ማቴዎስ 7

7 ¹“እንዳይፈረድባችሁ አትፍረዱ። ²በምትፈርዱበት ፍርድ ይፈረድባችኋልና፤ በምትሰፍሩበትም መስፈሪያ ይሰፈርላችኋል። ³በወንድምህ ዐይን ያለውን ጉድፍ ለምን ታያለህ፤ በራስህ ዐይን ያለውን ምሰሶ ግን ለምን አትመለከትም? ⁴ወይስ በራስህ ዐይን ምሰሶ ሳለ፣ ወንድምህን፣ ‘ከዐይንህ ጉድፉን ላውጣ’ እንዴት ልትለው ትችላለህ? ⁵አንተ ግብዝ፣ አስቀድመህ ከራስህ ዐይን ምሰሶውን አውጣ፤ ከዚያም የወንድምህን ዐይን ጉድፍ ለማውጣት በግልጽ ታያለህ።

⁶“የተቀደሰውን ለውሾች አትስጡ፤ ዕንቍዎቻችሁንም በእሪያዎች ፊት አትጣሉ፤ በእግራቸው ይረግጧቸዋልና፤ ተመልሰውም ይነጣጥቋችኋል።

አባታችን ለሚለምኑት ይሰጣል

⁷“ለምኑ፤ ይሰጣችኋል፤ ፈልጉ፤ ታገኛላችሁ፤ አንኳኩ፤ ይከፈትላችኋል። ⁸የሚለምን ሁሉ ይቀበላልና፤ የሚፈልግም ያገኛል፤ ለሚያንኳኳም ይከፈትለታል። ⁹ወይስ ከእናንተ መካከል ልጁ ዳቦ ቢለምነው ድንጋይ የሚሰጠው ማን ነው? ¹⁰ወይስ ዓሣ ቢለምነው እባብ ይሰጠዋልን? ¹¹እንግዲህ እናንተ ክፉዎች ስትሆኑ ለልጆቻችሁ መልካም ስጦታ መስጠት ካወቃችሁ፤ በሰማይ ያለው አባታችሁ ለሚለምኑት እንዴት አብልጦ መልካም ነገሮችን አይሰጥም!

¹²“እንግዲህ ሰዎች እንዲያደርጉላችሁ የምትፈልጉትን ሁሉ እናንተም እንዲሁ አድርጉላቸው፤ ሕግና ነቢያት ይህ ነውና።

¹³“በጠበበው በር ግቡ፤ ወደ ጥፋት የሚወስደው በር ሰፊ፣ መንገዱም ትልቅ ነውና፤ በእርሱም የሚገቡ ብዙዎች ናቸው። ¹⁴ወደ ሕይወት የሚወስደው በር ግን ጠባብ፣ መንገዱም ቀጭን ነው፤ የሚያገኙትም ጥቂቶች ናቸው።

በፍሬያቸው ይታወቃሉ

¹⁵“ከሐሰተኞች ነቢያት ተጠንቀቁ፤ የበግ ለምድ ለብሰው ይመጡባችኋል፤ በውስጣቸው ግን ነጣቂዎች ተኵላዎች ናቸው። ¹⁶በፍሬያቸው ታውቋቸዋላችሁ። ከእሾህ ወይን፣ ከኵርንችትስ በለስ ይለቀማልን? ¹⁷እንዲሁም መልካም ዛፍ ሁሉ መልካም ፍሬ ያፈራል፤ ክፉ ዛፍ ግን ክፉ ፍሬ ያፈራል። ¹⁸መልካም ዛፍ ክፉ ፍሬ ማፍራት አይችልም፤ ክፉ ዛፍም መልካም ፍሬ ማፍራት አይችልም። ¹⁹መልካም ፍሬ የማያፈራ ዛፍ ሁሉ ይቈረጣል፤ ወደ እሳትም ይጣላል። ²⁰እንግዲያስ በፍሬያቸው ታውቋቸዋላችሁ።

የአባታችንን ፈቃድ የሚያደርጉ ብቻ

²¹“‘ጌታ ሆይ፣ ጌታ ሆይ’ የሚለኝ ሁሉ የአባታችንን መንግሥት የሚገባ አይደለም፤ በሰማይ ያለውን የአባቴን ፈቃድ የሚያደርግ እንጂ። ²²በዚያ ቀን ብዙዎች፣ ‘ጌታ ሆይ፣ ጌታ ሆይ፣ በስምህ ትንቢት አልተናገርንምን? በስምህስ አጋንንትን አላወጣንምን? በስምህስ ብዙ ተአምራት አላደረግንምን?’ ይሉኛል። ²³በዚያን ጊዜ፣ ‘ከቶ አላወቅኋችሁም፤ እናንተ ዐመፅ የምትሠሩ፣ ከእኔ ራቁ’ ብዬ በግልጽ እነግራቸዋለሁ።

በዐለት ላይ መሥራት

²⁴“እንግዲህ እነዚህን ቃሎቼን ሰምቶ የሚያደርጋቸው ሁሉ ቤቱን በዐለት ላይ የሠራ ልባም ሰውን ይመስላል። ²⁵ዝናብ ወረደ፤ ጎርፍ መጣ፤ ነፋስም ነፈሰ፤ ያንም ቤት መታው፤ ነገር ግን በዐለት ላይ ስለ ተመሠረተ አልወደቀም። ²⁶እነዚህን ቃሎቼን ሰምቶ የማያደርጋቸው ሁሉ ግን ቤቱን በአሸዋ ላይ የሠራ ሞኝ ሰውን ይመስላል። ²⁷ዝናብ ወረደ፤ ጎርፍ መጣ፤ ነፋስም ነፈሰ፤ ያንም ቤት መታው፤ ወደቀም፤ አወዳደቁም ታላቅ ነበር።”

²⁸ኢየሱስም ይህን ቃል ተናግሮ በጨረሰ ጊዜ፣ ሕዝቡ በትምህርቱ ተደነቁ፤ ²⁹ትምህርቱ እንደ ጸሐፍቶቻቸው ሳይሆን፣ ሥልጣን እንዳለው ሆኖ ያስተምራቸው ነበርና።