurit kaam kora nai naki?’ ²³Titia Moi tarkhan ke sidha koi dibo, ‘Moi tumikhan ke kitia bhi chini pua nai; hey niyom bhanga khan, Moi logot pora dur jabi.’

Pathor Uporte Ghor Bonabi

²⁴“Titia hoile, kun manuh Moi laga eitu kotha khan huni kene mane, tai pathor uporte ghor bona gyaani manuh nisena hobo. ²⁵Borkhun ahhise, pani bhorta hoise, hawa marise aru hei ghor te lagise, kintu eitu nagiri, kilemane pathor uporte bonaise. ²⁶Aru kun manuh Moi laga eitu kotha khan huni kene namane, tai balu uporte nijor ghor bona murkho manuh nisena ase. ²⁷Borkhun ahhise, pani bhorta hoise, hawa marise aru hei ghor te lagise, aru eitu giri jaise—aru eitu laga gira tu bisi dangor thakise.”

²⁸Jitia Jisu eitu kotha khan kobole khotom korise, titia manuh bhir khan Tar sikhai diya kotha te asurit hoise, ²⁹kilemane Tai adhikar thaka ekjon nisena tarkhan ke sikhai thakise, aru tarkhan laga niyom likha khan nisena nohoi.