Matthew 7

7 ¹"Bichar masaalu, chithākha nathumli bichar masāmara. ²Kaja nathumlila bichar sāmi chi, nathumna bichar sākhami tākam eina ngasāra; kala nathumlila tamsangmi chi, nathumna tamsangkhami tākam eina ngasāra. ³Khisāda nachināwui mikli lei khayim kazang chi yangda namikli lei thingngumrikha kazang chi matheikhala? ⁴Lah, nawui mikli thingngumrikha kazang leilaga, kathada nachināli, 'Namikli khayim kazang chi ina kheimiga,' da hāngpairakhala? ⁵Phākakhaninga nao, rida namikli lei thingngumrikha kazang chi kheishoklu; chi thili nachināwui mikli lei khayim kazang chi kheishok khavai mathingrik eina yangtheira.

⁶"Fali kathara kahai chi makhamialu, lah nawui pearl chi hokbingwui mangāli mahoralu; maningakha athumna chi pheizingli naikazamra, chiwui thili ngalanlaga nathumli serkazamra.

Avāna Kapobingli Khamila

⁷"Polu mira, phālu samphangra, shaolu shomira. ⁸Kaja kachiva̱ kapo mili mira, kachiva̱ kaphā mina samphangra, kala kachiva̱ kashao mili chi shomira. ⁹Lah nathumwui ngachaili mi khipāna, anaomayarana kashakazā poakha ngalung mikhala? ¹⁰Lah khai poakha phara̱ mikhala? ¹¹Nathum maphasālala, nathumwui naongarāli khamathā lemmet mitheiakha, kazingramli khalei nathumwui Avāna ali kapobingli kayākha mataida khamathā ot mirakhala?

¹²"Chieina ot saikorali, mibingna nathumli sāki khavai nathumna phaninga chithāda, nathumnala mibingli sālu; kaja ain kala marānbingwui tui chi hina.

¹³"Khamasha̱ ngavei eina zanglu, kaja sākazamki thānmi kahai ngavei chi mashālāka, kala shongfa chila mashālāka; mi kachungkhana chi eina zanga. ¹⁴Kha kharingli thānmi kahai ngavei chi masha̱laka, kala shongfa chila masha̱laka; chi samphanga mi kateokhamānga.

Athumwui Athei Eina Theisera

¹⁵"Minama marānbingli ningngasharlu: athumna yaowui kashankachon eina nathumli rāra, kha alungli sākashi ramfabingna. ¹⁶Athumwui athei eina nathumna athumli theira. Kashātrongwui eina drakhāthei, lah kuivāwui eina khaorāthei phākhuishapakha? ¹⁷Chithada sāda, kaphā thingrong kachiva̱na kaphā athei matheira, kha makaphā thingrongna makaphā athei matheira. ¹⁸Kaphā thingrongna makaphā athei matheirarmana, kala makaphā thingrongna kaphā athei matheirarmana. ¹⁹Khamathā athei makhamathei thingrong peichaona ta̱tekhaida meilung alungli horsanghaora. ²⁰Chiwui vang eina, athumwui athei eina nathumna athumli theishingkhuira.

Avāwui Ning Sāpabingmang

²¹"‘Proho, Proho’ da ili kaho mi kachiva̱na ithumwui Avā wungramli mazangrarmana, kha kazingramli khaleia iwui Avāwui ning sāpapama zangra. ²²Chithang mi kachungkhana ili hāngra, ‘Proho, Proho, ithumna nawui ming singda marānmi, nawui ming singda chipee kashamshokmi, kala nawui ming singda matakhak kahai ot kachungkha sāmi kaji maningmala?’ ²³Chieina ina athumli meisā eina hāngra: ‘Ina nathumli katang matheimana; iwui eina thuihaolu, O ain sākakhaibing.’

Lunghārtungli Sākālu

²⁴"Chiwui vang eina, iwui tui hi shālaga ot kasā mi kachiva̱ chiya, awui shim lunghārtungli sākahai thangmei mi akha kathāna. ²⁵Zingrot rothaiwa, tara̱ kaphong rāhaowa, masi phanda shim chili ungpharza̱lala, kha chi makongluimana, khikhalajila chi lunghārtungli phāshok kahaina. ²⁶Kala iwui tui hi shālaga ot makasā mi kachiva̱ chiya, awui shim situitungli sākahai mangkhama̱ mi akha kathāna. ²⁷Zingrot rothaiwa, tara̱ kaphong rāhaowa, masi phanda shim chili ungpharkaza̱ tharan chi ja̱phup tāhaowa; kala chiwui kashimān chi hakmahālaka."

²⁸Kala Jishuna tui hi hāngkup kahaiwui thili, mi kachungkhana awui tamkachithei chili matakhakhaowa, ²⁹khikhalajila ana pangshap leipa akha kathāda athumli tamchitheihaira, kala athumwui ain kathembing kathāda maningmana.